ກະຊວງອຸດສະຫະກໍາ ແລະ ການຄ້າ ໄດ້ມອບໃບຍ້ອງຍໍໃຫ້ແກ່ ນັກເສດຖະສາດດ້ານການຄ້າອາຍຸໂສ ປະຈໍາ ທະນາຄານໂລກ
ນະຄອນຫຼວງວຽງຈັນ, ວັນທີ 01 ເດືອນ ກັນຍາ 2022, ກະຊວງອຸດສະຫະກໍາ ແລະ ການຄ້າ ໄດ້ມອບໃບຍ້ອງຍໍໃຫ້ແກ່ ທ່ານ ມອມເບີດ ຮັອບ (Mr. Mombert Hoppe), ນັກເສດຖະສາດດ້ານການຄ້າອາວຸໂສ ປະຈໍາ ທະນາຄານໂລກໃນ ສປປ ລາວ. ທ່ານ ຮັອບ ໄດ້ຈັດຕັ້ງປະຕິບັດວຽກງານເປັນເວລາ 5 ປີ, ເລີ່ມແຕ່ ວັນທີ 01 ກໍລະກົດ 2015 ເຖິງ 30 ສິງຫາ 2020. ໜ້າທີ່ຫຼັກຂອງຜູ້ກ່ຽວແມ່ນ ໃຫ້ການປຶກສາ ແລະ ສະໜັບສະໜູນ ສປປ ລາວ ໃນຂົງເຂດວຽກງານທີ່ຕິດພັນກັບການຄ້າ ແລະ ຄວາມສາມາດການແຂ່ງຂັນ. ຕະຫຼອດໄລຍະເວລາ 5 ປີນີ້, ຜູ້ກ່ຽວໄດ້ສະໜັບສະໜູນການຈັດຕັ້ງປະຕິບັດໂຄງການ ພັດທະນາການຄ້າ ໄລຍະສອງ (TDF 2) ໂດຍມີເປົ້າໝາຍຫຼັກແມ່ນສະໜັບສະໜູນການຈັດຕັ້ງປະຕິບັດແຜນພັດທະນາການຄ້າ ແລະ ພາກທຸລະກິດ 2013-2018. ຜູ້ກ່ຽວຍັງສະໜັບສະໜູນການຈັດຕັ້ງປະຕິບັດໂຄງການເຂົ້າຫາແຫຼ່ງທຶນ ສໍາລັບ ວິສາຫະກິດຂະໜາດນ້ອຍ ແລະ ຂະໜາດກາງ (SME’s Access to Finance), ຊຶ່ງໂຄງການດັ່ງກ່າວແມ່ນສະໜັບສະໜູນການເຂົ້າຫາແຫຼ່ງທຶນໄລຍະຍາວສໍາລັບ ວິສາຫະກິດຂະໜາດນ້ອຍ ແລະ ຂະໜາດກາງ. ນອກຈາກນີ້, ຜູ້ກ່ຽວຍັງເປັນເຈົ້າການໃນການກະກຽມ ແລະ ລະດົມທຶນສໍາລັບໂຄງການສົ່ງເສີມຄວາມສາມາດການແຂ່ງຂັນ ແລະ ການຄ້າຂອງ ສປປ ລາວ (LCT), ຊຶ່ງມີເປົ້າໝາຍຫຼັກໃນການສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການຄ້າ ແລະ ການລົງທຶນ, ແລະ ສົ່ງເສີມສະມັດຕະພາບການແຂ່ງຂັນຂອງພາກທຸລະກິດ. ນອກຈາກນີ້, ຜູ້ກ່ຽວກໍເປັນເຈົ້າການໃນການດໍາເນີນສຶກສາຄົ້ນຄວ້າກ່ຽວກັບທ່າແຮງ, ອຸປະສັກ ຫຼື ສິ່ງກີດຂວາງ ທີ່ມີຕໍ່ການພັດທະນາວຽກງານການຄ້າ ແລະ ທຸລະກິດໃນບັນດາຂະແໜງການ ທີ່ບໍ່ເອື່ອຍອີງໃສ່ຊັບພະຍາກອນທໍາມະຊາດ ເຊັ່ນ: ບົດສຶກສາກ່ຽວກັບທ່າແຮງຂອງການສົ່ງເສີມການຄ້າ ເອເລັກໂຕນິກ; ບົດສຶກສາກ່ຽວກັບການສົ່ງເສີມການຜະລິດເຂົ້າ ແລະ ຜັັກເປັນສິນຄ້າ; ບົດສຶກສາກ່ຽວກັບອຸປະສັກຕໍ່ການດຳເນີນທຸລະກິດ ຍ້ອນການແຂ່ງຂັນທີ່ບໍ່ເປັນທຳຈາກທຸລະກິດນອກລະບົບ; ບົດສຶກສາກ່ຽວກັບປະສິດທິຜົນຂອງ ຂະແໜງຂົນສົ່ງ ແລະ ໂລຈີສຕິກ ຂອງລາວ; ທ່າແຮງຂອງທາງລົດໄຟລາວ-ຈີນຕໍ່ການພັດທະນາເສດຖະກິດໂດຍລວມ; ປະກອບສ່ວນເຂົ້າໃນບົດປະເມີນສະພາບເສດຖະກິດໂດຍລວມທຸກ 06 ເດືອນ.
ຈາກການປະກອບສ່ວນໃນວຽກງານທີ່ໄດ້ກ່າວມາຂ້າງເທິງນີ້, ທາງກົມ ຜຮ ຈຶ່ງໄດ້ ຕາງໜ້າກະຊວງ ອຸດສະຫະກໍາ ແລະ ການຄ້າ ມອບໃບຍ້ອງຍໍຂັ້ນກະຊວງ ເພື່ອເປັນການສັນລະເສີນຄຸນງາມຄວາມດີ, ຈົດຈຳບຸນຄຸນ ແລະ ຜົນງານການຈັດຕັ້ງທີ່ດີເດັ່ນ ທີ່ໄດ້ປະກອບສ່ວນເຂົ້າໃນການພັດທະນາຂະແໜງອຸດສະຫະກຳ ແລະ ການຄ້າຕະຫລອດໄລຍະ 5 ປີ ທີ່ຜູ້ກ່ຽວໄດ້ຮັບໜ້າທີ່.
