ກອງປະຊຸມປຶກສາຫາລື ກ່ຽວກັບ ສິ່ງທ້າທາຍ ແລະ ທິດທາງແກ້ໄຂໂດຍນໍາໃຊ້ດິຈິຕອລ (Digital Solution) ສໍາລັບວິສາຫະກິດຂະໜາດນ້ອຍ ແລະ ກາງ ຢູ່ ສປປ ລາວ ໃນໄລຍະການແຜ່ລະບາດຂອງພະຍາດ ໂຄວິດ-19

ໃນວັນທີ 28 ຕຸລາ 2020, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ, ໂດຍການສະໜັບສະໜູນຂອງໂຄງການສ້າງສະພາບແວດລ້ອມທີ່ເອື້ອອຳນວນຕໍ່ທຸລະກິດລາວ (USAID Laos Business Environment), ໄດ້ຈັດກອງປະຊຸມປຶກສາຫາລືໃນຫົວຂໍ້ “ສິ່ງທ້າທ້າຍ ແລະ ທິດທາງແກ້ໄຂໂດຍນຳໃຊ້ດິຈິຕອລເພື່ອຊ່ວຍວິສາຫະກິດຂະໜາດນ້ອຍ ແລະ ກາງ ຢູ່ ສປປ ລາວ ໃນໄລຍະການແຜ່ລະບາດຂອງພະຍາດ COVID-19” ທີ່ ໂຮງແຮມ ແລນມາກ, ນະຄອນຫຼວງວຽງຈັນ, ໂດຍການເປັນປະທານຮ່ວມຂອງທ່ານ ບຸນເຖິງ ດວງສະຫວັນ, ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ, ທ່ານ ທະນົງສິນ ກັນລະຍາ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ (LNCCI) ແລະ ທ່ານ ໄມໂຄລ໌ ຣອນນີ້ງ, ຜູ້ຕາງໜ້າອົງການພັດທະນາສາກົນຂອງປະເທດສະຫະລັດອາເມລິກາ (USAID) ປະຈໍາ ສປປ ລາວ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄືຜູ້ຕາງໜ້າ ຂະແໜງການທີ່ກ່ຽວຂ້ອງຈາກພາກລັດ, ບັນດາສະມາຄົມທຸລະກິດໃນ ສປປ ລາວ ແລະ ຕາງໜ້າຈາກຄູ່ຮ່ວມພັດທະນາ, ໂດຍສະເພາະອົງການພັດທະນາສາກົນຂອງປະເທດສະຫະລັດອາເມລິກາ (USAID), DFAT ແລະ ARISE Plus ທັງໝົດ ຈໍານວນ 40 ທ່ານ.

ກອງປະຊຸມປຶກສາຫາລືຄັ້ງນີ້ຖືວ່າເປັນເວທີແລກປ່ຽນບົດຮຽນ ແລະ ປະສົບການ ລະຫວ່າງພາກລັດ ແລະ ພາກທຸລະກິດ, ໂດຍສະເພາະແມ່ນບັນດາວິສາຫະກິດຂະໜາດນ້ອຍ ແລະ ກາງ (SMEs) ໃນການເສີມສ້າງ ແລະ ປັບປຸງກົນໄກການດໍາເນີນທຸລະກິດທີ່ນໍາໃຊ້ດິຈິຕອລ ເພື່ອໃຫ້ສາມາດປັບຕົວເຂົ້າການດຳເນິນທຸລະກິດແບບໃໝ່ (New Normal) ໃນໄລຍະການແຜ່ລະບາດຂອງ ພະຍາດໂຄວິດ-19. ກອງປະຊຸມໄດ້ມີການນໍາສະເໜີ ແລະ ປຶກສາຫາລືຜ່ານເວທີສົນທະນາໃນຫົວຂໍ້ທີ່ສຳຄັນຕ່າງໆຄື: ນະໂຍບາຍສົ່ງເສີມຂອງລັດຖະບານໃນການຊ່ວຍເຫຼືອ SMEs ໃນໄລຍະແຜ່ລະບາດຂອງພະຍາດ ໂຄວິດ-19, ໂອກາດການນຳໃຊ້ເຕັກໂນໂລຊີດິຈິຕອລເຂົ້າໃນການເພີ່ມປະສິດທິພາບ ແລະ ຄວາມອາດສາມາດໃຫ້ແກ່ SMEs ໃນ ສປປ ລາວ, ແລະ ຍັງມີວາລະສໍາລັບແລກປ່ຽນບົດຮຽນກັບຜູ້ຊ່ຽວຊານ ແລະ ບັນດາ SMEs ໃນ ສປປ ລາວ ແລະ ອາຊຽນ, ເຊັ່ນ ກໍາປູເຈຍ ແລະ ມຽນມ້າ ທີ່ປະສົບຜົນສໍາເລັດໃນການກ້າວໄປສູ່ ການດໍາເນີນທຸລະກິດແບບດິຈິຕອລ.

