ກົມ ຜຮ, ກະຊວງ ອຄ ໄດ້ຈັດກອງປະຊຸມຝຶກອົບຮົມ ວ່າດ້ວຍການບໍລິຫານໂຄງການ ແລະ ຕິດຕາມຄວາມຄືບໜ້າ ການຈັດຕັ້ງປະຕິບັດໂຄງການ ECL
ແຂວງຫຼວງພະບາງ, ວັນທີ 18-19 ກຸມພາ 2021, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ໄດ້ຈັດກອງປະຊຸມຝຶກອົບຮົມວ່າດ້ວຍການຄຸ້ມຄອງບໍລິຫານໂຄງການ ແລະ ຕິດຕາມຄວາມຄືບໜ້າການຈັດຕັ້ງປະຕິບັດ ໂຄງການສົ່ງເສີມຄວາມສາມາດໃນການແຂ່ງຂັນ ເພື່ອສົ່ງອອກຢູ່ສາມແຂວງພາກເໜືອ (ECL) ໃຫ້ແກ່ບັນດາພາກສ່ວນທີ່ເຮັດວຽກຕິດພັນກັບໂຄງການ. ກອງປະຊຸມດັ່ງກ່າວໄດ້ໃຫ້ກຽດການເປັນປະທານໂດຍ ທ່ານ ພູວຽງ ພົງສາ, ຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ. ພາຍໃນກອງປະຊຸມດັ່ງກ່າວ, ຍັງມີບັນດາທ່ານຫົວໜ້າພະແນກ, ຮອງຫົວໜ້າ, ວິຊາການຈາກພະແນກ ອຸດສາຫະກໍາ ແລະ ການຄ້າ, ແລະ ສະພາການຄ້າ ແລະ ອຸດສາຫະກໍາ ແຂວງຈາກສາມແຂວງເປົ້າໝາຍຄື: ແຂວງ ອຸດົມໄຊ, ຫຼວງນໍ້າທາ ແລະ ຜົ້ງສາລີ ກໍໃຫ້ກຽດເຂົ້າຮ່ວມທັງໝົດ 47 ທ່ານ, ຍິງ 18 ທ່ານ.
ຈຸດປະສົງຂອງການຈັດກອງປະຊຸມດັ່ງກ່າວແມ່ນເພື່ອສ້າງຂີດຄວາມສາມາດດ້ານການບໍລິຫານໂຄງການ, ລວມທັງອົງປະກອບຫຼັກໃຈແຕ່ລະຂົງເຂດຂອງໂຄງການ, ຂະແໜງການຈັດຊື້-ຈັດຈ້າງໃນການຈັດຕັ້ງປະຕິບັດໂຄງການ, ແລະ ເຕັກນິກໃນການຈັດກອງປະຊຸມທາງໄກຢ່າງມີປະສິດທິພາບ.
ທ່ານ ພູວຽງ ພົງສາ, ຫົວໜ້າກົມແຜນການ ແລະ ການຮ່ວມມື ໄດ້ເນັ້ນໜັກກ່ຽວກັບຫົວຂໍ້ຕ່າງໆທີ່ຈະນໍາສະເໜີໃນກອງປະຊຸມເພື່ອຮັບປະກັນການຈັດຕັ້ງປະຕິບັດໂຄງການໃຫ້ມີປະສິດທິພາບຍິ່ງຂຶ້ນ. ທ່ານ ພູວຽງ ຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມນໍາໃຊ້ໂອກາດນີ້ແລກປ່ຽນຂໍ້ມູນ ແລະ ບົດຮຽນລະຫວ່າງສູນກາງ ແລະ ທ້ອງຖິ່ນໃຫ້ໄດ້ຫຼາຍທີ່ສຸດ.
ພາກທໍາອິດຂອງກອງປະຊຸມຝຶກອົບຮົມ ແມ່ນແນໃສ່ພື້ນຖານການບໍລິຫານການເງິນ ແລະ ວຽກງານການຈັດຊື້-ຈັດຈ້າງໃນໂຄງການທີ່ໄດ້ຮັບການສະໜັບສະໜູນໂດຍຜູ້ໃຫ້ທຶນຕ່າງໆ ແລະ ເຕັກນິກການຈັດກອງປະຊຸມທາງໄກໃຫ້ມີປະສິດທິພາບຍິ່ງຂຶ້ນຕາມທິດທາງວິຖີຊີວິດແບບໃໝ່ “ຫຼື New Normal”.
