ກະຊວງອຸດສາຫະກໍາ ແລະ ການຄ້າໄດ້ຈັດກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນ ຄັ້ງທີ 17 ເພື່ອເຜີຍແຜ່ການຈັດຕັ້ງປະຕິບັດ ແຜນການພັດທະນາຂະແໜງການຄ້າ
ນະຄອນຫຼວງວຽງຈັນ, 04 ກຸມພາ 2021, ກະຊວງອຸດສາຫະກໍາ ແລະ ການຄ້າໄດ້ຈັດກອງປະຊຸມໜ່ວຍງານຂະ ແໜງການຄ້າ ແລະ ພາກເອກະຊົນ ຄັ້ງທີ 17 (the 17th Trade and Private Sector Working Group Meeting), ທີ່ໂຮງແຮມ ເມືອງແທ້ງ, ນະຄອນຫຼວງວຽງຈັນ. ກອງປະຊຸມດັ່ງກ່າວໄດ້ໃຫ້ກຽດການເປັນປະທານຮ່ວມໂດຍ ທ່ານນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານນາງ ອີນາ ມາຈູລໍນີແຕ, ເອກອັກຄະລັດຖະທູດ ສໍານັກງານຜູ້ຕາງໜ້າສະຫະພາບເອີຣົບ ປະຈໍາ ສປປ ລາວ ແລະ ທ່ານນາງ ເຈນ ແຊນເລີ, ອຸປະທູດ, ສະຖານທູດອົດສະຕຣາລີ ປະຈໍາ ສປປ ລາວ. ກອງປະຊຸມດັ່ງກ່າວຍັງໄດ້ໃຫ້ກຽດເຂົ້າຮ່ວມໂດຍຜູ້ຕາງໜ້າຫຼາຍກວ່າ 140 ທ່ານຈາກກະຊວງ, ກົມກອງ ແລະ ພະແນກຕ່າງໆ, ສະຖານທູດ, ອົງການຈັດຕັ້ງສາກົນ, ບັນດາຄູ່ຮ່ວມພັດທະນາ ແລະ ສະມາຄົມຕ່າງໆ.
ຈຸດປະສົງໃນການຈັດກອງປະຊຸມດັ່ງກ່າວ ແມ່ນເພື່ອຮັບຟັງການນໍາສະເໜີ ກ່ຽວກັບແຜນໄລຍະກາງຂອງການພັດທະນາຂະແໜງການຄ້າຂອງ ສປປ ລາວ ແລະ ການລາຍງານຄວາມຄືບໜ້າຂອງການປັບປຸງສະພາບແວດລ້ອມການດໍາເນີນທຸລະກິດ ໃນ ສປປ ລາວ.
ທ່ານນາງ ເຂັມມະນີ ພົນເສນາ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ກ່າວເປີດກອງປະຊຸມວ່າ: “ລັດຖະບານແຫ່ງ ສປປ ລາວ ເຫັນເຖິງຄວາມສໍາຄັນຂອງການສ້າງກົດໝາຍ, ກົດລະບຽບ ແລະ ນະໂຍບາຍຕ່າງໆທີ່ອໍານວຍຄວາມສະດວກຕໍ່ການລົງທຶນ ເພື່ອຍົກລະດັບຕົວເລກການປະເມີນຜົນການດໍາເນີນທຸລະກິດ ທີ່ລະບຸໄວ້ໃນບົດລາຍງານການດໍາເນີນທຸລະກິດທີ່ ສປປ ລາວ ໂດຍ ທະນາຄານໂລກ, ເຊິ່ງຈະປະເມີນຈາກກົດລະບຽບທີ່ມີຜົນກະທົບຕໍ່ວຽກງານສໍາຄັນໃນການດໍາເນີນທຸລະກິດ, ເລີ່ມຈາກການເລີ່ມສ້າງຕັ້ງທຸລະກິດ ຈົນເຖິງ ການແກ້ໄຂບັນຫາຕ່າງໆທີ່ຕິດພັນກັບການຄ້າ. ຍ້ອນແນວນັ້ນ, ພວກເຮົາ ພ້ອມດ້ວຍບັນດາຄູ່ຮ່ວມພັດທະນາ, ໂດຍສະເພາະແມ່ນສະຫະພາບ ເອີຣົບ ແລະ ປະເທດ ອົດສະຕຣາລີ, ຈຶ່ງເປັນປະທານຮ່ວມໃນກອງປະຊຸມນີ້ເພື່ອປຶກສາຫາລື ບັນຫາຫຼັກເພື່ອປັບປຸງສະພາບແວດລ້ອມໃນການລົງທຶນໃນ ສປປ ລາວ, ໂດຍແນໃສ່ທັງການສ້າງຕັ້ງ ແລະ ການຈັດຕັ້ງປະຕິບັດນະໂຍບາຍຕ່າງໆ .”
