ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມ ທົບທວນຄືນ ການຈັດຕັ້ງປະຕິບັດໂຄງການ LCT ຄັ້ງທີ 5
ນະຄອນຫຼວງວຽງຈັນ, ວັນທີ 22 ກໍລະກົດ 2020, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມທົບທວນການຈັດຕັ້ງປະຕິບັດໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT) ຂຶ້ນ ເພື່ອທົບທວນວຽກງານຂອງໂຄງການພາຍໃນ 6 ເດືອນທີ່ຜ່ານມາ ແລະ ຮັບຮອງແຜນບູລິມະສິດໃນການຈັດຕັ້ງປະຕິບັດໂຄງການໃນຕໍ່ໜ້າ. ກອງປະຊຸມໄດ້ໃຫ້ກຽດເປັນປະທານໂດຍ ພະນະທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍບັນດາຜູ້ຕາງໜ້າຈາກກະຊວງ ແລະ ກົມກອງທີ່ກ່ຽວຂ້ອງ, ກໍຄື ພາກສ່ວນຈັດຕັ້ງປະຕິບັດໂຄງການ, ບັນດາຜູ້ໃຫ້ທຶນ ແລະ ຄູ່ຮ່ວມພັດທະນາ ຫຼາຍກວ່າ 80 ທ່ານ, ເຊິ່ງຜູ້ເຂົ້າຮ່ວມສ່ວນຫຼາຍແມ່ນເຂົ້າຮ່ວມຜ່ານລະບົບປະຊຸມທາງໄກ.
ພະນະທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າໄດ້ກ່າວເປີດກອງປະຊຸມວ່າ:“ກອງປະຊຸມໃນມື້ນີ້ ແມ່ນໄດ້ຈັດຂຶ້ນໃນລະຫວ່າງການລະບາດຂອງ ໂຄວິດ-19. ເຖິງວ່າ ໃນ ສປປ ລາວ ບໍ່ມີຈໍານວນຜູ້ຕິດເຊື້ອ ໂຄວິດ-19 ຫຼາຍ, ແຕ່ພວກເຮົາກໍພົບບັນຫາທາງເສດຖະກິດ ແລະ ຈໍາເປັນຕ້ອງປະຢັດງົບປະມານປະຈໍາປີ. ເນື່ອງຈາກບັນຫາດ້ານຄວາມຕ້ອງການທົ່ວໂລກ, ສົ່ງຜົນກະທົບຕໍ່ຕ່ອງໂສ້ດ້ານຜູ້ສະໜອງ. ຍິ່ງໄປກວ່ານັ້ນ, ນະໂຍບາຍການປ້ອງກັນ, ຄວບຄຸມ ແລະ ສະກັດກັ້ນການລະບາດຂອງ ໂຄວິດ-19, ເຮັດໃຫ້ຈໍາກັດການເດີນທາງ, ເຊິ່ງສົ່ງຜົນກະທົບຢ່າງຮຸນແຮງຕໍ່ລາຍຮັບຈາກຂະແໜງການທ່ອງທ່ຽວ ແລະ ເງິນສົ່ງກັບບ້ານຂອງແຮງງານຈາກຂະແໜງການດັ່ງກ່າວກໍຫຼຸດລົງຢ່າງຫຼວງຫຼາຍ. ໃນລະຫວ່າງວິກິດການດັ່ງກ່າວ, ໂຄງການ LCT ກໍຍັງເຫັນໂອກາດໃນການຈັດຕັ້ງປະຕິບັດ ໂຄງການຕາມແຜນທີ່ວາງໄວ້, ໂດຍສະເພາະແມ່ນວຽກງານ ການປັບປຸງນະໂຍບາຍຕ່າງໆພາຍໃຕ້ໂຄງການ, ເຊິ່ງສອດຄ່ອງກັບນະໂຍບາຍການຟື້ນຟູເສດຖະກິດຫຼັງຈາກວິກິດການລະບາດຂອງ ໂຄວິດ-19”.
ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ສັງລວມຄວາມຄືບໜ້າ ແລະ ສິ່ງທ້າທາຍໃນການຈັດຕັ້ງປະຕິບັດໂຄງການ LCT ຕັ້ງແຕ່ເດືອນມັງກອນ ຫາ ເດືອນມິຖຸນາ 2021 ທີ່ຜ່ານມາ ແລະ ແຜນບູລິມະສິດໃນການຈັດຕັ້ງປະຕິບັດໂຄງການໃນອີກ 6 ເດືອນຕໍ່ມາ. ການລາຍງານດັ່ງກ່າວໄດ້ສັງລວມເອົາວຽກງານທັງສີ່ເສົາຄໍ້າ, ເຊິ່ງປະກອບມີ, ເສົາຄໍ້າ ກ – ປັບປຸງຂະບວນການຈົດທະບຽນກໍ່ຕັ້ງວິສາຫະກິດໃຫ້ງ່າຍດາຍຂຶ້ນ, ປັບປຸງ ແລະ ເຜີຍແຜ່ຂອດການອອກໃບອະນຸຍາດດໍາເນີນທຸລະກິດ ແລະ ສະໜັບສະໜູນການປັບປຸງທຸລະກິດທີ່ກ້ວາງຂວາງກວ່າເກົ່າ, ເສົາຄໍ້າ ຂ – ສະໜັບສະໜູນກອງເລຂາອໍານວຍຄວາມສະດວກທາງດ້ານການຄ້າ, ທຶນສະໜັບສະໜູນໂຄງການຍ່ອຍເພື່ອອໍານວຍຄວາມສະດວກດ້ານການຄ້າ, ເສົາຄໍ້າ ຄ – ປັບປຸງຄວາມສາມາດໃນການແຂ່ງຂັນໃຫ້ພາກທຸລະກິດໂດຍຜ່ານ ທຶນສົມທົບເພື່ອສົ່ງເສີມທຸລະກິດ ແລະ ເສົາຄໍ້າ ງ – ຄຸ້ມຄອງ ແລະ ປະສານງານໂຄງການ, ປັບປຸງການສ້າງນະໂຍບາຍ ແລະ ຄວາມໂປ່ງໄສ ແລະ ສະໜັບສະໜູນການຮ່ວມມືລະຫວ່າງພາກລັດ ແລະ ພາກທຸລະກິດ. ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ມີໂອກາດປະກອບສ່ວນຖາມຕອບ ແລະ ປຶກສາຫາລືກ່ຽວກັບສິ່ງທ້າທາຍ ແລະ ແຜນຈັດຕັ້ງປະຕິບັດໃນຕໍ່ໜ້າ.
ໃນລະຫວ່າງກອງປະຊຸມ, ຜູ້ເຂົ້າຮ່ວມໄດ້ປຶກສາຫາລືກ່ຽວກັບສິ່ງທ້າທາຍທີ່ພົບພໍ້ ໃນລະຫວ່າງການຈັດຕັ້ງປະຕິບັດໂຄງການທີ່ຜ່ານມາ ພ້ອມທັງ ຖອດຖອນບົດຮຽນກ່ຽວກັບການແກ້ໄຂບັນຫາຕ່າງໆ. ພະນະທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ໄດ້ໃຫ້ກຽດກ່າວປິດກອງປະຊຸມໂດຍແນໃສ່ເຖິງຜົນຄືບໜ້າ ການຈັດຕັ້ງປະຕິບັດໂຄງການທີ່ສໍາຄັນ ແລະ ວຽກງານຕ່າງໆທີ່ຈໍາເປັນຕ້ອງຈັດຕັ້ງປະຕິບັດໃນ 6 ເດືອນຕໍ່ມາ ເພື່ອຮັບປະກັນການອໍານວຍຄວາມສະດວກທາງການຄ້າ ແລະ ການລົງທຶນ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມ ເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
