ທີມງານ BAF II ໄປຢ້ຽມຢາມບັນດາບໍລິສັດທີ່ໄດ້ຮັບການສະໜັບສະໜູນຈາກທຶນ BAF II
ນະຄອນຫຼວງວຽງຈັນ, ວັນທີ 25 ເດືອນ ກັນຍາ 2020, ທີມງານຈັດຕັ້ງປະຕິບັດທຶນສົມທົບເພື່ອສົ່ງເສີມທຸລະກິດ ໄລຍະສອງ (BAF II) ໄດ້ໄປຢ້ຽມຢາມສາມບໍລິສັດທີ່ໄດ້ຮັບການສະໜັບສະໜູນຈາກທຶນສົມທົບດັ່ງກ່າວ. ການໄປຢ້ຽມຢາມໃນຄັ້ງນີ້ໄດ້ນໍາພາໂດຍ ທ່ານ ໂທມັສ ຄາ, ເລຂາສອງ (ເສດຖະກິດ ແລະ ການຄ້າ) ຈາກສະຖານທູດອົດສະຕຣາລີ ປະຈໍາລາວ, ພ້ອມດ້ວຍຄະນະເຊິ່ງປະກອບດ້ວຍຜູ້ຈັດການໂຄງການ (ເສດຖະກິດ ແລະ ການຄ້າ) ແລະ ເຈົ້າໜ້າທີ່ຮັບຜິດຊອບວຽກງານສື່ສານ. ຜູ້ຕາງໜ້າຈາກທີມງານຈັດຕັ້ງປະຕິບັດທຶນ BAF II ຜູ້ທີ່ເຮັດວຽກຕິດພັນກັບທັງສາມບໍລິສັດໂດຍກົງ ພ້ອມດ້ວຍ ຜູ້ປະສານງານໂຄງການທຶນ BAF II ຈາກຫ້ອງການ NIU ກໍໄປຢ້ຽມຢາມເຊັ່ນດຽວກັນ.
ຈຸດປະສົງຂອງການຢ້ຽມຢາມໃນຄັ້ງນີ້ແມ່ນເພື່ອສຶກສາການດໍາເນີນກິດຈະການຂອງທັງສາມບໍລິສັດ, ຜົນສໍາເລັດຈາກການປະກອບສ່ວນຂອງທຶນສົມທົບເຂົ້າກັບກິດຈະກໍາການຂະຫຍາຍຕົວຂອງທຸລະກິດ ແລະ ວິທີທີ່ບັນດາທຸລະກິດປັບຕົວເຂົ້າກັບສະພາບການລະບາດພະຍາດ ໂຄວິດ-19 ໃນປະຈຸບັນ.
ທຸລະກິດທໍາອິດທີ່ທາງທີມງານໄດ້ຢ້ຽມຢາມແມ່ນ ປາວານ ຟາມ, ເປັນທຸລະກິດກະສິກໍາຂະໜາດນ້ອຍທີ່ບໍລິຫານໂດຍນັກທຸລະກິດຍິງ 100%, ເຊິ່ງຕັ້ງຢູ່ບ້ານໂຊກໃຫຍ່, ເມືອງໄຊເສດຖາ, ນະຄອນຫຼວງວຽງຈັນ. ປາວານ ຟາມ ເປັນທຸລະກິດທີ່ປູກຜັກປອດສານພິດສະໜອງໃຫ້ກັບຕະຫຼາດພາຍໃນ, ທັງຂາຍສົ່ງໃຫ້ແກ່ຫ້າງສັບພະສິນຄ້າ ພາກຊັນ ແລະ ວິວມໍ ແລະ ຂາຍຍ່ອຍໃຫ້ກັບຜູ້ເຂົ້າມາຢ້ຽມຊົມຟາມ. ຟາມດັ່ງກ່າວໄດ້ຂໍທຶນສົມທົບເພື່ອສໍາຫຼວດ ແລະ ອອກແບບຟາມ, ພ້ອມກັບຝຶກອົບຮົມຫຼັກສູດ “Keiei-Juku program” ສໍາລັບທີມງານບໍລິຫານຟາມ. ຖ້າຟາມສໍາເລັດການຈັດຕັ້ງປະຕິບັດກິດຈະກໍາແລ້ວ, ທາງຟາມຄາດວ່າຈະສາມາດດຶງດູດຜູ້ຢ້ຽມຊົມຟາມໄດ້ຫຼາຍຂຶ້ນ ແລະ ຊ່ວຍໃຫ້ທີມງານບໍລິຫານ, ລວມທັງເຈົ້າຂອງຟາມເອງ, ເຂົ້າໃຈບັນຫາວຽກງານການບໍລິຫານ ແລະ ຫາວິທີແກ້ໄຂໃຫ້ທັນເວລາ. ໃນລະຫວ່າງການລະບາດພະຍາດ ໂຄວິດ-19 ນີ້, ຟາມຍັງສາມາດດໍາເນີນກິດຈະການໄດ້ຢູ່, ແລະ ຄວາມຕ້ອງການກໍເພີ່ມຂຶ້ນເລື້ອຍໆເຮັດໃຫ້ຟາມຍັງບໍ່ສາມາດສະໜອງສິນຄ້າໃຫ້ໄດ້ຕາມຄວາມຕ້ອງການຂອງຕະຫຼາດ.