ພາກທີສອງຂອງກອງປະຊຸມຝຶກອົບຮົມ ແມ່ນແນໃສ່ຄວາມຮູ້ພື້ນຖານ ດ້ານວົງຈອນການບໍລິຫານໂຄງການ. ນອກຈາກການປຶກສາຫາລືຫົວຂໍ້ຕ່າງໆທີ່ກ່ຽວຂ້ອງແລ້ວ, ໂດຍສະເພາະແມ່ນເຕັກນິກການວິເຄາະບັນຫາແລ້ວ, ເວທີນີ້ຍັງເປີດໂອກາດໃຫ້ຜູ້ເຂົ້າຮ່ວມວິເຄາະບັນຫາສໍາຄັນ ທີ່ຕິດພັນກັບການພັດທະນາແບບຍືນຍົງ ແລະ ມີສ່ວນຮ່ວມໃນຂະແໜງການພັດທະນາຜະລິດຕະພັນ ກະສິກໍາໃນສາມແຂວງເປົ້າໝາຍ, ເຊັ່ນ ເຂົ້າ, ສາລີ ແລະ ຊາ. ສາເຫດຕົ້ນຕໍຂອງຜົນການຜະລິດທີ່ຕໍ່າໃນທັງສາມຜະລິດຕະພັນທີ່ເລືອກໄວ້ນັ້ນແມ່ນໄດ້ວິເຄາະໂດຍໃຊ້ເຕັກນິກການວິເຄາະແບບໂຄງຮ່າງ ແລະ ຜູ້ເຂົ້າຮ່ວມຍັງໄດ້ນໍາສະເໜີ ແລະ ປຶກສາຫາລືກ່ຽວກັບຜົນການວິເຄາະໃນພາກນີ້.
ພາກທີສາມຂອງກອງປະຊຸມຝຶກອົບຮົມ ແມ່ນການລົງຢ້ຽມຢາມ ສູນຫັດຖະກໍາ ອອກ ພົບ ຕົກ, ເຊິ່ງຜູ້ເຂົ້າຮ່ວມມີໂອກາດຮຽນຮູ້ກ່ຽວກັບວິທີການເຂົ້າເຖິງຕ່ອງໂສ້ມູນຄ່າເພີ່ມ ທີ່ນໍາໃຊ້ເຂົ້າໃນຫັດຖະກໍາການຜະລິດແຜ່ນແພໃນ 6 ບ້ານເປົ້າໝາຍ. ການລົງຢ້ຽມຢາມໃນຄັ້ງນີ້ຍັງໄດ້ປຶກສາຫາລື ກ່ຽວກັບຄວາມສໍາຄັນໃນການພັດທະນາສາຍສໍາພັນ ລະຫວ່າງພາກລັດ ແລະ ພາກທຸລະກິດ.
ກອງປະຊຸມຝຶກອົບຮົມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວ ແມ່ນການຊ່ວຍເຫຼືອເພື່ອການຮ່ວມມືດ້ານການຄ້າ ໃນບັນດາປະເທດດ້ອຍພັທດະນາ (LDCs). ໂຄງການນີ້ເລີ່ມຈັດຕັ້ງປະຕິບັດຕັ້ງແຕ່ປີ 2009 ແລະ ເປັນແຜນງານທີ່ມີຜູ້ໃຫ້ທຶນຫຼາຍຝ່າຍເພື່ອສະໜັບສະໜູນ ບັນດາປະເທດດ້ອຍພັດທະນາໃຫ້ສາມາດແຂ່ງຂັນ ໃນຕະຫຼາດການຄ້າໂລກໂດຍການຊ່ວຍກໍາຈັດ ບັນດາຂໍ້ຈໍາກັດໃນຕ່ອງໂສ້ການສະໜອງສິນຄ້າ.
ໂຄງການ ECL ແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາ ບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ. ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມ ທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງເອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
