ກອງປະຊຸມທົບທວນຄືນ ການຈັດຕັ້ງປະຕິບັດ ແຜນງານໂຄງການ ສົ່ງເສີມຄວາມສາມາດ ໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL) ຄັ້ງທີ 4
ໃນວັນທີ 26 ກໍລະກົດ, 2021, ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ຮ່ວມກັບ ພະແນກອຸດສາຫະກໍາ ແລະ ການຄ້າແຂວງຂອງ 03 ແຂວງເປົ້າໝາຍ ໄດ້ຈັດກອງປະຊຸມ ທົບທວນການຈັດຕັ້ງປະຕິບັດໂຄງການ ສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກ ແລະ ສົ່ງເສີມຄວາມຍືນຍົງໃນການປະສານງານ ລະຫວ່າງພາກລັດ – ທຸລະກິດຢູ່ສາມແຂວງພາກເໜືອຂອງ ສປປ ລາວ (Promotion of Export Competitiveness in Northern Laos – ECL) ທີ່ສະໂມສອນແຂວງຫຼວງນຳ້ທາ.
ກອງປະຊຸມໄດ້ຮັບກຽດການເປັນປະທານຮ່ວມໂດຍ ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ, ແລະ ທ່ານ ອ່ອນຈັນ ຄໍາພາວົງ, ຮອງເຈົ້າແຂວງຫຼວງນໍ້າທາ. ກອງປະຊຸມໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກກົມກອງ ແລະ ພະແນກຕ່າງໆຈາກກະຊວງ ອຸດສາຫະກໍາ ແລະ ການຄ້າ, ພະແນກອຸດສາຫະກໍາ ແລະ ການຄ້າແຂວງ ແລະ ສະພາການຄ້າ ແລະ ອຸດສາຫະກໍາຈາກ 03 ແຂວງເປົ້າໝາຍ ເຊິ່ງມີຜູ້ເຂົ້ານຮ່ວມທັງໝົດຈຳນວນ 50 ທ່ານ (ຍິງ 10ທ່ານ).
ທ່ານ ສົມຈິດ ອິນທະມິດ, ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ ໄດ້ໃຫ້ກຽດກ່າວເປີດກອງປະຊຸມ ໂດຍເນັ້ນໜັກເຖິງຄວາມສໍາຄັນຂອງການສົ່ງເສີມ ການເຊື່ອມໂຍງທາງການຄ້າ, ສືບຕໍ່ເສີມສ້າງສະພາບແວດລ້ອມການດໍາເນີນທຸລະກິດ ແລະ ພັດທະນາຂີດຄວາມສາມາດໃຫ້ແກ່ທຸລະກິດຢູ່ທ້ອງຖິ່ນ, ໂດຍສະເພາະແມ່ນ ທຸລະກິດຂະໜາດນ້ອຍ ແລະ ກາງ ໃນໄລຍະສະພາບເສດຖະກິດທີ່ຖົດຖອຍ ເນື່ອງຈາກການລະບາດຂອງ COVID – 19 ຄັ້ງທີສອງ. ທ່ານຮອງລັດຖະມົນຕີ ຍັງໄດ້ກ່າວວ່າ ໂຄງການ ECL ມີຈຸດປະສົງແນໃສ່ການເພີ່ມການລົງທຶນ ແລະ ການສົ່ງອອກໃນຂະ ແໜງການເປົ້າໝາຍ, ເຊິ່ງປະກອບມີ ສາລີິ ໃນແຂວງອຸດົມໄຊ, ເຂົ້າ ໃນແຂວງຫຼວງນໍ້າທາ, ຊາ ໃນແຂວງຜົ້ງສາລີ ແລະ ຫັດຖະກໍາ ໃນສາມແຂວງດັ່ງກ່າວ, ເພື່ອເພີ່ມລາຍຮັບໃຫ້ແກ່ປະຊາຊົນຢ່າງຍືນຍົງ, ໂດຍສະເພາະແມ່ນ ແມ່ຍິງ. ທ່ານ ປະທານ ຍັງຮຽກຮ້ອງໃຫ້ທຸກພາກສ່ວນທີ່ມີສ່ວນຮ່ວມ ໃນການຈັດຕັ້ງປະຕິບັດໂຄງການ, ທັງພາກລັດ ແລະ ພາກທຸລະກິດ, ໃຫ້ເອົາໃຈໃສ່ໃນການຈັດຕັ້ງປະຕິບັດໂຄງການໃນອະນາຄົດ, ໂດຍສະເພາະແມ່ນການປັບປຸງ ການເຂົ້າເຖິງຕະຫຼາດສໍາລັບສິນຄ້າເປົ້າໝາຍທັງໝົດ ເພື່ອຮັບປະກັນຜົນສໍາເລັດໃນການຈັດຕັ້ງປະຕິບັດ ໂຄງການໃຫ້ບັນລຸຕາມເປົ້າໝາຍທີ່ໄດ້ວາງໄວ້.
ກອງປະຊຸມທົບທວນການຈັດຕັ້ງປະຕິບັດໂຄງການ ຍັງໄດ້ປຶກສາຫາລືກ່ຽວກັບຄວາມຄືບໜ້າ ແລະ ສິ່ງທ້າທາຍໃນລະຫວ່າງການຈັດຕັ້ງປະຕິບັດໂຄງການໃນ 6 ເດືອນທີ່ຜ່ານມາ, ລວມມີ 2 ອົງປະກອບ, ຄື: 01) ການເສີມສ້າງສະພາບແວດລ້ອມການດໍາເນີນທຸລະກິດທ້ອງຖິ່ນໂດຍຜ່ານ ການປັບປຸງຂັ້ນຕອນການເລີ່ມຕົ້ນທຸລະກິດ ແລະ ເວທີສົນທະນາລະຫວ່າງພາກລັດ ແລະ ພາກເອກະຊົນ; 02) ເສີມສ້າງຄວາມເຂັ້ມແຂງໃນການແຂ່ງຂັນໃນຂະແໜງການເປົ້າໝາຍ, ລວມມີ ເຄື່ອງຫັດຖະກໍາແຜ່ນແພ, ເຂົ້າ, ສາລີ ແລະ ຊາ.
ຫຼັງຈາກການປະກອບຄຳເຫັນຈາກພາກລັດ ແລະ ພາກທຸລະກິດ, ທັງສູນກາງ ແລະ ທ້ອງຖິ່ນ, ກອງປະຊຸມສາມາດຕົກລົງເຫັນໃນແຜນຈັດຕັ້ງປະຕິບັດຂອງໂຄງການ 6 ເດືອນທ້າຍປີ 2021, ເຊິ່ງລວມມີແຜນບູລິມະສິດໃນການສືບຕໍ່ເສີມສ້າງສະພາບແວດລ້ອມການດໍາເນີນທຸລະກິດ ກໍຄື ແຜນຊ່ວຍເຫຼືອດ້ານວິຊາການ ເພື່ອຊຸກຍູ້ປະສິດທິພາບໃນການຜະລິດ ແລະ ການແຂ່ງຂັນໃນຂະແໜງການເປົ້າໝາຍໃຫ້ສາມາດແຂ່ງຂັນໃນຕະຫຼາດສາກົນ.
ໂຄງການ ECL ແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
