ຫົວໜ້າທະນາຄານໂລກ ປະຈໍາລາວ ເຂົ້າຢ້ຽມຢາມຂໍ່ານັບ ພ້ອມທັງກ່າວ ອໍາລາ ທ່ານ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ ກະຊວງອຸດສາຫະກໍາ ແລະ ການຄ້າ

Published by NIU on

ນະຄອນຫຼວງວຽງຈັນ, ວັນທີ 21 ເມສາ 2021. ທ່ານ ນິໂກຣາ ພົນຕາຣາ, ຫົວໜ້າທະນາຄານໂລກ ປະຈໍາລາວ ເຂົ້າຢ້ຽມຢາມຂໍ່ານັບ ທ່ານ ປອ ຄໍາແພງ ໄຊສົມແພງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ ກະຊວງອຸດສາຫະກໍາ ແລະ ການຄ້າ ເພື່ອກ່າວອໍາລາ ເນື່ອງຈາກຈະສິ້ນສຸດວາລະໃນການປະຕິບັດຕໍາແໜ່ງຫົວໜ້າທະນາຄານໂລກ ປະຈໍາ ສປປ ລາວ ໃນທ້າຍເດືອນ ພຶດສະພາ 2021.
ທ່ານ ພົນຕາຣາ ໄດ້ສະແດງຄວາມຂອບໃຈມາຍັງລັດຖະບານແຫ່ງ ສປປ ລາວ ແລະ ກະຊວງອຸດສາຫະກໍາ ແລະ ການຄ້າ ສໍາລັບສາຍພົວພັນອັນດີງານໃນການສະໜັບສະໜູນການພັດທະນາເສດຖະກິດໃນ ສປປ ລາວ ຢ່າງຍືນຍົງ ແລະ ມີສ່ວນຮ່ວມ ໃນໄລຍະຊຸມປີທີ່ຜ່ານມາ, ໂດຍສະເພາະແມ່ນບົດບາດສໍາຄັນຂອງ ກະຊວງ ອຸດສາຫະກໍາ ແລະ ການຄ້າ ໃນການສົ່ງເສີມການເຊື່ອມສານ ແລະ ຄວາມສາມາດໃນການແຂ່ງຂັນທາງເສດຖະກິດ ໃນຂະແໜງການທີ່ບໍ່ແມ່ນຊັບພະຍາກອນທໍາມະຊາດ ໃນ ສປປ ລາວ.

ທ່ານ ພົນຕາຣາ ຫົວໜ້າທະນາຄານໂລກ ປະຈໍາລາວ ຍັງໝັ້ນໃຈຕໍ່ການຊີ້ນໍາຂອງ ທ່ານ ປອ ຄໍາແພງ ໄຊສົມແພງ ໃນການນໍາພາໃຫ້ສາຍພົວພັນລະຫວ່າງທະນາຄານໂລກ ແລະ ກະຊວງອຸດສາຫະກໍາ ແລະ ການຄ້າ ມີຄວາມເຂັ້ມແຂງຂຶ້ນຕື່ມ ແລະ ຈະສືບຕໍ່ໃຫ້ການສະໜັບສະໜັບສະໜູນວຽກງານການຄ້າ ໂດຍສະເພາະການສ້າງຄວາມເຂັ້ມແຂງໃຫ້ຈຸນລະວິສາຫະກິດໃນການເຂົ້າຫາແຫຼ່ງທຶນ, ໃຫ້ການຊ່ວຍເຫຼືອດ້ານວິຊາການເພື່ອປັບປຸງສະພາບແວດລ້ອມດ້ານລະບຽບກົດໝາຍ, ວຽກງານອໍານວຍຄວາມສະດວກທາງຄ້າ, ອຳນວຍຄວາມສະດວກໃນການດຳເນີນທຸລະກິດ ແລະ ຍົກລະດັບຄວາມສາມາດໃນການແຂ່ງຂັນໃຫ້ພາກທຸກລະກິດໃຫ້ເຂັ້ມແຂງໃນອະນາຄົດ.
ທ່ານ ປອ ຄໍາແພງ ໄຊສົມແພງ, ລັດຖະມົນຕີ ກະຊວງ ອຸດສາຫະກໍາ ແລະ ການຄ້າ, ຍ້ອງຍໍ ທ່ານ ພົນຕາຣາ ຫົວໜ້າທະນາຄານໂລກ ປະຈໍາລາວ ກ່ຽວກັບຜົນງານທີ່ຜ່ານມາ ແລະ ໄດ້ສະແດງຄວາມຂອບໃຈ ໃນການປະກອບສ່ວນສໍາຄັນເຂົ້າໃນການພັດທະນາ ແລະ ຮັກສາສາຍສໍາພັນອັນເຂັ້ມແຂງລະຫວ່າງ ທະນາຄານໂລກ ແລະ ກະຊວງອຸດສາຫະກໍາ ແລະ ການຄ້າ ໃນຊຸມປີຜ່ານມາ, ໂດຍສະເພາະ ແມ່ນການປະກອບສ່ວນຢ່າງຕັ້ງໜ້າໃນການສະໜອງທຶນກູ້ຢືມ ແລະ ການລະດົມທຶນຊ່ວຍເຫຼືອລ້າຈາກບັນດາອົງການຊ່ວຍເຫຼືອສາກົນ ເພື່ອສະໜັບສະໜູນລັດຖະບານລາວ ໂດຍຜ່ານ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ (LCT) ແລະ ໂຄງການສົ່ງເສີມການເຂົ້າເຖິງແຫຼ່ງທຶນຂອງວິສາຫະກິດຂະໜາດນ້ອຍ ແລະ ກາງ (MSME A2F).

ທ່ານ ລັດຖະມົນຕີ ຄໍາແພງ ໄຊສົມແພງ ຍັງໝັ້ນໃຈວ່າ ກະຊວງອຸດສາຫະກໍາ ແລະ ການຄ້າ ມີຄວາມຍິນດີເປັນຢ່າງຍິ່ງທີ່ຈະສືບຕໍ່ຮ່ວມເຮັດວຽກກັບທີມງານທະນາຄານໂລກ ເພື່ອສືບຕໍ່ຈັດຕັ້ງປະຕິບັດໂຄງການຕ່າງໆໃຫ້ສໍາເລັດຕາມເປົ້າໝາຍທີ່ໄດ້ວາງໄວ້, ເຊິ່ງສຸມໃສ່ສ້າງຄວາມຫຼາກຫຼາຍທາງດ້ານເສດຖະກິດ ແລະ ຄວາມສາມາດໃນການແຂ່ງຂັນຂອງຂະແໜງການທີ່ບໍ່ແມ່ນຊັບພະຍາກອນທຳມະຊາດ ໃນໄລຍະຟື້ນຟູຜົນກະທົບຂອງ COVID-19.