ກະຊວງອຸດສາຫະກໍາ ແລະ ການຄ້າຈັດກອງປະຊຸມ ສະຫຼຸບເນື້ອໃນເອກະສານ ທຶນເພີ່ມເຕີມເຂົ້າໃນໂຄງການ LCT
ນະຄອນຫຼວງວຽງຈັນ, ວັນທີ 31 ພຶດສະພາ 2021, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ໄດ້ຈັດກອງປະຊຸມທາງໄກ ເພື່ອສະຫຼຸບເນື້ອໃນເອກະສານທຶນເພີ່ມເຕີມເຂົ້າໃນໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT). ກອງປະຊຸມດັ່ງກ່າວໄດ້ຮັບກຽດເປັນປະທານໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ.
ກອງປະຊຸມດັ່ງກ່າວຍັງໄດ້ຮັບກຽດເຂົ້າຮ່ວມໂດຍບັນດາຜູ້ຕາງໜ້າຈາກຜູ້ໃຫ້ທຶນ ເຊັ່ນ: ອົງການພັດທະນາສາກົນປະເທດສະຫະລັດອາເມລິກາ (USAID), ສະຖານທູດອົດສະຕຣາລີ ປະຈໍາລາວ ຕາງໜ້າໃຫ້ກັບ ກະຊວງການຕ່າງປະເທດ ແລະ ການຄ້າປະຈໍາປະເທດອົດສະຕຣາລີ (Australia’s DFAT), ບັນດາກະຊວງກ່ຽວຂ້ອງ, ຄູ່ຮ່ວມພັດທະນາ ແລະ ພາກເອກະຊົນ ທີ່ເຮັດວຽກຕິດພັນກັບໂຄງການ LCT.
ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ໄດ້ກ່າວເປີດກອງປະຊຸມ ໂດຍທ່ານໄດ້ກ່າວວ່າ: “ເຖິງວ່າຈະມີສິ່ງທ້າທາຍຈາກການລະບາດ ໂຄວິດ-19 ທີ່ ສປປ ລາວ ແລະ ບັນດາປະເທດອ້ອມຂ້າງ, ຄະນະຈັດຕັ້ງປະຕິບັດໂຄງການ ພ້ອມທັງບັນດາກະຊວງ ແລະ ຄູ່ຮ່ວມພັດທະນາທີ່ເຮັດວຽກຕິດພັນກັບໂຄງການ ກໍສາມາດເຮັດວຽກ ແລະ ພ້ອມກັນດໍາເນີນກອງປະຊຸມຮ່ວມກັນໄດ້ຢ່າງມີປະສິດທິຜົນ”.
ທີມງານທະນາຄານໂລກ ໄດ້ນໍາສະເໜີວຽກງານສໍາຄັນທີ່ຕິດພັນກັບທຶນເພີ່ມເຕີມເຂົ້າໃນໂຄງການ, ເຊິ່ງລວມມີ: 1) ການສະໜັບສະໜູນການປັບປຸງຂອບເຂດວຽກງານກົດໝາຍ ແລະ ລະບຽບການທີ່ຕິດພັນກັບການຄ້າລະຫວ່າງປະເທດ; 2) ເພີ່ມປະລິມານທຶນສົມທົບ ພາຍໃຕ້ວຽກງານ ທຶນສົມທົບເພື່ອສົ່ງເສີມທຸລະກິດ; ແລະ 3) ເພີ່ມທຶນຊ່ວຍເຫຼືອເຂົ້າໃນການສົ່ງເສີມການປັບປຸງການປະສານງານກັບບັນດາກະຊວງ ໃນການຈັດຕັ້ງປະຕິບັດການປັບປຸງນະໂຍບາບ ແລະ ວຽກງານທີ່ລະບຸໄວ້ໃນ ຄໍາສັ່ງຂອງນາຍົກລັດຖະມົນຕີ ສະບັບເລກທີ 02 ແລະ 03, ຂໍ້ຕົກລົງຂອງອົງການການຄ້າໂລກ ວ່າດ້ວຍ ການອໍານວຍຄວາມສະດວກດ້ານການຄ້າ ແລະ ກົນໄກການປຶກສາຫາລື ລະຫວ່າງພາກລັດ ແລະ ພາກເອກະຊົນ.
ບັນດາຜູ້ໃຫ້ທຶນ, ລວມທັງ ອົງການ USAID, ສະຖານທູດອົດສະຕຣາລີ ປະຈໍາລາວ ໄດ້ສະແດງຄໍາຄິດເຫັນຕໍ່ກັບການສະໜັບສະໜູນໃນວຽກງານບູລິມະສິດ ກໍຄື ການຈັດລຽງວຽກງານທີ່ຈະຈັດຕັ້ງປະຕິບັດພາຍໃຕ້ໂຄງການ ແລະ ໄດ້ສະແດງຄວາມໝັ້ນໃຈວ່າການເພີ່ມທຶນເຂົ້າໃນໂຄງການຈະຊ່ວຍໃຫ້ລັດຖະບານ ສາມາດຫຼຸດຜ່ອນຜົນກະທົບຂອງການລະບາດ ໂຄວິດ-19 ໃນໄລຍະສັ້ນນີ້ ພ້ອມກັນທັງ ການສະໜັບສະໜູນການຟື້ນຟູເສດຖະກິດທີ່ຍືນຍົງຫຼັງຈາກການລະບາດຂອງພະຍາດດັ່ງກ່າວສິ້ນສຸດລົງ.
ກ່ອນປິດກອງປະຊຸມ, ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ, ໄດ້ສະແດງຄວາມຂອບໃຈມາຍັງ ທະນາຄານໂລກ, ອົງການພັດທະນາສາກົນ ປະເທດ ໄອລິສ (Irish Aid), ອົງການພັດທະນາສາກົນ ປະເທດສະຫະລັດ ອາເມລິກາ (USAID), ສະຖານທູດອົດສະຕຣາລີ ປະຈໍາລາວ ທີ່ໃຫ້ການສະໜັບສະໜູນ ແລະ ປະກອບສ່ວນເຂົ້າໃນໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ.
ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT) ເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