ທຸລະກິດທີສອງທີີ່ທາງທີມງານໄດ້ຢ້ຽມຢາມແມ່ນ ໂຮງງານ ຜະລິດທໍ່ນໍ້າ ໂຕໂຢ, ເປັນໂຮງງານຜະລິດທໍ່ນໍ້າ PVC ແລະ ທໍ່ນໍ້າປຣາສະຕິກ, ເຊິ່ງສ້າງຕັ້ງຕັ້ງແຕ່ປີ 2016. ໂຮງງານໄດ້ສະໜອງທໍ່ນໍ້າໃຫ້ກັບຕະຫຼາດພາຍໃນ, ທັງໃນຊ່ອງທາງການຈໍາໜ່າຍລະຫວ່າງທຸລະກິດ ແລະ ຜູ້ຊົມໃຊ້, ແລະ ລະຫວ່າງທຸລະກິດນໍາກັນ. ໂຮງງານໄດ້ຂໍທຶນສົມທົບເພື່ອປັບປຸງເຄື່ອງມືທາງການຕະຫຼາດ ແລະ ປັບປຸງລະບົບການບໍລິຫານຊັບພະຍາກອນຂອງບໍລິສັດ. ສ່ວນການຮັບມືກັບການລະບາດພະຍາດ ໂຄວິດ-19, ເມື່ອໂຮງງານໄດ້ຍິນກ່ຽວກັບພະຍາດດັ່ງກ່າວຈາກປະເທດ ສປ ຈີນ, ໂຮງງານກໍເລີ່ມກະກຽມສ້າງຫໍພັກໃຫ້ກັບພະນັກງານພ້ອມກັບສິ່ງອໍານວຍຄວາມສະດວກຕ່າງໆໃນການໃຊ້ຊີວິດໃນໂຮງງານ ແລະ ຄວາມປອດໄພທາງດ້ານສຸຂະພາບ ແລະ ຫ້າມໃຫ້ພະນັກງານເດີນທາງອອກນອກແຂວງ ແລະ ນໍາໃຊ້ນະໂຍບາຍການຫ້າມເດີນທາງຂອງລັດຖະບານ. ດັ່ງນັ້ນ, ການຜະລິດໃນຊ່ວງການລະບາດພະຍາດ ໂຄວິດ-19 ກໍຍັງສາມາດດໍາເນີນໄປຕາມປົກກະຕິ.
