ກອງປະຊຸມເຜີຍແຜ່ບັນດານິຕິກຳ ແລະ ລະບຽບການ ທີໄດ້ຮັບການປັບປຸງໃຫ້ແກ່ພາກສ່ວນທຸລະກິດ ເພື່ອສະໜັບສະໜູນ ການຈັດຕັ້ງປະຕິບັດ ຄຳສັ່ງເລກທີ 02/ນຍ, ໂຄງການສົ່ງເສີມການຄວາມສາມາດ ໃນການແຂ່ງຂັນ ແລະ ການຄ້າ ເພື່ອປັບປຸງຄວາມສະດວກ ໃນການດຳເນີນທຸລະກິດຢູ່ ສປປ ລາວ
ໃນຕອນເຊົ້າວັນພຸດ, ວັນທີ 26 ມິຖຸນາ 2019 ທີນະຄອນຫລວງວຽງຈັນ, ສປປ ລາວ, ກະຊວງແຜນການ ແລະ ການລົງທຶນໄດ້ຈັດກອງປະຊຸມເຜີຍແຜ່ບັນດານິຕິກຳ ແລະ ລະບຽບການ ທີໄດ້ຮັບການປັບປຸງໃຫ້ແກ່ພາກສ່ວນທຸລະກິດ ເພື່ອສະໜັບສະໜູນການຈັດຕັ້ງປະຕິບັດ ຄຳສັ່ງເລກທີ 02/ນຍ.
ໃຫ້ກຽດເປັນປະທານ ໂດຍ ທ່ານ ອຸຕະແກ້ວ ແກ້ວດວງສິນ, ຫົວໜ້າກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ ແລະ ທ່ານ ນາງ ວາລີ ເວດຊະພົງ, ຮອງປະທານ ສະພາການຄ້າ ແລະ ອຸດສາຫະກຳ ແຫ່ງຊາດລາວ ເປີດກອງປະຊຸມ ແລະ ກ່າວຈຸດປະສົງ ຊຶ່ງວຽກງານດັ່ງກ່າວນີ້ໄດ້ລິເລີ່ມແຕ່ຕົ້ນປີ 2018 ເປັນຕົ້ນມາ, ຜ່ານການປະຕິບັດຕົວຈິງເຫັນວ່າບັນດາຂະແໜງການກ່ຽວຂ້ອງ ໄດ້ສຸມເຫື່ອເທແຮງ ເຂົ້າໃນການປັບປຸງບັນດານິຕິກຳ, ລະບຽບການ ແລະ ກົດໝາຍຕ່າງໆ ດ້ວຍຄວາມຮັບຜິດຊອບສູງ ເພື່ອເຮັດໃຫ້ສະພາບ ແວດລ້ອມການລົງທຶນຂອງ ສປປ ລາວ ມີຄວາມສະດວກງ່າຍດາຍ ໂດຍສະເພາະເພື່ອແນໃສ່ຫຼຸດອັນດັບຄວາມ ສະດວກໃນການດໍາເນີນທຸລະກິດ ໃຫ້ບັນລຸຕາມເປົ້າໝາຍ ຂອງລັດຖະບານທີ່ວາງໄວ້. ພາຍຫຼັງມີຄໍາສັ່ງເລກທີ 02/ນຍ, ກະຊວງແຜນການ ແລະ ການລົງທຶນ ໃນນາມເປັນໃຈກາງປະສານກັບຂະແໜງການກ່ຽວຂ້ອງ ກໍ່ໄດ້ເປັນເຈົ້າການນໍາພາ ໃນການຈັດຕັ້ງປະຕິບັດຫຼາຍກິດຈະກໍາ ເພື່ອປັບປຸງແກ້ໄຂຂອດຂັ້ນຫຍຸ້ງຍາກໃນບັນດາ 10 ຕົວຊີ້ວັດກ່ຽວກັບຄວາມສະດວກ ໃນການດໍາເນີນທຸລະກິດ ຢູ່ ສປປ ລາວ. ເອກະສານທີ່ໄດ້ຖືກນຳໃຊ້ໃນກອງປະຊຸມປະກອບມີ: 1. ບັນດານິຕິກຳ ແລະ ລະບຽບການທີ່ຕິດພັນກັບການປັບປຸງ ຕົວຊີ້ວັດອຳນວຍຄວາມສະດວກໃນການດຳເນີນທຸລະກິດ, 2. ດຳລັດວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະການສຳປະທານ ຂອງ ສປປ ລາວ, 3. ບົດແນະນຳວ່າດ້ວຍການໃຫ້ນະໂຍບາຍ ສົ່ງເສີມການລົງທຶນດ້ານພາສີ ແລະ ອາກອນມູນຄ່າເພີ່ມ ສຳລັບແຜນນຳເຂົ້າ ຂອງວິສາຫະກິດ ເລກທີ 01/ຄລທ.ສ ລົງວັນທີ 02 ມັງກອນ 2019.
