ກອງປະຊຸມປຶກສາຫາລື ກ່ຽວກັບ ສິ່ງທ້າທາຍ ແລະ ກາລະໂອກາດ ໃນການເສີມສ້າງກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ
ວັນທີ 12 ຕຸລາ 2020, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ໂດຍການສະໜັບສະໜູນຂອງໂຄງການສ້າງສະພາບແວດລ້ອມທີ່ເອື້ອອຳນວນຕໍ່ທຸລະກິດລາວ (USAID Laos Business Environment), ໄດ້ຈັດກອງປະຊຸມປຶກສາຫາລື ກ່ຽວກັບ ສິ່ງທ້າທາຍ ແລະ ກາລະໂອກາດ ໃນການເສີມສ້າງກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ, ທີ່ ໂຮງແຮມ ແກຣນ ວຽງຈັນ ໂດຍການເປັນປະທານຮ່ວມຂອງ ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື ແລະ ທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄື ຕາງໜ້າຂະແໜງການທີ່ກ່ຽວຂ້ອງຈາກພາກລັດ, ບັນດາສະມາຄົມທຸລະກິດໃນ ສປປ ລາວ ແລະ ຕາງໜ້າຈາກຄູ່ຮ່ວມພັດທະນາ ໂດຍສະເພາະ ອົງການພັດທະນາສາກົນຂອງປະເທດສະຫະລັດອາເມລິກາ (USAID) ແລະ ມູນນິທິເອເຊຍ.
ຈຸດປະສົງຂອງກອງປະຊຸມ ແມ່ນເພື່ອປຶກສາຫາລື ແລະ ແລກປ່ຽນຄວາມຄິດເຫັນຮ່ວມກັນ ໃນການກໍານົດກົນໄກການເຮັດວຽກ ແລະ ວິທີການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ ໃຫ້ມີຄວາມຊັດເຈນ, ຕໍ່ເນື່ອງ, ເຂັ້ມແຂງ, ເປັນເອກະພາບ ແລະ ເຊື່ອມໂຍງກັບກົນໄກກອງປະຊຸມທຸລະກິດລາວຂັ້ນສູນກາງ, ເຮັດໃຫ້ເປັນເວທີທີ່ສາມາດຮັບຟັງ ແລະ ແກ້ໄຂບັນຫາບັນຫາຂໍ້ຫຍຸ້ງຍາກຕ່າງໆ ທີ່ເປັນອຸປະສັກແກ່ພາກທຸລະກິດຂັ້ນທ້ອງຖິ່ນ ໂດຍສະເພາະວິສາຫະກິດຂະໜາດນ້ອຍ ແລະ ກາງ, ແລະ ນັກທຸລະກິດຍິງ ໄດ້ຢ່າງເປັນຮູບປະທໍາ.
ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື ໄດ້ກ່າວເປີດກອງປະຊຸມວ່າ: ການສ້າງສະພາບແວດລ້ອມການດຳເນີນທຸລະກິດ ໃຫ້ມີຄວາມສະດວກ ແລະ ເອື້ອອຳນວຍແກ່ພາກທຸລະກິດນັ້ນ ເປັນບັນຫາທີ່ພັກ ແລະ ລັດຖະບານເຮົາໃຫ້ຄວາມສຳຄັນເປັນຢ່າງຍິ່ງ. ເນື່ອງຈາກສະພາບແວດລ້ອມການດຳເນີນທຸລະກິດພາຍໃນປະເທດທີ່ດີ ຈະຊ່ວຍຍົກລະດັບຄວາມສາມາດໃນການແຂ່ງຂັັນ, ສົ່ງເສີມການເຕີບໃຫຍ່ຂະຫຍາຍຕົວຂອງພາກທຸລະກິດ ແລະ ເປັນປັດໃຈສໍາຄັນໃນການດຶງດູດການລົງທຶນເຂົ້າໃນການພັດທະນາເສດຖະກິດຂອງປະເທດ ໃຫ້ມີຄວາມເຂັ້ມແຂງ ແລະ ຍືນຍົງ. ໂດຍສະເພາະແມ່ນ ສະພາບແວດລ້ອມໃນການດຳເນີນທຸລະກິດ ທີ່ຖືກຜົນກະທົບຈາກການແຜ່ລະບາດຂອງພະຍາດ COVID-19 ໃນປະຈຸບັນ, ຍິ່ງຮຽກຮ້ອງໃຫ້ທາງພາກລັດ ແລະ ພາກທຸລະກິດ ໄດ້ມີການສ້າງກົນໄກປຶກສາຫາລື ຊອກຫາວິທີການແກ້ໄຂບັນດາອຸປະສັກສະເພາະທີ່ເກີດຂື້ນຈາກພະຍາດລະບາດດັ່ງກ່າວຢ່າງຮີບດ່ວນ ເພື່ອຟື້ນຟູສະພາບແວດລ້ອມ ການດຳເນີນໃຫ້ດີຂື້ນຢ່າງວ່ອງໄວ.
ທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ຍັງໄດ້ກ່າວ ຕື່ມອີກວ່າ: ໃນໄລຍະຜ່ານມາ, ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຍົກສູງ ບົດບາດເວທີການປຶກສາຫາລື ລະຫວ່າງພາກລັດ ແລະ ພາກທຸລະກິດ ໂດຍການຈັດຕັ້ງປະຕິບັດ ກົນໄກລະດັບຊາດ ນັ້ນກໍຄື “ກອງປະຊຸມທຸລະກິດລາວ” ຊຶ່ງຖືວ່າເປັນເວທີສໍາຄັນໃຫ້ກັບທຸກພາກສ່ວນ ໃນການປັບປຸງສະພາບແວດລ້ອມການດໍາເນີນທຸລະກິດ ໂດຍສະເພາະແມ່ນ ໃຫ້ພາກທຸລະກິດໄດ້ມີໂອກາດນໍາສະເໜີບັນຫາທີ່ເປັນອຸປະສັກໃນການດໍາເນີນທຸລະກິດຂອງຕົນ ຢ່າງເປັນລະບົບ ແລະ ມີການຕິດຕາມຢ່າງໃກ້ຊິດ. ພາກລັດຖະບານ ກໍໄດ້ມີຄວາມພະຍາຍາມໃນການປັບປຸງນິຕິກໍາ ເພື່ອອໍານວຍຄວາມສະດວກໃຫ້ແກ່ການດໍາເນີນທຸລະກິດ, ປັບປຸງກົນໄກ, ລະບຽບ ແລະ ແບບແຜນວິທີການເຮັດວຽກ ເພື່ອບໍລິການໃຫ້ແກ່ພາກທຸລະກິດ ຕາມການສະເໜີຜ່ານກົນໄກດັ່ງກ່າວ. ສະພາການຄ້າ ແລະ ອຸດສາຫະກໍາແຫ່ງຊາດລາວ ກໍຄື ພາກທຸລະກິດ ເຫັນວ່າການປັບປຸງສະພາບແວດລ້ອມການດໍາເນີນທຸລະກິດ ມີຄວາມຈໍາເປັນທີ່ສຸດ ແລະ ຂະບວນການດັ່ງກ່າວ ຕ້ອງເປັນຂະບວນການທີ່ຕໍ່ເນື່ອງ ແລະ ບໍ່ສິ້ນສຸດ ແລະ ສິ່ງສໍາຄັນຕ້ອງມີການຂະຫຍາຍໄປໃນຂອບເຂດທົ່ວປະເທດ.
ທ່ານ Cullen Hughes, ຫົວໜ້າຫ້ອງການພັດທະນາດ້ານເສດຖະກິດ, ການສຶກສາ ແລະ ພະລັງງານ, ອົງການພັດທະນາສາກົນປະເທດສະຫະລັດອາເມລິກາ (USAID) ໄດ້ຍົກໃຫ້ເຫັນເຖິງຄວາມສຳຄັນຂອງກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດໃນຂັ້ນແຂວງ ໃນການປັບປຸງກົນໄກ ແລະ ລະບຽບການໃນການສົ່ງເສີມການດຳເນີນທຸລະກິດ. ອົງການ USAID ໄດ້ໃຫ້ຄວາມສຳຄັນຕໍ່ວຽກງານດັ່ງກ່າວ ແລະ ຈະສືບຕໍ່ຮ່ວມເຮັດວຽກຢ່າງໃກ້ຊິດກັບກະຊວງອຸດສະຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳແຫ່ງຊາດ ແລະ ບັນດາຄູ່ຮ່ວມພັດທະນາທີ່ກ່ຽວຂ້ອງ ເພື່ອຊຸກຍູ້ສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ.
ໃນຕອນທ້າຍຂອງກອງປະຊຸມ ໄດ້ຕົກລົງເຫັນດິ ໂດຍໃຫ້ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment) ກະກຽມບົດລາຍ ງານສະຫຼຸບຜົນກອງປະຊຸມ ແລະ ສົ່ງຂໍຄໍາເຫັນກັບ ກະຊວງອຸດສາຫະກໍາ ແລະ ການຄ້າ, ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ອົງການ USAID. ບົດລາຍງານສະບັບດັ່ງກ່າວ ຈະກໍານົດທິດທາງ ແລະ ແຜນວຽກການຈັດຕັ້ງປະຕິບັດ ກົນໄກກອງປະຊຸມປຶກສາຫາລື ພາຍໃຕ້ກອງປະຊຸມທຸລະກິດລາວໄປສູ່ຂັ້ນແຂວງ ເພື່ອໃຫ້ສາມາດຄອບຄຸມ ແລະ ເປັນຂົວຕໍ່ແກ້ໄຂບັນຫາໃນລະດັບທ້ອງຖິ່ນໃຫ້ໄດ້ຫຼາຍຂຶ້ນໃນທົ່ວປະເທດ.
