ກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການ ສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກ ຢູ່ 3 ແຂວງ ພາກເໜືອ ຄັ້ງທີ 2

ກອງປະຊຸມໄດ້ຈັດຂື້ນ ໃນວັນທີ 13 ກໍລະກົດ 2020 ທີ່ ແຂວງ ອຸດົມໄຊ ພາຍໃຕ້ການເປັນປະທານຂອງທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງ ອຸດສາຫະກຳ ແລະ ການຄ້າ ແລະ ປະທານຮ່ວມ ໂດຍ ທ່ານ ຄຳພຽງ ຢາຈົງວາ, ຮອງເຈົ້າແຂວງ ອຸດົມໄຊ ພ້ອມດ້ວຍຜູ້ເຂົ້າຮ່ວມຈຳນວນ 40 ກ່ວາທ່ານ,ຕາງໜ້າຈາກບັນດາກົມ, ຂະແໜງການພາຍໃນກະຊວງອຸດສາຫະກຳ ແລະ ການຄ້າ, ພະແນກອຸດສາຫະກຳ ແລະ ການຄ້າຈາກ 3 ແຂວງພາກເໜືອຄື: ອຸດົມໄຊ, ຫຼວງນໍ້າທາ ແລະ ຜົ້ງສາລີ ແລະ ສະພາການຄ້າ ແລະ ອຸດສາຫະກຳແຫ່ງຊາດລາວ ທັງສູນກາງ ແລະ 3 ແຂວງພາກເໜືອ ລວມທັງສູນຫັດຖະກຳ ອອກພົບຕົກ ຈາກແຂວງຫຼວງພະບາງ. ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອ ທົບທວນຄືນຄວາມຄືບໜ້າການຈັດຕັ້ງປະຕິບັດໂຄງການໃນໄລຍະ 6 ເດືອນຕົ້ນປີຜ່ານມາ ແລະ ວາງແຜນສຳລັບວຽກງານໃນ 6 ເດືອນຕໍ່ໜ້າ.

ປະທານກອງປະຊຸມ ທ່ານ ສົມຈິດ ອິນທະມິດ ໄດ້ເນັ້ນໃຫ້ເຫັນຄວາມໝາຍຄວາມສຳຄັນ ຂອງການເລືອກເອົາສາມແຂວງພາກເໜືອ ອຸດົມໄຊ, ຫຼວງນໍ້າທາ ແລະ ຜົ້ງສາລີ ເຂົ້າຮ່ວມໃນໂຄງການນີ້ ໂດຍທ່ານໄດ້ກ່າວວ່າ “ອີງໃສ່ທ່າແຮງດ້ານການຜະລິດຂອງແຕ່ລະແຂວງ, ພວກເຮົາຈຶ່ງໄດ້ປະສານສົມທົບກັບບັນດາພະແນກ ອຄ ແຂວງ ໃນການກຳນົດຜະລິດຕະພັນ ໂດຍເນັ້ນໃສ່ 3 ຜະລິດຕະພັນ ຄື: ສາລີຢູ່ອຸດົມໄຊ, ເຂົ້າຢູ່ຫລວງນ້ຳທາ ແລະ ຊາຢູ່ຜົ້ງສາລີ. ສ່ວນຫັດຖະກຳ ທີ່ພວກເຮົາຢາກສ້າງໃຫ້ມັນພົ້ນເດັ່ນ ແມ່ນຫັດຖະກຳຂອງທ້ອງຖິ່ນ, ຂອງຊົນເຜົ່າທີ່ເປັນເອກະລັກສະເພາະຂອງເຂົາເອງໂດຍນຳໃຊ້ທັກສະຂອງຄົນທ້ອງຖິ່ນ ຊຶ່ງພວກເຂົາສາມາດທີ່ຈະປັກແສ່ວ ແລ້ວຈຳໜ່າຍໃຫ້ກັບຜູ້ເກັບຊື້ທີ່ເຂົ້າຮ່ວມໂຄງການນີ້ ແລະ ຍັງສາມາດຈຳໜ່າຍກັບທີ່ພາຍໃນທ້ອງຖິ່ນໃຫ້ກັບນັກທ່ອງທ່ຽວ ແລະ ຜູ້ສົນໃຈອື່ນໆໄດ້.”