ຜູ້ເຂົ້າຮ່ວມຈະຂະແໜງການທີ່ກ່ຽວຂ້ອງຊຶ່ງປກອບມີ ຜູ້ຕ່າງໜ້າຈາກ ບັນດາກະຊວງ ແລະ ກົມ ທີ່ກ່ຽວຂ້ອງກັບການຈັດຕັ້ງປະຕິບັດ ຄຳສັງ 02/ນຍ ແລະ ພາກທຸລະກິດທີ່ໃຫ້ບໍລິການດ້ານການປຶກສາການລົງທຶນ ແລະ ກົດໝາຍຈຳນວນ 25 ແຫ່ງ ຢູ່ນະຄອນຫລວງວຽງຈັນ.
ກອງປະຊຸມດັ່ງກ່າວ ແມ່ນໄດ້ຮັບການສະໜັບສະໜູນ ໂດຍຄູ່ຮ່ວມພັດທະນາໂຄງການສົ່ງເສີມ ຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ ຊຶ່ງມີເປົ້າໝາຍຫຼັກເພື່ອຫລຸດຜ່ອນ ແລະ ລົບລ້າງອຸປະສັກ ທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດພາກເອກະຊົນ ໂດຍໃຫ້ການຊ່ວຍເຫຼືອດ້ານວິຊາການ ແລະ ງົບປະມານ ເພື່ອປັບປຸງສະພາບແວດລ້ອມ ດ້ານລະບຽບກົດໝາຍ, ຫຼຸດຜ່ອນຕົ້ນທຶນໃນການຄ້າຂາຍ ແລະ ຍົກລະດັບຄວາມສາມາດການແຂ່ງຂັນ ຂອງຫົວໜ່ວຍທຸລະກິດ.
ໃນຕອນທ້າຍ ຂອງການປິດກອງປະຊຸມ, ປະທານ ກອງປະຊຸມ ໄດ້ມີຄໍາເຫັນຮ່ວມ ກັນໂດຍໄດ້ເນັ້ນທິດທາງໃນການປັບປຸງ ແລະ ແກ້ໄຂເພື່ອຮັບປະກັບການຈັດຕັ້ງປະຕິບັດ ຄຳສັງເລກທີ 02/ນຍ ໃຫ້ໄດ້ຮັບຜົນດີ ຊຶ່ງໄດ້ແກ່: ທິດທາງການແກ້ໄຂຄວາມຕ້ອງການ ທາງດ້ານການປະກອບເອກະສານ ເພື່ອຂໍສ້າງຕັ້ງທຸລະກິດ, ຂັ້ນຕອນການສັງລວມ ແລະ ວິເຄາະຜົນກະທົບກ່ຽວກັບກົດໝາຍພາສີອາກອນມູນຄ່າເພີ່ມ, ການບັງຄັບໃຊ້ກົດໝາຍ ແລະ ການແກ້ໄຂການລົ້ມລະລາຍ, ການສົ່ງເສີມນຳໃຊ້ຜະຫິດຕະພັນພາຍໃນປະເທດ, ການເປີດບັນຊີ ຂອງພາກທຸລະກິດບົນພື້ນຖານການໄດ້ຮັບໃບທະບຽນວິສາຫະກິດ, ຂໍ້ກຳນົດກິດຈະການທີ່ຢູ່ໃນບັນຊີຄວບຄຸມ ແລະ ການສຳປະທານ, ການຄວັດກາປະທັບ ຂອງວິສາຫະກິດ, ການປັບປຸງການເຊື່ອມຈອດດ້ານຂໍ້ມູນການຂໍສ້າງຕັ້ງທຸລະກິດໃນແຕ່ລະຂະແໜງການ, ການຂໍສ້າງຕັ້ງຫ້ອງການຜູ້ຕາງໜ້າ, ການຕິດຕາມ ແລະ ກວດກາໃບອະນຸຍາດ ແລະ ພັນທະການຊຳລະອາກອນ.