ທ່ານ ບຸນເຖິງ ດວງສະຫວັນ, ຫົວໜ້າກົມສົ່ງເສີມວິສາຫະກິດຂະໜາດນ້ອຍ ແລະ ກາງ, ໄດ້ຍົກໃຫ້ເຫັນເຖິງຄວາມສໍາຄັນໃນການຊ່ວຍເຫຼືອ ແລະ ຟື້ນຟູວິສາຫະກິດຈະໜາດນ້ອຍ ແລະ ກາງ, ເຊິ່ງກວມເອົາ 98% ຂອງວິສາຫະກິດ ແລະ ໂຄງປະກອບຂອງການຜະລິດໃນ ສປປ ລາວ, ຈາກຜົນກະທົບຂອງການແຜ່ລະບາດຂອງພະຍາດ ໂຄວິດ-19. ໃນນີ້, ຂະແໜງການທ່ອງທ່ຽວ ແລະ ບັນດາຂະແໜງຕ່າງໆທີ່ກ່ຽວຂ້ອງ ເປັນຕົ້ນແມ່ນຂະແໜງຫັດຖະກໍາ ແລະ ຂະແໜງຮ້ານອາຫານ ແລະ ໂຮງແຮມ, ເຊິ່ງສ່ວນໃຫຍ່ແມ່ນ SMEs, ແມ່ນໄດ້ຮັບຜົນກະທົບຫຼາຍທີ່ສຸດ. ການຊ່ວຍເຫຼືອໃຫ້ SMEs ສາມາດປັບຕົວ ແລະ ໝູນໃຊ້ເຄື່ອງມືທີ່ທັນສະໄໝເພື່ອຫຼຸດຕົ້ນທຶນ, ເພີ່ມປະສິດທິພາບ ແລະ ປະສິດທິຜົນຂອງການດໍາເນີນທຸະກິດ ຈຶ່ງມີຄວາມຈໍາເປັນ ແລະ ຮີບດ່ວນ.

ທ່ານ ທະນົງສິນ ກັນລະຍາ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ກ່າວຕື່ມວ່າ: ການສ້າງຄວາມເຂົ້າໃຈ ແລະ ສະໜັບສະໜູນ SMEs ໃນການນຳໃຊ້ເຕັກໂນໂລຢີ ເຂົ້າໃນປັບປຸງວິທີການດໍາເນີນທຸລະກິດ ຂອງຕົນແມ່ນມີຄວາມສໍາຄັນຫຼາຍທັງໃນໄລຍະປະຈຸບັນ ແລະ ພາຍຫຼັງ ໂຄວິດ-19 ເພື່ອເຮັດໃຫ້ຫົວໜ່ວຍທຸລະກິດດັ່ງກ່າວສາມາດເຕີບໂຕ ແລະ ເຊື່ອມໂຍງເຂົ້າກັບມູນຄ່າຕ່ອງໂສ້ສາກົນ, ເຂົ້າເຖິງຕະຫຼາດພາຍໃນ ແລະ ຕ່າງປະເທດຫຼາຍຂຶ້ນ. LNCCI ໄດ້ຮັບຮູ້ເຖິງຄວາມສຳຄັນຂອງຂະແໜງ ICT ໃນການພັດທະນາ SMEs ແລະ ໄດ້ສົມທົບກັບສະມາຄົມທີ່ກ່ຽວຂ້ອງ ໃນການສະໜັບສະໜູນການຫັນປ່ຽນໄປສູ່ ເສດຖະກິດດິຈິຕອລ, ພ້ອມທັງກະຕຸກຊຸກຍູ້ສະພາການຄ້າ ແລະ ອຸດສາຫະກໍາແຂວງເພື່ອສ້າງຄວາມເຂົ້າໃຈ ແລະ ສົ່ງເສີມສະມາຊິກໃນການໃຊ້ເຕັກໂນໂລຊີດິຈິຕອລ ເຂົ້າໃນການດໍາເນີນທຸລະກິດໃຫ້ຫຼາຍຂຶ້ນ.

