ກົມແຜນການ ແລະ ການຮ່ວມມືຈັດ ກອງປະຊຸມຝຶກອົບຮົມ ວ່າດ້ວຍວຽກງານບົດບາດຍິງ-ຊາຍຕໍ່ກັບການຄ້າ ແລະ ການພັດທະນາ ແລະ ແຜນການຈັດຕັ້ງປະຕິບັດ ບົດບາດຍິງ-ຊາຍພາຍໃຕ້ ໂຄງການ LCT

ນະຄອນຫຼວງວຽງຈັນ, ວັນທີ 20 ພະຈິກ 2020, ກົມແຜນການ ແລະ ການຮ່ວມມື, ກະຊວງອຸດສະຫະກໍາ ແລະ ການຄ້າໄດ້ຈັດກອງປະຊຸມຝຶກອົບຮົມ ວ່າດ້ວຍ ວຽກງານບົດບາດຍິງ-ຊາຍ ຕໍ່ກັບ ການຄ້າ ແລະ ການພັດທະນາ ແລະ ແຜນການຈັດຕັ້ງປະຕິບັດ ບົດບາດຍິງ-ຊາຍພາຍໃຕ້ໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ຂຶ້ນ. ກອງປະຊຸມຝຶກອົບຮົມດັ່ງກ່າວມີຜູ້ເຂົ້າຮ່ວມເຖິງ 60 ທ່ານຕາງໜ້າຈາກບັນດາພາກສ່ວນຈັດຕັ້ງປະຕິບັດໂຄງການ (IAs) ຂອງໂຄງການ LCT ພາຍໃນກະຊວງອຸດສະຫະກໍາ ແລະ ການຄ້າ ແລະ ກະຊວງທີ່ກ່ຽວຂ້ອງ.

ກອງປະຊຸມຝຶກອົບຮົມດັ່ງກ່າວໃຫ້ກຽດເປັນປະທານຮ່ວມໂດຍທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື ແລະ ທ່ານນາງ ສົມໝາຍ ພົມມຸນິວົງ, ຮອງຫົວໜ້າກົມຈັດຕັ້ງ ແລະ ພະນັກງານ, ກະຊວງອຸດສະຫະກໍາ ແລະ ການຄ້າ. ກອງປະຊຸມຝຶກອົບຮົມໃນຄັ້ງນີ້ຍັງໄດ້ຮັບກຽດຈາກ ສະມາຄົມພັດທະນາບົດບາດຍິງ-ຊາຍ ເຂົ້າຮ່ວມປະກອບສ່ວນເປັນນັກສຳມະນາກອນນຳອີກ.

ທ່ານ ແສງພະນົມຈອນ ອິນທະສານ ໄດ້ເນັ້ນໜັກເຖິງຈຸດປະສົງຂອງກອງປະຊຸມວ່າ: “ກອງປະຊຸມຝຶກອົບຮົມດັ່ງກ່າວແມ່ນເພື່ອປຶກສາຫາລືແລກປ່ຽນບົດຮຽນກ່ຽວກັບຄວາມຮູ້ຄວາມເຂົ້າໃຈກ່ຽວກັບບົດບາດຍິງ-ຊາຍໂດຍລວມໃນສັງຄົມ ແລະ ເຜີຍແຜ່ແຜນການຈັດຕັ້ງປະຕິບັດວຽກງານບົດບາດຍິງ-ຊາຍ ພາຍໃຕ້ໂຄງການ LCT”.

ທ່ານນາງ ສົມໝາຍ ພົມມຸນິວົງ, ປະທານຮ່ວມໃນກອງປະຊຸມ, ກໍໄດ້ເນັ້ນໜັກເຖິງຄວາມສໍາຄັນຂອງຄວາມເທົ່າທຽມລະຫວ່າງຍິງ-ຊາຍ ແລະ ການເຊື່ອມສານວຽກງານບົດບາດຍິງ-ຊາຍເຂົ້າໃນຂະແໜງການຄ້າ ແລະ ການພັດທະນາ.

ໃນພາກເຊົ້າຂອງກອງປະຊຸມຝຶກອົບຮົມດັ່ງກ່າວ, ວິທະຍາກອນຕາງໜ້າຈາກສະມາຄົມພັດທະນາບົດບາດຍິງ-ຊາຍໄດ້ນຳສະເໜີຄວາມເຊື່ອຕໍ່ບົດບາດຍິງ-ຊາຍ, ຄວາມຮຸນແຮງ, ຄວາມເທົ່າທຽມ ແລະ ການພັດທະນາດ້ານບົດບາດຍິງ-ຊາຍ. ຫົວຂໍ້ດັ່ງກ່າວນີ້ແນໃຫ້ເຫັນເຖິງຄວາມສໍາຄັນຂອງບົດບາດຍິງ-ຊາຍໃນສັງຄົມ ແລະ ຈະຊ່ວຍຍົກໃຫ້ເຫັນເຖິງຄວາມໝາຍ ແລະ ຄວາມສໍາຄັນຂອງແຜນຈັດຕັ້ງປະຕິບັດບົດບາດຍິງ-ຊາຍພາຍໃຕ້ໂຄງການ LCT ທີ່ນໍາສະເໜີໃນຕອນບ່າຍຂອງກອງປະຊຸມດັ່ງກ່າວ.

ໃນກອງປະຊຸມດັ່ງກ່າວ, ສຳມະນາກອນ ແລະ ວິທະຍາກອນ ໄດ້ຮ່ວມກັນປຶກສາຫາລືຕໍ່ກັບບັນຫາຢ່າງກົງໄປກົງມາຕໍ່ກັບຫົວຂໍ້ຕ່າງໆທີ່ໄດ້ນໍາສະເໜີໃນຫ້ອງປະຊຸມ. ນອກຈາກນີ້, ຍັງໄດ້ເຂົ້າຮ່ວມກິດຈະກໍາເສີມ ສ້າງຄວາມສາມັກຄີພາຍໃນອົງກອນ, ເຮັດໃຫ້ບັນຍາກາດຂອງກອງປະຊຸມມີຄວາມເປັນກັນເອງ ແລະ ເຂົ້າໃຈຄວາມແຕກຕ່າງລະຫວ່າງແນວຄິດຂອງຍິງ-ຊາຍຫຼາຍຂຶ້ນ. ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ປະກອບສ່ວນເຂົ້າໃນການປະເມີນຜົນການຈັດກອງປະຊຸມຝຶກອົບຮົມເພື່ອເປັນບ່ອນອີງໃຫ້ກັບການປັບປຸງການຈັດຝຶກອົບຮົມຕ່າງໆໃນອະນາຄົດ.

ກອງປະຊຸມ ແມ່ນໄດ້ຮັບການສະໜັບສະໜູນໂດຍໂຄງການ ເສີມສ້າງຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project-LCTP) ທີ່ໃຫ້ທຶນໂດຍທະນາຄານໂລກ, ລັດຖະບານ ອົດສະຕາລີ, ລັດຖະບານ ໄອແລນ, ແລະ ລັດຖະບານ ອາເມຣິກາ, ເຊິ່ງມີເປົ້າໝາຍຫຼັກໃນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫ່ຍຂະຫຍາຍຕົວຂອງທຸລະກິດ ໂດຍໃຫ້ການຊ່ວຍເຫຼືອທາງດ້ານວິຊາການ ແລະ ງົບປະມານ ເພື່ອປັບປຸງສະພາບແວ້ດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າຂາຍ ແລະ ຍົກລະດັບຄວາມສາມາດການແຂ່ງຂັນຂອງໜ່ວຍທຸລະກິດ.