ພາກສ່ວນທີ່ກ່ຽວຂ້ອງໄດ້ທົບທວນ ຄໍາເຫັນກ່ຽວກັບບົດລາຍງານການປັບປຸງ ແລະ ທົບທວນການ ຈັດຕັ້ງປະຕິບັດແຜນດໍາເນີນງານ 2020-22
ໃນວັນທີ 15 ກຸມພາ 2021, ກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ ໄດ້ຈັດກອງປະຊຸມສະຫຼຸບຄໍາເຫັນຂອງກຸ່ມທະນາຄານໂລກ ຕໍ່ບົດລາຍງານການປັບປຸງ ແລະ ທົບທວນການຈັດຕັ້ງປະຕິບັດແຜນດໍາເນີນງານ 2020-2022 ຂຶ້ນ. ກອງປະຊຸມດັ່ງກ່າວໄດ້ໃຫ້ກຽດການເປັນປະທານໂດຍທ່ານ ອຸຕະແກ້ວ ແກ້ວດວງສິນ, ຫົວໜ້າກົມສົ່ງເສີມການລົງທຶນ. ກອງປະຊຸມດັ່ງກ່າວ ໄດ້ໃຫ້ກຽດເຂົ້າຮ່ວມໂດຍຜູ້ຕາງໜ້າຈາກພາກສ່ວນ ທີ່ເຮັດວຽກຕິດພັນກັບຂະແໜງການທີ່ກ່ຽວຂ້ອງ ໃນການຈັດຕັ້ງປະຕິບັດ ວຽກງານກ່ຽວກັບການປັບປຸງວຽກງານການອໍານວຍຄວາມສະດວກ ໃນການດໍາເນີນທຸລະກິດ.
ທ່ານ ອຸຕະແກ້ວ ແກ້ວດວງສິນ, ຫົວໜ້າກົມສົ່ງເສີມການລົງ ໄດ້ເນັ້ນໜັກກ່ຽວກັບຈຸດປະສົງຂອງການຈັດກອງປະຊຸມດັ່ງກ່າວ ໃນບົດກ່າວເປີດກອງປະຊຸມວ່າ: “ກອງປະຊຸມໃນມື້ນີ້ແມ່ນກອງປະຊຸມເພື່ອທົບທວນ ແລະ ຈັດແຜນດໍາເນີນງານບູລິມະສິດ ທີ່ຈໍາເປັນຕ້ອງຈັດຕັ້ງປະຕິບັດເພື່ອແກ້ໄຂບັນຫາຄົງຄ້າງ ເພື່ອປັບປຸງອັນດັບຕົວຊີ້ວັດຄວາມສະດວກ ໃນການດໍາເນີນທຸລະກິດໃນປີ 2022”.
ອີງຕາມເອກະສານຕອບກັບຈາກກຸ່ມທະນາຄານໂລກ ລົງວັນທີ 17 ທັນວາ 2020, ທະນາຄານໂລກໄດ້ຮັບເອົາແຜນການປັບປຸງ 5 ແຜນ ຈາກ 18 ແຜນທັງໝົດ, ແລະ ນີ້ຄາດວ່າຈະປະກອບສ່ວນເຂົ້າໃນການຍົກລໍາດັບຕົວຊີ້ວັດ ໃນບົດລາຍງານກ່ຽວກັບຄວາມສະດວກໃນການດໍາເນີນທຸລະກິດໃນ ສປປ ລາວ ປີ 2021.
ວຽກງານດັ່ງກ່າວໄດ້ຮັບການຮ່ວມມືໂດຍຫຼາຍພາກສ່ວນ, ໂດຍສະເພາະແມ່ນພາກສ່ວນເປົ້າໝາຍທີ່ມີທ່າແຮງ ໃນການປັບປຸງຕົວຊີ້ວັດດັ່ງກ່າວຢູ່ໃນບົດລາຍງານ ວ່າດ້ວຍຄວາມສະດວກໃນການດໍາເນີນທຸລະກິດ, ເຊິ່ງຈະຖືກຈັດລໍາດັບໃນອີກສອງປີຕໍ່ມາ. ພາກສ່ວນຕ່າງໆປະກອບມີ ອຸດສາຫະກໍາ ແລະ ການຄ້າ, ພາສີ, ວຽກງານໂຍທາທິການ ແລະ ຂົນສົ່ງ, ພະລັງງານ ແລະ ບໍ່ແຮ່, ເພື່ອທົບທວນແຜນຈັດຕັ້ງປະຕິບັດວຽກງານໃນປີ 2021-2022, ຈັດສັນການຊ່ວຍເຫຼືອດ້ານວິຊາການທີ່ຈໍາເປັນ ແລະ ເພີ່ມການມີສ່ວນຮ່ວມຂອງພາກເອກະຊົນ ເຂົ້າໃນຂັ້ນຕອນການປັບປຸງດັ່ງກ່າວອີກດ້ວຍ.
ທ່ານ ອຸຕະແກ້ວ ຍັງໄດ້ກ່າວຕື່ມອີກວ່າ: “ໃນຂະນະທີ່ວຽກງານຕ່າງໆກໍມີຄວາມຄືບໜ້າຕາມແຜນທີ່ໄດ້ວາງໄວ້, ເພື່ອເຮັດໃຫ້ການປັບປຸງສະພາບແວດລ້ອມ ໃນການດໍາເນີນທຸລະກິດຕາມຕົວຊີ້ວັດຄວາມສະດວກ ໃນການດໍາເນີນທຸລະກິດໃຫ້ມີປະສິດທິພາບຫຼາຍຍິ່ງຂຶ້ນ, ວຽກງານດັ່ງກ່າວນີ້ຄວນເອົາໃຈໃສ່ເພີ່ມຕື່ມ ຈາກພາກສ່ວນທີ່ກ່ຽວຂ້ອງ, ທັງພາກລັດ ແລະ ພາກເອກະຊົນ”.