ທ່ານ ໄມໂຄລ໌ ຣອນນີ້ງ, ຜູ້ຕາງໜ້າ ອົງການ USAID ປະຈໍາ ສປປ ລາວ ໄດ້ກ່າວວ່າ: SMEs ແມ່ນແຮງຂັບເຄື່ອນຂອງການເຕີບໂຕທາງດ້ານເສດຖະກິດໃນ ສປປ ລາວ, ເຊິ່ງຍັງປະສົບກັບຄວາມທ້າທາຍຫຼາຍດ້ານ ບໍ່ວ່າຈະເປັນຄວາມສາມາດ ໃນການຂະຫຍາຍທຸລະກິດ ແລະ ການເຂົ້າເຖິງຕະຫຼາດໃໝ່. ເຕັກໂນໂລຊີດິຈິຕອນຈຶ່ງມີບົດບາດສຳຄັນໃນການຫັນບັນດາສິ່ງທ້າທາຍດັ່ງກ່າວໃຫ້ກາຍໂອກາດ. ລັດຖະບານ ສະຫະລັດອາເມລິກາມີຄວາມມຸ້ງໝັ້ນ ທີ່ຈະສະໜັບສະໜູນການພັດທະນາເສດຖະກິດດິຈິຕອລໃນ ສປປ ລາວ, ເຊິ່ງເປັນສ່ວນໜຶ່ງຂອງການຮ່ວມມືລະຫວ່າງສອງປະເທດ, ແນໃສ່ປັບປຸງຄວາມສາມາດ ການແຂ່ງຂັນທາງທຸລະກິດໃຫ້ນໍາໄປສູ່ການເຕີບໂຕທາງເສດຖະກິດແບບຍືນຍົງ.

ໃນຕອນທ້າຍຂອງກອງປະຊຸມ, ຜູ້ຕາງໜ້າຈາກໂຄງການປັບປຸງ ສະພາບແວດລ້ອມການດໍາເນີນທຸລະກິດຢູ່ ສປປ ລາວ (USAID-Laos Business Environment) ກໍໄດ້ສະເໜີຮູບແບບການຊ່ວຍເຫຼືອຕ່າງໆ ເພື່ອຊ່ວຍສະໜັບສະໜູນໃຫ້ SMEs ໃນ ສປປ ລາວ ສາມາດດໍາເນີນທຸລະກິດໃນໄລຍະການແຜ່ລະບາດຂອງພະຍາດ ໂຄວິດ-19, ໂດຍສະເພາະແມ່ນການສ້າງກິດຈະກຳເພື່ອປັບປຸງຄວາມສາມາດໃນການແຂ່ງຂັນໃຫ້ແກ່ວິສາຫະກິດຂະໜາດນ້ອຍ ແລະ ກາງ ໃນການນຳໃຊ້ເຕັກໂນໂລຢີ ທີ່ທັນສະໄໝເຂົ້າໃນການເຮັດວຽກ ແລະ ໃຫ້ຄວາມຮູ້ແກ່ບັນດາຜູ້ປະກອບການໃນການນຳໃຊ້ ການຄ້າທາງອີເລັກໂຕຼນິກ (E-commerce).

ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ (Laos Business Environment) ເປັນໂຄງການພາຍໃຕ້ການສະໜັບສະໜູນຂອງ ອົງການພັດທະນາສາກົນປະເທດ ສະຫະລັດອາເມລິກາ (USAID), ເປັນໂຄງການເສີມສ້າງຂີດຄວາມສາມາດ ແລະ ໃຫ້ຄໍາປຶກສາໂດຍແນໃສ່ການເສີມສ້າງ ຄວາມເຂັ້ມແຂງໃນການແຂ່ງຂັນ ລະຫວ່າງວິສາຫະກິດຂະໜາດນ້ອຍ ແລະ ຂະໜາດກາງ (SMEs), ພ້ອມກັນກັບການປັບປຸງການຈັດຕັ້ງປະຕິບັດກົດໝາຍ, ນະໂຍບາຍ ແລະ ກົດລະບຽບທີ່ກ່ຽວຂ້ອງ. ໂຄງການດັ່ງກ່າວຍັງແນໃສ່ການສົ່ງເສີມ ຂະແໜງການອຸດສະຫະກໍາ ແລະ ການບໍລິການທີ່ມີທ່າແຮງທີ່ສາມາດສ້າງວຽກເຮັດງານທໍາ ແລະ ມີການເຕີບໃຫຍ່ຂະຫຍາຍຕົວສູງ.