ກອງປະຊຸມຝຶກອົບຮົມ ກ່ຽວກັບການນໍາສະເໜີ ຜະລິດຕະພັນການທ່ອງທ່ຽວ ແລະ ການຕະຫຼາດດີຈິຕອລ ໃຫ້ແກ່ຜູ້ປະກອບການແມ່ຍິງ ໃນຂະແໜງທ່ອງທ່ຽວ
ນະຄອນຫຼວງວຽງຈັນ, ວັນທີ 27 ກໍລະກົດ, 2021, ກົມພັດທະນາການທ່ອງທ່ຽວ, ກະຊວງຖະແຫຼງຂ່າວ ວັດທະນາທໍາ ແລະ ທ່ອງທ່ຽວ (ຖວທ), ໂດຍໄດ້ຮັບການສະໜັບສະໜຸນ ຈາກໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ, ໄດ້ຈັດກອງປະຊຸມຝຶກອົບຮົມ ກ່ຽວກັບການນໍາສະເໜີຜະລິດຕະພັນການທ່ອງທ່ຽວ ແລະ ການຕະຫຼາດດິຈິຕອລ ໃຫ້ແກ່ຜູ້ປະກອບການແມ່ຍິງໃນຂະແໜງທ່ອງທ່ຽວທີ່ໂຮງແຮມແລນມາກ, ພາຍໃຕ້ ການເປັນປະທານຮ່ວມຂອງ ທ່ານ ນາງ ພອນມະລີ ອິນທະພົມ, ຫົວໜ້າກົມພັດທະນາການທ່ອງທ່ຽວ, ກະຊວງ ຖວທ ແລະ ທ່ານ ໄມເຄິລ໌ ຣອນນິ້ງ, ຜູ້ຕາງໜ້າອົງການພັດທະນາສາກົນຂອງປະເທດສະຫະລັດອາເມລິກາ (USAID). ນອກນັ້ນ, ຍັງມີຜູ້ເຂົ້າຮ່ວມກໍຄື ຕາງໜ້າຈາກບັນດາກົມທີ່ກ່ຽວຂ້ອງຂອງ ກະຊວງ ຖວທ, ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກໍາ ແລະ ການຄ້າ, ວິສາຫະກິດໃນຂະແໜງການທ່ອງທ່ຽວ, ອົງການ USAID ແລະ ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ.
ທ່ານ ໄມເຄິລ໌ ຣອນນິ້ງ, ຜູ້ຕາງໜ້າອົງການ USAID ໄດ້ກ່າວວ່າ “ການຝຶກອົບຮົມນີ້ມີຈຸດປະສົງໃນການປັບປຸງທັກສະ ການນໍາໃຊ້ດິຈິຕອນເຂົ້າໃນການບໍລິຫານ ວິສາຫະກິດຂະໜາດນ້ອຍ ແລະ ກາງ (SME), ເຊິ່ງແມ່ນໜຶ່ງໃນບັນດາວຽກງານພາຍໃຕ້ການສະໜັບສະໜູນ ຂອງ ອົງການ USAID, ໂດຍມີຈຸດປະສົງ ເພື່ອຊ່ວຍສົ່ງເສີມໃຫ້ SME ສາມາດນຳໃຊ້ນະວັດຕະກຳ ແລະ ເຕັກນິກໃໝ່ໆ ເຂົ້າໃນການດໍາເນີນກິດຈະການ, ຂະຫຍາຍຊ່ອງທາງການຕະຫຼາດ, ເຂົ້າເຖິງລູກຄ້າທັງພາຍໃນ ແລະ ຕ່າງປະເທດ, ກໍຄື ການສົ່ງເສີມຄວາມສາມາດແຂ່ງຂັນໄດ້ຢ່າງມີປະສິດທິພາບ.
ໃນໄລຍະການລະບາດຂອງ ໂຄວິດ-19, ການນໍາໃຊ້ເຄື່ອງມືດິຈິຕອລ ເປັນສິ່ງທີ່ສໍາຄັນ, ເຮັດໃຫ້ທຸລະກິດສາມາດປັບຕົວເຂົ້າກັບການດຳເນີນທຸລະກິດແບບໃໝ່ (New Normal). ຂະແໜງການທ່ອງທ່ຽວ ແລະ ບັນດາຂະແໜງຕ່າງໆທີ່ກ່ຽວຂ້ອງ, ເຊິ່ງສ່ວນໃຫຍ່ແມ່ນ SME, ແມ່ນໄດ້ຮັບຜົນກະທົບຫຼາຍທີ່ສຸດ. ການຊ່ວຍເຫຼືອໃຫ້ SME ໃນການພັດທະນາທັກສະທີ່ຈໍາເປັນ ເພື່ອໃຫ້ສາມາດໝູນໃຊ້ເຄື່ອງມືທີ່ທັນສະໄໝ ເຂົ້າໃນການສົ່ງເສີມດ້ານກິດຈະກໍາການຕະຫຼາດ ແລະ ການໂຄສະນາເຂົ້າເຖິງລູກຄ້າ ຈຶ່ງເປັນວຽກງານທີ່ມີຄວາມຈໍາເປັນ ແລະ ຮີບດ່ວນ.
ຜ່ານການຝຶກອົບຮົມໃນຄັ້ງນີ້, ຜູ້ເຂົ້າຮ່ວມຈະໄດ້ຮັບຟັງການບັນຍາຍກ່ຽວກັບຄວາມຮູ້ພື້ນຖານ ແລະ ຍຸດທະສາດ ການຕະຫຼາດທາງດິຈິຕອລ, ລວມທັງເຕັກນິກການຈັດຕັ້ງປະຕິບັດຕົວຈິງ, ພາຍໃຕ້ຫົວຂໍ້ຕ່າງໆດັ່ງນີ້: ການກຳນົດເປົ້າໝາຍຂອງລູກຄ້າ, ການກຳນົດລາຄາ, ການພັດທະນາແພັກເກັດທົວ, ແລະ ແຜນການຕະຫຼາດການສື່ສານທາງດິຈິຕອລ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
