ໂຄງການ USAID ໄດ້ໃຫ້ການສະໜັບສະໜູນໃນການຈັດກອງປະຊຸມຝຶກອົບຮົມກ່ຽວກັບ ເງື່ອນໄຂການເຂົ້າສູ່ຕະຫຼາດສະຫະລັດ ອາເມລິກາ ຂອງສິນຄ້າລາວ
ວັນທີ 12 ມີນາ 2021, ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ, ໂດຍການສະໜັບສະໜູນຂອງໂຄງການສ້າງສະພາບແວດລ້ອມທີ່ເອື້ອອຳນວນຕໍ່ທຸລະກິດລາວ (USAID Laos Business Environment), ໄດ້ຈັດກອງປະຊຸມຝຶກອົບຮົມໃນຫົວຂໍ້ “ຄວາມຮູ້ກ່ຽວກັບເງື່ອນໄຂການເຂົ້າຕະຫຼາດສະຫະລັດອາເມລິກາຂອງສິນຄ້າລາວ”, ທີ່ ໂຮງແຮມ ຄຣາວ ພລາຊາ, ນະຄອນຫຼວງວຽງຈັນ. ຈຸດປະສົງກອງປະຊຸມແມ່ນເພື່ອສະໜັບສະໜູນວິສາຫະກິດຂະໜາດນ້ອຍ ແລະ ກາງ (SMEs) ຂອງ ສປປ ລາວ ໃນຂະແໜງການທ່ອງທ່ຽວດ້ານການສົ່ງເສີມໂຄສະນາສິນຄ້າ, ເປັນຕົ້ນແມ່ນສິນຄ້າປະເພດຂອງທີ່ລະນຶກ, ເຊັ່ນ: ຊາ, ກາເຟ ແລະ ຫັດຖະກໍາຂອງລາວໃນຕະຫຼາດສະຫາລັດອາເມລິກາ. ກອງປະຊຸມໃນຄັ້ງນີ້ບໍ່ພຽງແຕ່ເປັນການສະໜອງຂໍ້ມູນ ກ່ຽວກັບວິທີການຍົກລະດັບມາດຕະຖານການຜະລິດ ແລະ ຄຸນນະພາບຂອງສິນຄ້າ, ແຕ່ຍັງຈະສົ່ງເສີມໃຫ້ SMEs ເຫັນເຖິງຜົນປະໂຫຍດຂອງການນໍາໃຊ້ເຄື່ອງມືດິຈິຕອລ ເພື່ອຊ່ວຍໃຫ້ສາມາດປັບຕົວ ແລະ ສາມາດດໍາເນີນທຸລະກິດໄດ້ຢ່າງຄ່ອງຕົວ ໃນສະພາບເສດຖະກິດປັດຈຸບັນ.
ກອງປະຊຸມດັ່ງກ່າວໄດ້ຮັບກຽດເປັນປະທານຮ່ວມໂດຍ ທ່ານ ໄຊສົມເພັດ ນໍຣະສິງ ຫົວໜ້າກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ແລະ ທ່ານ ໄມເຄີ້ນ ລອນນິ່ງ, ຜູ້ຕາງໜ້າ USAID ປະຈໍາ ສປປ ລາວ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄື ຕາງໜ້າຂະແໜງການທີ່ກ່ຽວຂ້ອງຈາກພາກລັດ, ສະພາການຄ້າ ແລະ ອຸດສາຫະກໍາ ແຫ່ງຊາດລາວ, ບັນດາສະມາຄົມທຸລະກິດ ແລະ ຫົວໜ່ວຍວິສາຫະກິດໃນຂະແໜງການທ່ອງທ່ຽວ.
ໃນລະຫວ່າງການຝຶກອົບຮົມ, ຜູ້ເຂົ້າຮ່ວມໄດ້ຮັບຟັງການບັນຍາຍກ່ຽວກັບເງື່ອນໄຂ, ມາດຕະຖານ ແລະ ລະບຽບການໃນການສົ່ງອອກສິນຄ້າໄປຍັງຕະຫຼາດສະຫາລັດອາເມລິກາ. ພ້ອມນັ້ນ, ກໍໄດ້ຮັບຟັງການນໍາສະເໜີກ່ຽວກັບ ກາລະໂອກາດ ແລະ ສິ່ງທ້າທາຍທີ່ຜູ້ປະກອບການສົ່ງອອກສິນຄ້າ ລາວປະສົບພົບພໍ້ໃນໄລຍະຜ່ານມາ. ໃນຕອນທ້າຍຂອງການຝຶກອົບຮົມ, ຜູ້ເຂົ້າຮ່ວມຍັງໄດ້ມີໂອກາດແລກປ່ຽນ ຄວາມຄິດເຫັນ ແລະ ປະສົບການກັບບັນດາ SMEs ຈາກ ສປປ ລາວ ແລະ ໃນພາກພື້ນແມ່ນໍ້າຂອງທີ່ປະສົບຜົນສໍາເລັດ ໃນການສົ່ງອອກສິນຄ້າຂອງຕົນໄປຍັງຕະຫຼາດສາກົນ.
ໃນກອງປະຊຸມ ທ່ານ ໄມເຄີ້ນ ລອນນິ່ງ, ຜູ້ຕາງໜ້າ USAID ປະຈໍາລາວ, ຍັງໄດ້ກ່າວວ່າ: “ສປປ ລາວ ແລະ ສະຫາລັດອາເມລິກາ ມີປະຫວັດການຮ່ວມມືສອງຝ່າຍທີ່ຍາວນານ-ແໜ້ນແຟ້ນ. ຕັ້ງແຕ່ສອງປະເທດ ໄດ້ມີການອອກຖະແຫຼງການຮ່ວມມືກ່ຽວກັບການເປັນຄູ່ຮ່ວມມືແບບກວມລວມໃນປີ 2016, ການພົວພັນຮ່ວມມືສອງຝ່າຍກໍຍິ່ງສືບຕໍ່ເສີມຂະຫຍາຍ ແລະ ເຂັ້ມແຂງຂຶ້ນ, ໂດຍສະເພາະໃນວຽກງານການສະໜັບສະໜູນ ສປປ ລາວ ໃນການຂະຫຍາຍຕະຫຼາດ ແລະ ໂອກາດໃນການສົ່ງອອກ. ພວກເຮົາເຊື່ອໝັ້ນວ່າ ການສະໜັບສະໜູນ ຂອງພວກເຮົາໃນການຈັດກອງປະຊຸມຄັ້ງນີ້ ຈະຊ່ວຍໃຫ້ SMEs ຮັບຮູ້ ແລະ ເຂົ້າໃຈດີຂຶ້ນກ່ຽວກັບວິທີການ ແລະ ຂັ້ນຕອນການສົ່ງອອກສິນຄ້າມາຍັງຕະຫຼາດສະຫາລັດອາເມລິກາ”.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
