ກອງປະຊຸມກ່ຽວກັບ ຂໍ້ລິເລີ່ມໃໝ່ ຂອງການເຈລະຈາໃນຂອບອົງການການຄ້າໂລກ
ໃນວັນທີ 28 – 30 ມິຖຸນາ 2021 ໄດ້ມີການຈັດກອງປະຊຸມກ່ຽວກັບ ຂໍ້ລິເລີ່ມໃໝ່ຂອງ ການເຈລະຈາໃນຂອບ ອົງການການຄ້າໂລກ (ອຄລ) “National Workshop on State of Play of WTO New Initiatives” ທີ່ກະຊວງອຸດສາຫະກຳ ແລະ ການຄ້າ, ພາຍໃຕ້ການເປັນປະທານໂດຍ ທ່ານ ສັນຕິສຸກ ພູນສະຫວັດ, ຮອງຫົວໜ້າ ກົມນະໂຍບາຍການຄ້າຕ່າງປະເທດ, ກະຊວງອຸດສາຫະກຳ ແລະ ການຄ້າ, ໂດຍມີຜູ້ເຂົ້າຮ່ວມຈາກພາກລັດ, ທຸລະກິດ ແລະ ບັນດາສະມາຄົມພາຍໃຕ້ສະພາການຄ້າ ແລະ ອຸດສາຫະກຳແຫ່ງຊາດລາວ ຈຳນວນ 50 ຄົນ. ກອງປະຊຸມໄດ້ຮັບການສະ ໜັບສະໜູນຈາກ ໂຄງການ ສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ (Laos Business Environment) ຂອງ USAID ແລະ ກອງເລຂາ ອຄລ.
ຈຸດປະສົງຂອງກອງປະຊຸມ ແມ່ນເພື່ອສ້າງຄວາມຮູ້ ແລະ ຄວາມເຂົ້າໃຈກ່ຽວກັບສະພາບການເຈລະຈາໃນປະຈຸບັນຂອງ ອຄລ ໂດຍສະເພາະຂໍ້ລິເລີ່ມໃໝ່ທີ່ຕິດພັນກັບ 1) ການຄ້າທາງເອເລັກໂທຣນິກ (E-Commerce); 2) ຂໍ້ລິເລີ່ມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (Micro, Small and Medium-Sized Enterprises; 3) ການອຳນວຍຄວາມສະດວກດ້ານການລົງທຶນເພື່ອການພັດທະນາ (Investment Facilitation for Development); 4) ລະບຽບການພາຍໃນທີ່ຕິດພັນກັບການບໍລິການ (Services Domestic Regulation); ແລະ 5) ບັນຫາກ່ຽວກັບ ສານປົນເປື້ອນຂອງພຣາດຕິກ ແລະ ການສົ່ງເສີມສະພາບແວດລ້ອມການຄ້າແບບຍືນຍົງ (Plastics Pollution and Environmentally Sustainable Plastic Trade). ພ້ອມນີ້, ຜູ້ເຂົ້າຮ່ວມໄດ້ມີໂອກາດແລກປ່ຽນຄຳຄິດເຫັນໃນການກະກຽມກຳນົດຈຸດຢືນຂອງ ສປປ ລາວ, ເພື່ອກະກຽມກອງປະຊຸມລັດຖະມົນຕີອົງການການຄ້າໂລກ ຄັ້ງທີ 12 (Ministerial Conference – MC12) ທີ່ຈະມີຂຶ້ນໃນທ້າຍປີ 2021. ກອງປະຊຸມນີ້ ແມ່ນມີຄວາມສຳຄັນຫຼາຍສຳລັບ ສປປ ລາວ ເພື່ອໃຫ້ສາມາຍາດແຍ່ງເອົາຜົນປະໂຫຍດສູງສຸດຈາກລະບົບການຄ້າຫຼາຍຝ່າຍ ແລະ ກະກຽມຈຸດຢືນໃຫ້ແກ່ ສປປ ລາວ ໃນກອງປະຊຸມ MC12 ໂດຍສະເພາະແມ່ນ ຂໍ້ສະເໜີກ່ຽວກັບຜົນປະໂຫຍດຕ່າງໆ ລວມທັງ ການປະຕິບັດແບບພິເສດ ແລະ ແຕກຕ່າງຂອງປະເທດດ້ອຍພັດທະນາ ແລະ ການວິເຄາະປະເມີນຜົນຊ່ອງວ່າງທາງດ້ານນະໂຍບາຍ ແລະ ການຈັດຕັ້ງປະຕິບັດຂໍ້ລິເລີ່ມໃນອະນາຄົດ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
