ກອງປະຊຸມການພັດທະນາຄວາມຮູ້-ຄວາມສາມາດ ສຳລັບແມ່ຍິງ ກ່ຽວກັບວຽກງານບົດບາດ ຍິງ-ຊາຍ ແລະ ການບໍລິຫານຄວາມສ່ຽງ ດ້ານອາຫານ ແລະ ຢາ
ກົມອາຫານ ແລະ ຢາ, ກະຊວງສາທາລະນະສຸກ, ໄດ້ຈັດປະຊຸມຂຶ້ນພາຍໃຕ້ຫົວຂໍ້ “ການພັດທະນາຄວາມຮູ້-ຄວາມສາມາດສຳລັບແມ່ຍິງ ກ່ຽວກັບວຽກງານບົດບາດຍິງ-ຊາຍ ແລະ ການບໍລິຫານຄວາມສ່ຽງດ້ານອາຫານ ແລະ ຢາ” ທີ່ ສະໂມສອນຂອງຫ້ອງວ່າການປົກຄອງເມືອງວັງວຽງ ລະຫວ່າງວັນທີ 4-7 ມີນາ 2021.
ຈຸດປະສົງຂອງກອງປະຊຸມແມ່ນເພື່ອສ້າງຂະບວນການສະເຫຼີມສະຫຼອງ ເນື່ອງໃນວັນແມ່ຍິງສາກົນ ແລະ ເຜີຍແຜ່ວຽກງານການໃຫ້ຄວາມສຳຄັນ ດ້ານບົດບາດຍິງ-ຊາຍເຂົ້າໃນການພັດທະນາ. ກອງປະຊຸມຄັ້ງນີ້ໄດ້ຮັບກຽດເຂົ້າຮ່ວມ ແລະ ເປັນປະທານໂດຍ ທ່ານ ປອ ດຣ ບຸນຊູ ແກ້ວຫາວົງ, ຄະນະພັກກະຊວງສາທາລະນະສູກ ແລະ ທັງເປັນຮອງຫົວໜ້າກົມອາຫານ ແລະ ຢາ, ທ່ານ ດຣ ນ. ວຽງໄຊ ວັນສີລາລົມ, ປະທານສະຫະພັນແມ່ຍິງກົມອາຫານ ແລະ ຢາ ແລະ ທັງເປັນຮອງຫົວໜ້າກົມອາຫານ ແລະ ຢາ ແລະ ທ່ານ ນ. ສຳລວຍ ສຸກຂະວົງ, ສະຫະພັນແມ່ຍິງເມືອງວັງວຽງ, ເປັນປະທານຮ່ວມ. ກອງປະຊຸມ ໄດ້ມີຜູ້ຕາງໜ້າເຂົ້າຮ່ວມ ຈາກພາກສ່ວນຕ່າງໆເປັນຕົ້ນ: ກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ, ສະຫະພັນແມ່ຍິງເມືອງວັງວຽງ ແຂວງວຽງຈັນ, ຫ້ອງການກະຊວງສາທາລະນະສຸກ, ກົມແຜນການ ແລະ ການຮ່ວມມືື ກະຊວງສາທາລະນະສຸກ, ກອງກວດກາອາຫານ ແລະ ຢາ, ສູນວິໄຈອາຫານ ແລະ ຢາ, ສູນສະໜອງຢາ ແລະ ອຸປະກອນການແພດ, ສະຖາບັນການແພດການຢາພື້ນເມືອງ, ຄະນະເພສັຊສາດ ມະຫາວິທະຍາໄລວິທະຍາສາດສຸຂະພາບ, ໂຮງງານຜະລິດຢາເລກ 2, ໂຮງງານຜະລິດຢາເລກ 3, ແລະ ຫ້ອງການສາທາລະນະສຸກເມືອງວັງວຽງ ລວມຜູ້ເຂົ້າຮ່ວມທັງໝົດ 72 ທ່ານ.