ຫຼັງຈາກນັ້ນ, ທ່ານນາງ ອີນາ ມາຈູລໍນີແຕ, ເອກອັກຄະລັດຖະທູດ ສໍານັກງານຜູ້ຕາງໜ້າສະຫະພາບເອີຣົບ ປະຈໍາ ສປປ ລາວ ໄດ້ເນັ້ນໜັກເຖິງສະພາບເສດຖະກິດລະດັບມະຫາພາກຂອງ ສປປ ລາວ ທີ່ໄດ້ຮັບຜົນກະທົບໜັກຈາກການລະບາດຂອງ ໂຄວິດ-19 ໃນຂະນະທີ່ມີລະດັບໜີ້ສິນທີ່ເພີ່ມຂຶ້ນຈາກໂຄງການກໍ່ສ້າງພື້ນຖານໂຄງລ່າງທີ່ສໍາຄັນ, ເຊິ່ງເປັນສິ່ງທີ່ທ້າທາຍຫຼາຍທີ່ຈະຟື້ນຟູສະພາບເສດຖະກິດໄດ້, ແຕ່ພວກເຮົາທັງໝົດກໍຮູ້ດີວ່າ ເພື່ອເປັນການຫຼຸດຜ່ອນຄວາມຫຍຸ້ງຍາກໃນຊ່ວງໄລຍະນີ້ ແລະ ຕິດຕາມການຈັດຕັ້ງປະຕິບັດຕາມແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ IX, ການຄ້າ ແລະ ການລົງທຶນຈຶ່ງເປັນສິ່ງທີ່ສໍາຄັນ, ໂດຍສະເພາະແມ່ນການພິຈາລະນາຢ່າງຮອບຄອບກ່ຽວກັບຜົນປະໂຫຍດ ແລະ ຜົນກະທົບຈາກການພັດທະນາໂຄງລ່າງພື້ນຖານໃໝ່, ໂດຍສະເພາະແມ່ນເສັ້ນທາງລົດໄຟ ລາວ-ຈີນ ແລະ ການພັດທະນາທີ່ຕິດພັນ ກັບເຂດເສດຖະກິດພິເສດ ກໍຄື ວຽກງານພາຍໃຕ້ສັນຍາ ການຮ່ວມມືເສດຖະກິດພາກພື້ນແບບຮອບດ້ານ (Regional Comprehensive Economic Partnership-RCEP). ທ່ານນາງ ອີນາ ມາຈູລໍນີແຕ ຍັງໄດ້ເນັ້ນໜັກກ່ຽວກັບ ຜົນປະໂຫຍດຈາກການສະໜັບສະໜູນຕ່າງໆຈາກຄູ່ຮ່ວມພັດທະນາເພື່ອສົ່ງເສີມໃຫ້ພາກລັດ ແລະ ພາກເອກະຊົນໃຫ້ເຂັ້ມແຂງຂຶ້ນ ພ້ອມທັງຜົນປະໂຫຍດໄດ້ຮັບຈາກກອງປະຊຸມ ຄະນະກໍາມະການຊີ້ນໍາແຜນງານຈັດຕັ້ງປະຕິບັດໂຄງການ ພາຍໃຕ້ກະຊວງອຸດສາຫະກຳ ແລະ ການຄ້າ. ສຸດທ້າຍນີ້, ທ່ານນາງ ອີນາ ມາຈູລໍນີແຕ ຍັງກ່າວຕື່ມວ່າ “ສະຫະພາບ ເອີຣົບມີຄວາມຕັ້ງໃຈໃນການສົ່ງເສີມການລົງທຶນຂອງນັກລົງທຶນຈາກສະຫະພາບເອີຣົບໃນ ສປປ ລາວ, ໃນການສະໜັບສະໜູນຕາມທິດທາງການຈັດຕັ້ງປະຕິບັດຍຸດທະສາດການເຕີບໂຕສີຂຽນແຫ່ງຊາດ”.
