ກອງທຸລະກິດແຂວງຜົ້ງສາລີ
ແຂວງຜົ້ງສາລີ, ວັນທີ 28 ພຶດສະພາ 2022, ພະແນກອຸດສາຫະກໍາ ແລະ ການຄ້າ ແຂວງຜົ້ງສາລີ ໂດຍການສົມທົບກັບສະພາການຄ້າ ແລະ ອຸດສາຫະກຳ ແຂວງຜົ້ງສາລີ ໄດ້ຈັດກອງປະຊຸມທຸລະກິດແຂວງຜົ້ງສາລີ ຢູ່ທີ່ ຫ້ອງປະຊຸມຫ້ອງວ່າການປົກຄອງແຂວງ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL). ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ວີສອນ ລາວມາວ, ຮອງເຈົ້າແຂວງ ແຂວງຜົ້ງສາລີ ແລະ ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ. ກອງປະຊຸມ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກພາກລັດ ແລະ ພາກທຸລະກິດເຂົ້າຮ່ວມຫຼາຍກວ່າ 54 ທ່ານ (ຍິງ 7 ທ່ານ).
ຈຸດປະສົງຂອງກອງປະຊຸມ ແມ່ນເພື່ອລາຍງານຄວາມຄືບໜ້າຂອງການຈັດຕັ້ງປະຕິບັດ ຂະບວນການປຶກສາຫາລື ລະຫວ່າງພາກລັດ ແລະ ພາກທຸລະກິດ ພ້ອມທັງຂໍທິດຊີ້ນຳການແກ້ໄຂບັນດາບັນຫາບູລິມິສິດຂອງແຂວງຜົ້ງສາລີ ຕໍ່ ຄະນະນຳ ແຂວງຜົ້ງສາລີ ແລະ ຄະນະນຳ ກະຊວງອຸດສາຫະກຳ ແລະ ການຄ້າ.
ທ່ານ ວິສອນ ລາວມາວ, ຮອງເຈົ້າແຂວງ ແຂວງຜົ້ງສາລີ ໄດ້ກ່າວໃນບົດກ່າວເປີດກອງປະຊຸມວ່າ: ຂະບວນການປຶກສາຫາລືລະຫວ່າງພາກລັດ ແລະ ພາກທຸລະກິດ ຂັ້ນແຂວງ ແມ່ນມີຄວາມສຳຄັນຢ່າງຍິ່ງ ໃນການສ້າງການຮ່ວມມືລະຫວ່າງລັດຖະບານ ແລະ ພາກລະກິດ ໂດຍເປັນເວທີໃນການແລກປ່ຽນຂໍ້ມູນ, ລະດົມຂໍ້ຄິດເຫັນ ແລະ ຊອກວິທີແກ້ໄຂ ຂໍ້ຫຍຸ້ງຍາກທີ່ພາກທຸລະກິດສະເໜີ.
ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍໄດ້ກ່າວວ່າ ປະຈຸບັນປະເທດເຮົາໄດ້ຍົກເລິກບັນດາມາດຕະການ ທີ່ແນໃສ່ຄວບຄຸມ ແລະ ຈຳກັດການລະບາດຂອງ ໂຄວິດ-19 ໃນໄລຍະ 02 ປີຜ່ານມາ ເພື່ອດຶງດູດການລົງທຶນໃໝ່ທີ່ມີປະສິດທິພາບ ທີ່ສາມາດຊ່ວຍເສີມສ້າງຄວາມຫຼາກຫຼາຍ ແລະ ຄວາມຍືນຍົງ ຂອງເສດຖະກິດ ທີ່ພວກເຮົາຕ້ອງການ. ດັ່ງນັ້ນ ພວກເຮົາຕ້ອງມີສະພາບແວດລ້ອມທີ່ເອື້ອອຳນວຍໃຫ້ແກ່ການດຳເນີນທຸລະກິດ ແລະ ການມີຕົ້ນທຶນດ້ານການຄ້າທີ່ສາມາດແຂ່ງຂັນໄດ້ກັບສາກົນ.
ທ່ານ ທະນູຄຳ ປິດຈະວົງ, ຫົວໜ້າພະແນກອຸດສາຫະກຳ ແລະ ການຄ້າ, ໄດ້ລາຍງານກ່ຽວກັບຂະບວນການປຶກສາຫາລືລະຫວ່າງພາກລັດ ແລະ ພາກທຸລະກິດ ໃນໄລຍະຜ່ານມາ ເຊິ່ງໄດ້ເລີ່ມຕົ້ນແຕ່ປີ 2019 ແລະ ໄດ້ຈັດກອງປະຊຸມປຶກສາຫາລື 07 ຄັ້ງ ເຊິ່ງສາມາດສັງລວມ ບັນຫາບູລິມະສິດໄດ້ ຈຳນວນ 25 ບັນຫາ ແລະ ສາມາດແກ້ໄດ້ 17 ບັນຫາ. ນອກຈາກນີ້, ທ່ານຫົວໜ້າ ພະແນກ ອຄ ຍັງໄດ້ລາຍງານບັນດາຂໍ້ຫຍຸ້ງຍາກ ໃນການຈັດຕັ້ງປະຕິບັດຂະບວນການປືກສາຫາລື ໃນຂັັ້ນແຂວງ ແລະ ໄດ້ສະເໜີຕໍ່ຂັ້ນສູນກາງເພື່ອຊ່ວຍແກ້ໄຂບາງນິຕິກຳທີ່ກ່ຽວພັນ.
ທ່ານ ເຫຼັກ ສຸກສັນ, ປະທານ ສະພາກການຄ້າ ແລະ ອຸດສາຫະກຳ, ໄດ້ນຳສະເໜີບັນຫາບູລິມະສິດ ທີ່ຈະນຳມາປຶກສາຫາລືໃນກອງປະຊຸມ ເຊິ່ງແບ່ງອອກເປັນ 03 ກຸ່ມບັນຫາຄື: 1. ກຸ່ມບັນຫາທີ່ຕິດພັນກັບການອຳນວຍຄວາມສະດວກຄ້າ, 2. ບັນຫາທີ່ຕິດພັນກັບອາກອນ, ຄ່າທຳນຽມ, ຄ່າບໍລິການ ແລະ ການຂຶ້ນທະບຽນສວນປູກ, ແລະ 3. ກຸ່ມບັນຫາທີ່ຕິດພັນກັບການແກ້ໄຂຢາເສບຕິດ ແລະ ການຈັດຕັ້ງປະຕິບັດກົດລະບຽບຕ່າງໆ.
ສຸດທ້າຍນີ້, ທ່ານ ຮອງເຈົ້າແຂວງ ແຂວງຜົ້ງສາລີ ໄດ້ໃຫ້ກຽດກ່າວປິດກອງປະຊຸມໂດຍໄດ້ໃຫ້ທິດຊີ້ນຳໂດຍມອບບັນດາຂະແໜງການທີ່ກ່ຽວຂ້ອງ ພາກລັດ ແລະ ພາກທຸລະກິດ ໃນການແກ້ໄຂບັນຫາ. ພ້ອມທັງກ່າວ ສະແດງຄວາມຂອບໃຈມາຍັງບັນດາພະແນກທີ່ກ່ຽວຂ້ອງຂັ້້ນເມືອງ, ຂັ້ນແຂວງ ແລະ ບັນດາຜູ້ເຂົ້າຮ່ວມຈາກພາກທຸລະກິດທີ່ປະກອບສ່ວນເຂົ້າໃນກອງປະຊຸມໃຫ້ມີຄວາມປະສົບຜົນສຳເລັດ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