ໃນກອງປະຊຸມ, ບັນດາຜູ້ເຂົ້າຮ່ວມໄດ້ຮັບຟັງ, ແລກປ່ຽນ ກ່ຽວກັບຫຼາຍຫົວຂໍ້ທີ່ຕິດພັນກັບວຽກງານການຍົກສູງບົດບາດ ຍິງ-ຊາຍ, ເຊັ່ນ: ຫົວຂໍ້ກ່ຽວກັບການຍົກສູງບົດບາດ ຍິງ-ຊາຍ ເຂົ້າໃນວຽກງານສາທາລະນະສຸກ ເພື່ອຫຼຸດຜອ່ນຄວາມບໍ່ສະເໝີພາບ ແລະ ຄວາມບໍ່ເທົ່າທຽມກັນ ໃນການເຂົ້າເຖິງການບໍລິການດ້ານສາທາລະນະສຸກ, ເພື່ອເອົາໃຈໃສ່ຕໍ່ບັນຫາສຸຂະພາບຂອງແມ່ ແລະ ເດັກນ້ອຍ ແລະ ເພື່ອເປັນການສະໜອງຂໍ້ມູນພື້ນຖານດ້ານບົດບາດຍິງ-ຊາຍ ແລະ ສຸຂະພາບ. ນອກຈາກນີ້, ຜູ້ເຂົ້າຮ່ວມຍັງໄດ້ປຶກສາຫາລືພາຍໃຕ້ຫົວຂໍ້ ການພັດທະນາຄວາມຮູ້-ຄວາມສາມາດ ສໍາລັບແມ່ຍິງກ່ຽວກັບວຽກງານບົດບາດຍິງ-ຊາຍ ພາຍໃຕ້ໂຄງການ ສົ່ງເສີມຄວາມອາດສາມາດ ດ້ານການແຂ່ງຂັນ ແລະ ການຄ້າ (Lao PDR Competitiveness and Trade – LCT); ແລະ ຫົວຂໍ້ກ່ຽວກັບການການນໍາໃຊ້ຫຼັກການ ການບໍລິຫານຄວາມສ່ຽງອາຫານ ແລະ ຢາ ເຂົ້າໃນວຽກງານຄຸ້ມຄອງການນໍາເຂົ້າ-ສົ່ງອອກ, ສົ່ງຜ່ານ ຢູ່ດ່ານຊາຍແດນ.
ນອກຈາກກິດຈະກໍາການປະຊຸມເຜີຍແຜ່ ກ່ຽວກັບວຽກງານການໃຫ້ຄວາມສຳຄັນ ບົດບາດຍິງ-ຊາຍ ແລ້ວ, ຜູ້ເຂົ້າຮ່ວມກອງປະຊຸມ ຍັງໄດ້ມີໂອກາດລົງຢ້ຽມຢາມ ຜະລິດຕະພັນປຸງແຕ່ງປາ ຂອງແມ່ຍິງເມືອງວັງວຽງ ບ້ານ ທ່າເຮືອ; ຢ້ຽມຢາມ ຜະລິດຕະພັນປູກພືດຜັກອໍການິກ ຂອງແມ່ຍິງເມືອງວັງວຽງ, ທີ່ ບ້ານ ພູດິນແດງ ແລະ ຊົມແຫຼ່ງທ່ອງທ່ຽວທຳມະຊາດ ທີ່ສວຍສົດງົດງາມຂອງ ເມືອງວັງວຽງ ແຂວງ ວຽງຈັນ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT).
ໂຄງການ LCT ເປັນໂຄງການທີ່ໄດ້ຮັບການປະກອບທຶນຮ່ວມ ເຂົ້າກອງທຶນສົບທົບຫຼາຍຝ່າຍໂດຍ ລັດຖະບານອົດສະຕຣາລີ, ລັດຖະບານ ໄອແລນ, ລັດຖະບານ ອາເມຣິກາ ແລະ ທະນາຄານໂລກ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມ ດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
