ກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການ ສົ່ງເສີມຄວາມສາມາດ ໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອ ຄັ້ງທີ 6
ແຂວງຫຼວງນຳ້ທາ, ວັນທີ 31 ພຶດສະພາ 2022, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອ ຄັ້ງທີ 6 ຂື້ນທີ່ຫ້ອງປະຊຸມສະໂມສອນແຂວງ ໂດຍການສົບທົບກັບໜ່ວຍງານຈັດຕັ້ງປະຕິບັດໂຄງການຢູ່ທັງ 3 ແຂວງຄື: ແຂວງຫຼວງນຳ້ທາ, ແຂວງອຸດົມໄຊ ແລະ ແຂວງຜົ້ງສາລີ.
ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ພົມມະສຸກ ວິໄລກຸນ, ຮອງເຈົ້າແຂວງແຂວງຫຼວງນຳ້ທາ ມີຜູ້ເຂົ້າຮ່ວມຫຼາຍກ່ວາ 50 ທ່ານ ຈາກບັນດາກົມ ແລະ ພະແນກພາຍໃນກະຊວງ ອຄ, ພະແນກ ອຄ ແລະ ສະພາການຄ້າ ແລະ ອຸດສາຫະກຳ ທັງ 3 ແຂວງ, ບັນດາຜູ້ຕາງໜ້າຈາກພາກລັດ ແລະ ພາກທຸລະກິດທີ່ກ່ຽວຂ້ອງ.
ຈຸດປະສົງຂອງກອງປະຊຸມ ແມ່ນເພື່ອລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການໃນໄລຍະ 6 ເດືອນທີ່ຜ່ານມາ ແລະ ກຳນົດແຜນບຸລິມະສິດຂອງ 6 ເດືອນທ້າຍປີ.
ທ່ານ ພົມມະສຸກ ວິໄລກຸນ, ຮອງເຈົ້າແຂວງແຂວງຫຼວງນຳ້ທາ ໄດ້ກ່າວຕ້ອນຮັບຄະນະຈັດຕັ້ງປະຕິບັດໂຄງການ ແລະ ເນັ້ນໜັກໃຫ້ຮູ້ຕື່ມວ່າໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອນີ້ ມີຈຸດປະສົງສົ່ງເສີມການສົ່ງອອກຂອງຜະລິດຕະພັນເປົ້າໝາຍຄື: ເຂົ້າຢູ່ແຂວງຫຼວງນຳ້ທາ, ສາລີຢູ່ແຂວງອຸດົມໄຊ, ຊາຢູ່ແຂວງຜົ້ງສາລີ ແລະ ຫັດຖະກຳຢູ່ທັງ 3 ແຂວງ ເຊິ່ງການສົ່ງອອກຈະຊ່ວຍສ້າງລາຍຮັບໃຫ້ກັບປະຊາຊົນ ໂດຍສະເພາະແມ່ນແມ່ຍິງ ໃຫ້ໄດ້ຫຼາຍຂຶ້ນ. ໂຄງການດັ່ງກ່າວນີ້ຍັງໄດ້ຊ່ວຍປັບປຸງສະພາບແວດລ້ອມໃນການດຳເນີນທຸລະກິດ ເພື່ອອຳນວຍຄວາມສະດວກໃຫ້ທຸລະກິດ ສາມາດແຂ່ງຂັນກັນໄດ້. ນອກຈາກນີ້, ທ່ານຮອງເຈົ້າແຂວງ ຍັງໄດ້ຮຽກຮ້ອງໃຫ້ບັນດາພາກສ່ວນທີ່ກ່ຽວຂ້ອງຮ່ວມມືກັນດຳເນີນທຸລະກິດ ເພື່ອພັດທະນາດສດຖະກິດຂອງຕົນໃຫ້ເຂັ້ມແຂງ ແລະ ຊ່ວຍກັນຊອກແຫຼ່ງທຶນເຂົ້າໃນການພັດທະນາເສດຖະກິດຂອງແຂວງຕົນເອງ.
ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍໄດ້ເນັ້ນໜັກເຖິງຄວາມສຳຄັນ ຂອງນະໂຍບາຍທາງເສດຖະກິດ, ການປັບປຸງສະພາບແວດລ້ອມເສດຖະກິດທີ່ຕໍ່ເນື່ອງ ແລະ ການສ້າງຄວາມເຂັ້ມແຂງໃຫ້ກັບພາກທຸລະກິດ. ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜືອ ຍັງເປັນໂຄງການທຳອິດຂອງ ກະຊວງ ອຄ ທີ່ຈັດຕັ້ງປະຕິບັດຢູ່ຂັ້ນແຂວງ ແລະ ໄດ້ຮັບຜົນສຳເລັດທີ່ໜ້າພໍໃຈ ໂດຍສະເພາະແມ່ນ ກົນໄກປຶກສາຫາລື ລະຫວ່າງພາກລັດ ແລະ ທຸລະກິດ ເຊິ່ງກົນໄກດັ່ງກ່າວນີ້ກໍໄດ້ຖືກນຳໄປຜັນຂະຫຍາຍຢູ່ທາງພາກໃຕ້ຂອງລາວ ພາຍໃຕ້ໂຄງການຊ່ວຍເຫຼືອຂອງ USAID.
ກອງປະຊຸມລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການໃນໄລຍະ 6 ເດືອນທີ່ຜ່ານມາ ແລະ ຜ່ານການປະກອບຄຳເຫັນຢ່າງຫ້າວຫັນຂອງແຕ່ລະພາກສ່ວນ, ກອງປະຊຸມສາມາດກຳນົດແຜນບຸລິມະສິດຂອງ 6 ເດືອນທ້າຍປີ ໃນການປັບປຸງສະພາບແວດລ້ອມໃນການດຳເນີນທຸລະກິດ ແລະ ສ້າງຄວາມເຂັ້ມແຂງໃຫ້ກັບທຸລະກິດທີ່ກ່ຽວຂ້ອງ.
ກ່ອນປິດກອງປະຊຸມ ປະທານກອງປະຊຸມໄດ້ສະແດງຄວາມຂອບໃຈມາຍັງບັນດາໜ່ວຍງານຈັດຕັ້ງປະຕິບັດໂຄງການທັງ 3 ແຂວງ ແລະ ກົມ ຜຮ ທີ່ໄດ້ຮ່ວມມືກັນດຳເນີນກິດຈະກຳ ໃຫ້ບັນລຸເປົ້າໝາຍຂອງໂຄງການ, ພ້ອມກັນນັ້ນກໍຮຽກຮ້ອງໃຫ້ທຸກພາກສ່ວນ ຊ່ວຍກັນຊອກຫາແຫຼ່ງທຶນ ເພື່ອມາສືບຕໍ່ຊ່ວຍເຫຼືອທັງ 3 ແຂວງ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