ທຸລະກິດທີສາມທີ່ທາງທີມງານໄດ້ຢ້ຽມຢາມແມ່ນ ໂຮງງານ ຕັດຫຍິບ Diep Vu, ເປັນໂຮງງານຕັດຫຍິບຂະໜາດໃຫຍ່ທີ່ຕັດຫຍິບເຄື່ອງແບບ ແລະ ເຄື່ອງນຸ່ງເພື່ອປ້ອງກັນຄວາມປອດໄພເພື່ອສົ່ງອອກໄປທີ່ປະເທດອັງກິດ ແລະ ບັນດາປະເທດໃນສະຫະພາບເອີຣົບ. ທຸລະກິດປະເຊີນກັບບັນຫາໃນການຜະລິດໃຫ້ສອດຄ່ອງກັບຄວາມຕ້ອງການ ແລະ ຊອກຫາວິທີທາງໃນການແກ້ໄຂປະສິດທິຜົນຂອງການຜະລິດ. ດັ່ງນັ້ນຈຶ່ງຂໍທຶນສົມທົບຈາກທຶນ BAF II ເພື່ອຊ່ວຍແກ້ໄຂບັນຫາດ້ານວິຊາການດັ່ງກ່າວໂດຍການຝຶກອົບຮົມ ແລະ ການຮັບຮອງການຜະລິດແບບ Yellow Belt. ໃນລະຫວ່າງການລະບາດພະຍາດ ໂຄວິດ-19, ໂຮງງານກໍໄດ້ຢຸດກິດຈະການຕາມນະໂຍບາຍຂອງລັດຖະບານໄດ້ວາງອອກ ແລະ ພະຍາຍາມຈັດຕັ້ງການຝຶກອົບຮົມຜ່ານລະບົບ ອອນລາຍ ແຕ່ກໍບໍ່ປະສົບຜົນສໍາເລັດ. ດັ່ງນັ້ນ, ທາງໂຮງງານຈຶ່ງຂໍໃຫ້ທາງທີມງານ BAF II ຊ່ວຍດັດແກ້ສັນຍາເພື່ອຢຸດກິດຈະກໍາການຝຶກອົບຮົມ ແລະ ຈະດໍາເນີນການໃໝ່ເມື່ອຊ່ຽວຊານສາມາດເດີນທາງໄດ້.
ຫຼັງຈາກການຢ້ຽມຢາມທັງສາມບໍລິສັດ, ທີມງານທັງໝົດກໍເຫັນວ່າທັງສາມບໍລິສັດມີວິທີການຮັບມືກັບການລະບາດພະຍາດ ໂຄວິດ-19 ທີ່ແຕກຕ່າງກັນອີງໃສ່ປະເພດທຸລະກິດຂອງບໍລິສັດ. ໃນຂະນະດຽວກັນ, ການລະບາດພະຍາດ ໂຄວິດ-19 ບໍ່ໄດ້ຫຼຸດຄວາມຕ້ອງການຂອງຜະລິດຕະພັນຂອງບໍລິສັດ ແລະ ເຈົ້າຂອງທຸລະກິດກໍມີຄວາມກະຕືລືລົ້ນໃນການພັດທະນາທຸລະກິດຂອງຕົນ. ເນື່ອງຈາກນະໂຍບາຍການຫ້າມເດີນທາງ, ພວກເຂົາຈຶ່ງໃຊ້ບໍລິການຂອງຜູ້ສະໜອງການບໍລິການທາງວິຊາການພາຍໃນປະເທດ. ໃນກໍລະນີທີ່ກິດຈະກໍາຈໍາເປັນຕ້ອງໃຫ້ຊ່ຽວຊານຈາກຕ່າງປະເທດຊ່ວຍ, ພວກເຂົາເລືອກທີ່ຈະຊອກຫາທາງເລືອກອື່ນໆ ຫຼື ຢຸດກິດຈະກໍາຊົ່ວຄາວ.
ທຶນສົມທົບເພື່ອສົ່ງເສີມທຸລະກິດ (BAF II) ເປັນໂຄງການພາຍໃຕ້ເສົາຄໍ້າ C ຂອງໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ. ຈຸດປະສົງຂອງໂຄງການ BAF II ແມ່ນເພື່ອສະໜັບສະໜູນບັນດາບໍລິສັດເອກະຊົນ ແລະ ວິສາຫະກິດຂະໜາດນ້ອຍ ແລະ ກາງໃນການພັດທະນາທັກສະ ແລະ ວິຊາການ ເພື່ອໃຫ້ກາຍເປັນບໍລິສັດທີ່ມີຄວາມອາດສາມາດໃນການແຂ່ງຂັນທັງພາຍໃນ, ພາກພື້ນ ແລະ ສາກົນ.
