ກອງປະຊຸມປຶກສາຫາລືລະຫວ່າງຂະແໜງການກ່ຽວຂ້ອງຂອງພາກລັດ ແລະ ພາກທຸລະກິດ

ກອງປະຊຸມໄດ້ຈັດຂື້ນໃນຕອນເຊົ້າ ຂອງວັນທີ 30/8/2019 ທີ່ໂຮງແຮມແລນມາກ ຣີເວີໄຊ ພາຍໃຕ້ການເປັນປະທານຂອງທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ປະທານຮ່ວມ ໂດຍ ທ່ານນາງ ວາລີ ເວດສະພົງ, ຮອງປະທານສະພາການຄ້າ ແລະ ອຸດສາຫະກໍາ ແຫ່ງຊາດລາວ ພ້ອມດ້ວຍຕົວແທນຈາກພາກລັດ ແລະ ພາກທຸລະກິດເຂົ້າຮ່ວມ. ກອງປະຊຸມດັ່ງກ່າວ ແມ່ນໜຶ່ງໃນບັນດາກອງປະຊຸມປຶກສາຫາລື ລະຫວ່າງ ຂະແໜງການກ່ຽວຂ້ອງຂອງພາກລັດ ແລະ ພາກທຸລະກິດ ເພື່ອກະກຽມໃຫ້ແກ່ການຈັດກອງປະຊຸມທຸລະກິດລາວ ຄັ້ງທີ 12 ທີ່ຄາດວ່າຈະຈັດຂື້ນໃນ ທ້າຍເດືອນ ຕຸລາ 2019 ນີ້ ໂດຍກອງປະຊຸມດັ່ງກ່າວ ໄດ້ປຶກສາຫາລື ບັນຫາບູລິມະສິດ ທີ່ຕິດພັນກັບການການກໍ່ຕັ້ງທຸລະກິດ ແລະ ການເນີນທຸລະກິດ ໃນສປປ ລາວ ທີ່ພາກທຸລະກິດຄັດເລືອກ ຜ່ານກົນໄກປຶກສາຫາລືພາຍໃຕ້ກອງປະຊຸມທຸລະກິດລາວ.

ໃນກອງປະຊຸມ ທ່ານ ສົມຈິດ ອິນທະມິດ ໄດ້ກ່າວວ່າ “ສຳລັບພາກລັດແລ້ວ, ໂດຍສະເພາະແມ່ນ ກະຊວງ ອຄ ພວກເຮົາຍາມໃດກໍ່ເຂົ້າໃຈວ່າ ທຸລະກິດທີ່ປະສົບຜົນສຳເລັດແມ່ນກໍ່ຕັ້ງ ແລະ ດຳເນີນໂດຍຜູ້ປະກອບການ, ໜ້າທີ່ຕົ້ນຕໍຂອງພາກລັດແມ່ນສ້າງເງື່ອນໄຂທີ່ອຳນວຍຄວາມສະດວກໃຫ້ແກ່ ການກໍ່ຕັ້ງ ແລະ ດຳເນີນທຸລະກິດບົນພື້ນຖານຂອງລະບຽບການຄຸ້ມຄອງ ທີ່ມີຄວາມໂປ່ງໃສ ແລະ ເປັນທຳ”. ທ່ານຍັງໄດ້ກ່າວຕື່ມອີກວ່າ “ເຖິງຢ່າງໃດກໍ່ຕາມ, ພວກເຮົາຍັງປະເຊີນກັບ ສິ່ງທ້າທາຍຫຼາຍຢ່າງໃນການຈັດຕັ້ງປະຕິບັດ ບັນດາລະບຽບກົດ ໝາຍໃໝ່ ທີ່ປະກາດໃຊ້ ໃນຂອບເຂດທົ່ວປະເທດ ເຊັ່ນ: ພວກເຮົາຍັງເຫັນຄວາມບໍ່ເປັນເອກະພາບ ລະຫວ່າງຂັ້ນສູນກາງ ແລະ ທ້ອງຖິ່ນ ແລະ ລະຫວ່າງທ້ອງຖິ່ນ ດ້ວຍກັນ ໃນການປະຕິບັດຂັ້ນຕອນ ການຈົດທະບຽນວິສາຫະກິດ ແລະ ຂໍອານຸຍາດດຳເນີນທຸລະກິດຕ່າງໆ, ການເກັບອາກອນ ນຳພາກທຸລະກິດ, ການປະຕິບັດລະບຽບການນຳເຂົ້າ ແລະ ສົ່ງອອກສິນຄ້າ ແລະ ອື່ນໆ. ສິ່ງເຫຼົ່ານີ້ ລ້ວນແລ້ວແຕ່ ເປັນການສ້າງອຸປະສັກໃຫ້ແກ່ການກໍ່ຕັ້ງ ແລະ ຂະຫຍາຍທຸລະກິດ ກໍ່ຄືການສ້າງວຽກເຮັດງານທຳ ແລະ ການລົບລ້າງຄວາມທຸກຍາກ.

ໃນຂົງເຂດການສົ່ງເສີມຄວາມເຂັ້ມແຂງຂອງພາກທຸລະກິດເຊັ່ນກັນ ຊຶ່ງຍັງມີຫຼາຍດ້ານທີ່ຕ້ອງໄດ້ຖອດຖອນບົດຮຽນ ແລະ ຊອກວິທີເພີ່ມປະສິດທິຜົນຂອງການຊ່ວຍເຫຼືອທີ່ມີຢູ່.”
ກອງປະຊຸມ ໄດ້ມີການນໍາສະເໜີ ຂໍ້ຫຍຸ້ງຍາກ ທີ່ຕິດພັນກັບການກໍ່ຕັ້ງ ແລະ ດໍາເນີນທຸລະກິດ ໃນ ສປປ ລາວ ແລະ ຮັບຟັງການປະກອບຄໍາເຫັນຈາກຂະແໜງການທີ່ກ່ຽວຂ້ອງ.