ກົມແຜນການ ແລະ ການຮ່ວມມືຈັດ ກອງປະຊຸມຝຶກອົບຮົມ ເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບ ບົດລາຍງານ ຊ່ອງວ່າງລະຫວ່າງ ບົດບາດຍິງ-ຊາຍ 2021 ແລະ ຜົນກະທົບຂອງການລະບາດ ໂຄວິດ-19 ຕໍ່ນັກທຸລະກິດຍິງ

ນະຄອນຫຼວງວຽງຈັນ, ວັນທີ 29 ມິຖຸນາ 2021, ກົມແຜນການ ແລະ ການຮ່ວມມື, ກະຊວງອຸດສະຫະກໍາ ແລະ ການຄ້າໄດ້ຈັດກອງປະຊຸມຝຶກອົບຮົມ ເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບ ບົດລາຍງານ ຊ່ອງວ່າງລະຫວ່າງບົດບາດຍິງ-ຊາຍ 2021 ແລະ ຜົນກະທົບຂອງການລະບາດ ໂຄວິດ-19 ຕໍ່ນັກທຸລະກິດຍິງ ພາຍໃຕ້ການສະໜັບສະໜູນໂດຍໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT). ກອງປະຊຸມຝຶກອົບຮົມດັ່ງກ່າວມີຜູ້ເຂົ້າຮ່ວມເຖິງ 30 ທ່ານຕາງໜ້າຈາກບັນດາພາກສ່ວນຈັດຕັ້ງປະຕິບັດໂຄງການ (IAs) ຂອງໂຄງການ LCT ພາຍໃນກະຊວງອຸດສະຫະກໍາ ແລະ ການຄ້າ ແລະ ກະຊວງທີ່ກ່ຽວຂ້ອງ.

ກອງປະຊຸມຝຶກອົບຮົມດັ່ງກ່າວໃຫ້ກຽດເປັນປະທານຮ່ວມໂດຍທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື ແລະ ທ່ານນາງ ສົມໝາຍ ພົມມຸນິວົງ, ຮອງຫົວໜ້າກົມຈັດຕັ້ງ ແລະ ພະນັກງານ, ກະຊວງອຸດສະຫະກໍາ ແລະ ການຄ້າ.
ທ່ານ ແສງພະນົມຈອນ ອິນທະສານ ໄດ້ເນັ້ນໜັກເຖິງຈຸດປະສົງຂອງກອງປະຊຸມວ່າ: “ກອງປະຊຸມຝຶກອົບຮົມດັ່ງກ່າວ ແມ່ນເປັນເວທີເພື່ອປຶກສາຫາລືແລກປ່ຽນບົດຮຽນ ກ່ຽວກັບຄວາມຮູ້ຄວາມເຂົ້າໃຈກ່ຽວກັບ ບົດບາດຍິງ-ຊາຍໂດຍລວມໃນສັງຄົມ, ໂດຍສະເພາະແມ່ນ ບົດບາຍງານ ຊ່ອງວ່າງລະຫວ່າງບົດບາດຍິງ-ຊາຍ 2021 ໂດຍ ກອງປະຊຸມ ເສດຖະກິດສາກົນ ແລະ ບົດລາຍງານອື່ນໆກ່ຽວກັບຜົນກະທົບຂອງການລະບາດ ໂຄວິດ-19 ໃນປີ 2021 ຕໍ່ກັບ ນັກທຸລະກິດຍິງ, ເຊິ່ງຈະເປັນປະໂຫຍດໃນການປັບປຸງແຜນຈັດຕັ້ງປະຕິບັດບົດບາດຍິງ-ຊາຍ ທີ່ເຊື່ອມສານເຂົ້າໃນທຸກອົງປະກອບຂອງໂຄງການ.

ທ່ານນາງ ສົມໝາຍ ພົມມຸນິວົງ, ປະທານຮ່ວມໃນກອງປະຊຸມ, ກໍໄດ້ເນັ້ນໜັກເຖິງຄວາມສໍາຄັນຂອງຄວາມເທົ່າທຽມລະຫວ່າງຍິງ-ຊາຍ ແລະ ການເຊື່ອມສານວຽກງານບົດບາດຍິງ-ຊາຍເຂົ້າໃນຂະແໜງການຄ້າ ແລະ ການພັດທະນາ.

ກອງປະຊຸມໄດ້ດໍາເນີນຕາມວາລະກອງປະຊຸມ ເຊິ່ງເລີ່ມຈາກການນໍາສະເໜີ ບົດລາຍງານ ຊ່ອງວ່າງລະຫວ່າງບົດບາດຍິງ-ຊາຍ 2021. ຫຼັງຈາກນັ້ນ, ກໍໄດ້ນໍາສະເໜີກ່ຽວກັບຜົນກະທົບຂອງການລະບາດ ໂຄວິດ-19 ຕໍ່ເສດຖະກິດລາວ, ໂດຍສະເພາະແມ່ນຕໍ່ນັກທຸລະກິດຍິງລາວ, ເຊິ່ງໄດ້ສັງລວມຂໍ້ມູນຕ່າງໆຈາກບົດລາຍງານກ່ຽວກັບຜົນກະທົບຂອງການລະບາດ ໂຄວິດ-19 ໃນປັດຈຸບັນ.
ໃນກອງປະຊຸມດັ່ງກ່າວ, ຜູ້ເຂົ້າຮ່ວມ ໄດ້ຮ່ວມກັນປຶກສາຫາລືຕໍ່ກັບບັນຫາຢ່າງກົງໄປກົງມາຕໍ່ກັບຫົວຂໍ້ຕ່າງໆທີ່ໄດ້ນໍາສະເໜີໃນຫ້ອງປະຊຸມ. ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ປະກອບສ່ວນເຂົ້າໃນການປະເມີນຜົນການຈັດກອງປະຊຸມຝຶກອົບຮົມເພື່ອເປັນບ່ອນອີງໃຫ້ກັບການປັບປຸງການຈັດຝຶກອົບຮົມຕ່າງໆໃນອະນາຄົດ.

ກອງປະຊຸມ ແມ່ນໄດ້ຮັບການສະໜັບສະໜູນໂດຍໂຄງການ ເສີມສ້າງຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (Lao Competitiveness and Trade Project-LCT) ທີ່ໃຫ້ທຶນໂດຍທະນາຄານໂລກ, ລັດຖະບານ ອົດສະຕຣາລີ, ລັດຖະບານ ໄອແລນ, ແລະ ລັດຖະບານ ອາເມຣິກາ, ເຊິ່ງມີເປົ້າໝາຍຫຼັກໃນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫ່ຍຂະຫຍາຍຕົວຂອງທຸລະກິດ ໂດຍໃຫ້ການຊ່ວຍເຫຼືອທາງດ້ານວິຊາການ ແລະ ງົບປະມານ ເພື່ອປັບປຸງສະພາບແວ້ດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າຂາຍ ແລະ ຍົກລະດັບຄວາມສາມາດການແຂ່ງຂັນຂອງໜ່ວຍທຸລະກິດ.