ກະຊວງ ແຜນການ ແລະ ການຮ່ວມມື ໄດ້ຈັດກອງປະຊຸມເຜີຍແຜ່ຄວາມຄືບໜ້າການຈັດຕັ້ງປະຕິບັດ ຄໍາສັ່ງເລກທີ 02/ນຍ ວ່າດ້ວຍ ການປັບປຸງບັນດາລະບຽບການ ແລະ ກົນໄກປະສານງານ ໃນການດໍາເນີນທຸລະກິດ ຢູ່ ສປປ ລາວ
ວັນທີ 12 ພະຈິກ 2020 ຜ່ານມາ, ກົມສົ່ງເສີມການລົງທຶນ, ກະຊວງ ແຜນການ ແລະ ການລົງທຶນ ໄດ້ຈັດກອງປະຊຸມເຜີຍແຜ່ຄວາມຄືບໜ້າໃນການຈັດຕັ້ງປະຕິບັດ ຄໍາສັ່ງເລກທີ 02/ນຍ ວ່າດ້ວຍ ການປັບປຸງບັນດາລະບຽບການ, ກົນໄກປະສານງານ ໃນການດໍາເນີນທຸລະກິດ ຢູ່ ສປປ ລາວ ແລະ ແຜນດໍາເນີນງານ ປີ 2020-2022 ເພື່ອປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດ ຢູ່ ສປປ ລາວ, ຢູ່ເມືອງປາກເຊ ແຂວງຈໍາປາສັກ.
ພາຍໃຕ້ການເປັນປະທານ ຂອງ ທ່ານ ປອ. ພອນໄຊ ວິໄລສັກ, ຮອງຫົວໜ້າກົມສົ່ງເສີມການລົງທຶນ, ກະຊວງ ແຜນການ ແລະ ການລົງທຶນ, ກອງປະຊຸມ ໄດ້ລາຍງານ ຄວາມຄືບໜ້າຂອງການປັບປຸງ ສະພາບແວດລ້ອມ ການດຳເນີນທຸລະກິດໃນ ສປປ ລາວ ໂດຍສະເພາະ ບັນດານິຕິກຳຕ່າງໆ ທີ່ຕິດພັນກັບການປັບປຸງ 10 ຕົວຊີ້ວັດ ໃນການດຳເນີນທຸລະກິດຂອງບົດລາຍງານຄວາມສະດວກໃນການດຳເນີນທຸລະກິດ ຂອງທະນາຄານໂລກ ໃນໄລຍະ 1 ປີທີ່ຜ່ານມາ ແລະ ແຜນດໍາເນີນງານ 2020 – 2022 ທີ່ຮັບຮອງໂດຍຄະນະນຳກະຊວງທີ່ກ່ຽວຂ້ອງ. ໂດຍລວມແລ້ວ ການປັບປຸງບັນດາຕົວຊີ້ວັດ ຕ່າງໆ ໃນການດຳເນີນທຸລະກິດ ເຫັນວ່າມີຄວາມຄືບໜ້າສົມຄວນ ໃນນັ້ນ, ຕົວຊີ້ວັດທີ່ມີຄວາມຄືບໜ້າຫຼາຍກວ່າໝູ່ ແມ່ນຕົວຊີ້ວັດທີ 1: ການເລີ່ມຕົ້ນທຸລະກິດ ໂດຍໄດ້ສໍາເລັດການຫຼຸດເວລາຈາກ 173 ວັນມາເປັນ 17 ວັນ ແລະ ຫລຸດຂັ້ນຕອນຈາກ 9 ຂັ້ນຕອນຍັງເຫລືອ 3 ຂັ້ນຕອນ. ຄວາມຄືບໜ້າອື່ນໆ ຂອງຕົວຊີ້ວັດ 2: ການຂໍອະນຸຍາດປຸກສ້າງ ກໍ່ໄດ້ຫຼຸດໄລຍະເວລາລົງ, ຂັ້ນຕອນ ແລະ ປັບປຸງການເຂົ້າເຖິງແຫຼ່ງຂໍ້ມູນ, ເຊິ່ງສາມາດດາວໂຫຼດແບບຟອມຈາກເວັບໄຊ. ຕົວຊີ້ວັດທີ 3: ການຂໍຕິດຕັ້ງໄຟຟ້າ ບໍ່ຈໍາເປັນຕ້ອງໄດ້ເຊັນ ຮັບອະນຸຍາດຈາກຂ້ັນບ້ານ. ຕົວຊີ້ວັດທີ 4: ການຂຶ້ນນທະບຽນຊັບສິນ ກໍ່ມີການຫັນປ່ຽນເທື່ອລະກ້າວ ເຂົ້າສູ່ການເປັນລະບົບຖານຂໍ້ມູນດິຈິຕັອນ, ຕົວຊີ້ວັດທີ 6: ການປົກປ້ອງຜູ້ລົງທຶນລາຍຍ່ອຍ ກໍ່ໄດ້ຮັບການຢັ້ງຢືນລະບຽບການແລ້ວ, ຕົວຊີ້ວັດທີ 7: ການຊໍາລະອາກອນໄດ້ສໍາເລັດການປັບປຸງກົດໝາຍອາກອນທີ່ສໍາຄັນ 3 ສະບັບ ແລະ ໄດ້ຖືກປະກາດໃຊ້ໃນຕົ້ນປີ 2020, ຕົວຊີ້ວັດທີ 8: ໄດ້ຕັດຂັ້ນຕອນການອອກໃບຢັ້ງຢືນນໍາເຂົ້າຊີ້ນສ່ວນພາຫະນະເພື່ອຜະລິດ ແລະ ປະກອບຢູ່ໂຮງງານ ແລະ ຕັດຂັ້ນຕອນການອອກໃບອະນຸຍາດສົ່ງອອກ ແລະ ນໍາເຂົ້າແຮ່ທາດ, ສໍາເລັດສ້າງຕັ້ງໜ່ວຍງານສໍາຫລວດ ດໍາເນີນການສຶກສາເວລາກວດປ່ອຍສິນຄ້າ ຢູ່ບັນດາດ່ານພາສີຊາຍແດນ ປີ 2020 (Time Release Study “TRS”).
ໃນຕອນທ້າຍ ຂອງການປິດກອງປະຊຸມ, ທ່ານປະທານກອງປະຊຸມ ໄດ້ຮຽກຮ້ອງເຖິງພາກທຸລະກິດ ແລະ ຂະແໜງການທີ່ກ່ຽວຂ້ອງໃນທຸກຂັ້ນ ແຕ່ສູນກາງຮອດທ້ອງຖິ່ນ ສືບຕໍ່ເອົາໃຈໃສ່ປັບປຸງບັນຍາກາດໃນການດໍາເນີນທຸລະກິດ ຢູ່ ສປປ ລາວ ໃຫ້ມີຄວາມສະດວກຂຶ້ນ, ໂດຍຫຼຸດຜ່ອນຂັ້ນຕອນ, ເວລາ ແລະ ຄ່າໃຊ້ຈ່າຍໃນການອອກອະນຸຍາດຕ່າງໆ ເພື່ອແນ່ໃສ່ດຶງດູດເອົາການລົງທຶນຂອງພາກເອກະຊົນທັງພາຍໃນ ແລະ ຕ່າງປະເທດທີ່ມີຄຸນນະພາບ ແລະ ສ້າງຂີດຄວາມອາດສາມາດໃນການແຂ່ງຂັນຂອງທຸລະກິດໃຫ້ສູງຂຶ້ນ ເພື່ອສ້າງພື້ນຖານເສດຖະກິດແຫ່ງຊາດ ໃຫ້ເຕີບໂຕຕາມທິດຍືນຍົງ ແລະ ສີຂຽວ ທີ່ລະບຸໄວ້ໃນມະຕິຂອງກອງປະຊຸມໃຫຍ່ຄັ້ງທີ 10 ຂອງພັກ. ສືບຕໍ່ຈັດຕັ້ງປະຕິບັດ ແລະ ຜັນຂະຫຍາຍ ແຜນດໍາເນີນງານ 2020 – 2022 ໃຫ້ໄດ້ຮັບຜົນດີ ແລະ ສົມບູນຍິ່ງຂຶ້ນທາງດ້ານການປັບປຸງລະບຽບການ ແລະ ກົນໄກການປະສານງານ ເພື່ອອໍານວຍຄວາມສະດວກ ການດຳເນີນທຸລະກິດ ຢູ່ ສປປ ລາວ.
ກອງປະຊຸມ ດັ່ງກາວ ໄດ້ຮັບການສະໜັບສະໜູນໂດຍ ໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project – LCT) ໃຫ້ທຶນໂດຍທະນາຄານໂລກ, ລັດຖະບານ ອົດສະຕາລີ, ລັດຖະບານ ໄອແລນ ແລະ ລັດຖະບານ ອາເມຣິກາ ເຊິ່ງມີເປົ້າໝາຍຫຼັກໃນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫ່ຍຂະຫຍາຍຕົວຂອງທຸລະກິດ ໂດຍໃຫ້ການຊ່ວຍເຫຼືອທາງດ້ານວິຊາການ ແລະ ງົບປະມານ ເພື່ອປັບປຸງສະພາບແວດລ້ອມ ດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າຂາຍ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