ທ່ານປະທານຮ່ວມ ຄຳພຽງ ຢາຈົງວາ ກໍ່ໄດ້ມີຄຳເຫັນໃນທີ່ປະຊຸມວ່າ “ແຂວງອຸດົມໄຊພວກເຮົາ ມີຄວາມຍິນດີທີ່ທາງສູນກາງ ກໍ່ຄືກະຊວງອຸດສາຫະກຳ ແລະ ການຄ້າໄດ້ເລືອກເອົາແຂວງອຸດົມໄຊ ເປັນເຈົ້າພາບຮ່ວມຈັດກອງປະຊຸມຂອງໂຄງການ ຄັ້ງທີ 2 ໃນມື້ນີ້ ແລະ ຂໍສະແດງຄວາມຂອບໃຈທີ່ທາງກະຊວງໄດ້ໃຫ້ຄວາມສຳຄັນລົງມາຍ້ຽມຍາມຖາມຂ່າວ, ແລະ ມາໃຫ້ທິດເຍືອງທາງ; ໂດຍສະເພາະແມ່ນພະນັກງານຢູ່ ພະແນກອຸດສາຫະກໍາ ແລະ ການຄ້າແຂວງພວກເຮົາ ແລະ ພ້ອມກັນນີ້ທາງຂັ້ນເທິງໂດຍສະເພາະ ກະຊວງອຸດສາຫະກໍາ ແລະ ການຄ້າກໍ່ໄດ້ຍາດແຍ່ງແຫລ່ງທຶນຊ່ວຍເຫຼືອຈາກອົງກອນຜູ້ໃຫ້ທຶນ ສ້າງເປັນໂຄງການຮ່ວມໃນ 3 ແຂວງພາກເໜືອຂອງພວກເຮົາ ເພື່ອຍົກລະດັບຄວາມອາດສາມາດດ້ານການຜະລິດ ເພື່ອສົ່ງອອກຂອງຜະລິດຕະພັນຕົ້ນຕໍຂອງແຕ່ລະ. ພວກເຮົາກໍ່ເຂົ້າໃຈວ່າ ຫັດຖະກຳ ກໍ່ເປັນໜຶ່ງໃນເປົ້າໝາຍຂອງໂຄງການທີ່ໄດ້ຊຸກຍູ້ໃຫ້ປະຊາຊົນໃນ 6 ໝູ່ບ້ານ ໃນ 3 ແຂວງ ໃຫ້ສືບຕໍ່ຮັກສາສີໄມ້ລາຍມືດ້ານປັກແສ່ວຂອງບັນດາເຜົ່າຄົງຢູ່ຕະຫຼອດໄປ ແລະ ສິ່ງສຳຄັນກໍ່ຄືໃຫ້ປະຊາຊົນໃນກຸ່ມບ້ານເປົ້າໝາຍດັ່ງກ່າວ ສາມາດມີລາຍຮັບເພີ່ມເຕີມ ແລະ ປັບປຸງຊີວິດການເປັນຢູ່ໃຫ້ດີຂຶ້ນອີກ. ນອກຈາກນັ້ນ, ຂໍຮຽກຮ້ອງມາຍັງບັນດາທ່ານໂດຍສະເພາະ ແມ່ນສະພາການຄ້າ ແລະ ອຸດສາຫະກຳແຫ່ງຊາດ ແລະ ແຂວງຊ່ວຍປະສານສົບທົບກັບ ບັນດາຂະແໜງການທີ່ກ່ຽວຂ້ອງ ໃນການຊ່ວຍເຫຼືອຂະແໜງການອື່ນໆອີກຕື່ມ ເພື່ອຊ່ວຍໃຫ້ປະຊາຊົນມີວຽກເຮັດງານທຳ ໃນຂະແໜງການຜະລິດສິນຄ້າເພື່ອສົ່ງອອກ.”
ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ 3 ແຂວງພາກເໜຶອ ຫລື ECL ແມ່ນຖືກອອກແບບມາ ເພື່ອສົ່ງເສີມພາກທຸລະກິດ ໃຫ້ເປັນແຮງພັກດັນໃນການພັດທະນາເສດຖະກິດ-ສັງຄົມແຫ່ງຊາດ ໂດຍສະເພາະແຜນພັດທະນາເສດຖະກິດຂອງບັນດາແຂວງໃນພາກເໜືອ ເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ 8 ທີ່ມີເປົ້າໝາຍ ເຮັດໃຫ້ເສດຖະກິດເຕີບໂຕຢ່າງເຂັ້ມແຂງ, ເທົ່າທຽມ ແລະ ຍືນຍົງ. ເພື່ອບັນລຸເປົ້າໝາຍດັ່ງກ່າວ ຮຽກຮ້ອງໃຫ້ມີການເພີ່ມທະວີຄວາມຫຼາກຫຼາຍທາງດ້ານປັດໃຈ ທີ່ຕອບສະໜອງການຂະຫຍາຍຕົວຂອງເສດຖະກິດຮອບດ້ານ, ໃຫ້ຫຼຸດພົ້ນຈາກການເພິ່ງພາຂະແໜງຊັບພະຍາກອນທຳມະຊາດ ແລະ ຫຼຸດຜ່ອນຄວາມແຕກໂຕນໃນການພັດທະນາລະຫວ່າງທ້ອງຖິ່ນ ແລະ ສູນກາງ. ໂຄງການນີ້ ຈະຊ່ວຍຊຸກຍູ້ ໃນການພັດທະນາຂະແໜງການຄ້າ ແລະ ພາກທຸລະກິດ, ໂດຍສະເພາະການປັບປຸງ ສະພາບແວດລ້ອມທີ່ເອື້ອອຳນວຍ ໃຫ້ແກ່ການດຳເນີນທຸລະກິດ ແລະ ການສົ່ງເສີມຄວາມສາມາດໃນການແຂ່ງຂັນ ຂອງ ບັນດາຫົວໜ່ວຍທຸລະກິດໃນ ສປປ ລາວ.