ກອງປະຊຸມໄດ້ດໍາເນີນຕາມວາລະ, ເຊິ່ງເລີ່ມຈາກການນໍາສະເໜີແນວຄວາມຄິດເບື້ອງຕົ້ນຂອງບົດປັບປຸງບົດວິໄຈການເຊື່ອມໂຍງເຂົ້າສາກົນດ້ານການຄ້າ; ຜົນກະທົບຕໍ່ຂະແໜງການຄ້າຂອງການຫຼຸດພົ້ນອອກຈາກປະເທດດ້ອຍພັດທະນາຂອງ ສປປ ລາວ; ຮ່າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX; ຄວາມຄືບໜ້າການຈັດຕັ້ງປະຕິບັດຄໍາສັ່ງ 02/ນຍ, 03/ນຍ ແລະ ດໍາລັດວ່າດ້ວຍການຮ່ວມມືລະຫວ່າງພາກລັດ ແລະ ພາກເອກະຊົນ ແລະ ການກະກຽມສໍາລັບການຈັດກອງປະຊຸມທຸລະກິດລາວ ຄັ້ງທີ 13.
ກ່ອນກອງປະຊຸມຈະປິດລົງ, ທ່ານນາງ ເຈນ ແຊນເລີ, ອຸປະທູດ, ສະຖານທູດອົດສະຕຣາລີ ປະຈໍາ ສປປ ລາວ ໄດ້ສະແດງຄວາມຍິນດີມາຍັງລັດຖະບານແຫ່ງ ສປປ ລາວ ທີ່ເອົາໃຈໃສ່ໃນການພັດທະນາເສດຖະກິດ ໃນຊ່ວງການລະບາດ ໂຄວິດ-19, ເຊິ່ງສາມາດເຫັນໄດ້ຈາກການລາຍງານຄວາມຄືບໜ້າ ການຈັດຕັ້ງປະຕິບັດວຽກງານຕ່າງໆທີ່ໄດ້ນໍາສະເໜີມາຂ້າງເທິງນັ້ນ, ແລະ ເພິ່ນກໍເນັ້ນອີກວ່າ ການພັດທະນາວຽກງານການຄ້າ ແລະ ພາກເອກະຊົນເປັນວຽກງານບູລິມະສິດໄລຍະຍາວ ໃນການຮ່ວມມືການພັດທະນາລະຫວ່າງ ລັດຖະບານ ອົດສະຕຣາລີ ແລະ ລັດຖະບານແຫ່ງ ສປປ ລາວ.
ສຸດທ້າຍນີ້, ທ່ານນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດກ່າວປິດກອງປະຊຸມໂດຍການສະແດງຄວາມຂອບໃຈມາຍັງກະຊວງ, ກົມກອງ ແລະ ພະແນກຕ່າງໆ, ສະຖານທູດ, ອົງການຈັດຕັ້ງສາກົນ, ບັນດາຄູ່ຮ່ວມພັດທະນາ ແລະ ສະມາຄົມຕ່າງໆທີ່ເປັນຜູ້ຕັ້ງໜ້າປະກອບສ່ວນ ເຂົ້າໃນການພັດທະນາຂະແໜງການຄ້າ ແລະ ພາກເອກະຊົນ ແລະ ກໍຂໍໃຫ້ໜ່ວຍງານຕ່າງໆເຫຼົ່ານີ້ສືບຕໍ່ວຽກງານການພັດທະນາດັ່ງກ່າວນີ້ຕໍ່ໄປ.
ໜ່ວຍງານ TPSWG ແມ່ນໜຶ່ງໃນສິບໜ່ວຍງານ ພາຍໃຕ້ຂະບາຍການໂຕະມົນ ແລະ ເປັນເວທີຫຼັກສໍາລັບການປຶກສາຫາລື ດ້ານນະໂຍບາຍ ລະຫວ່າງພາກລັດ ແລະ ບັນດາຄູ່ຮ່ວມພັດທະນາ. ບັນດາຜູ້ທີ່ເຂົ້າຮ່ວມໃນກອງປະຊຸມແມ່ນມາຈາກພາກລັດ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງສັງຄົມ. ສ່ວນໜ່ວຍງານຂະແໜງການອື່ນອີກ 9 ໜ່ວຍງານມີ: ສາທາ, ສຶກສາ, ການປົກຄອງ, ເສດຖະກິດມະຫາພາກ, ໂຄງລ່າງພື້ນຖານ, ການຄວບຄຸບບັນຫາຢາເສບຕິດ, ລະເບີດບໍ່ທັນແຕກ, ກະສິກໍາ ແລະ ພັດທະນາຊົນນະບົດ; ແລະ ການຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ.
