ກະຊວງອຸດສາຫະກໍາ ແລະ ການຄ້າ ຈັດກອງປະຊຸມ ຄະນະຊີ້ນໍາຂັ້ນວິຊາການ ແລະ ກອງປະຊຸມເຜີຍແຜ່ການຈັດຕັ້ງປະຕິບັດ ທຶນສົມທົບ BAF II
ນະຄອນຫຼວງວຽງຈັນ, ວັນທີ 20 ສິງຫາ 2020, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຊີ້ນໍາຂັ້ນວິຊາການ ແລະ ກອງປະຊຸມເຜີຍແຜ່ການຈັດຕັ້ງປະຕິບັດ ທຶນສົມທົບ ເພື່ອສົ່ງເສີມທຸລະກິດ ໄລຍະ 2 (BAF II) ຂຶ້ນ. ກອງປະຊຸມໃນພາກທີໜຶ່ງແມ່ນເພື່ອທົບທວນ ການຈັດຕັ້ງປະຕິບັດທຶນສົມທົບ BAF II ທີ່ຜ່ານມາ ແລະ ແລກປ່ຽນບົດຮຽນ ເພື່ອວາງແຜນບູລິມະສິດໃນອະນາຄົດ. ສ່ວນກອງປະຊຸມໃນພາກທີສອງແມ່ນເພື່ອເຜີຍແຜ່ວຽກງານທຶນສົມທົບ BAF II ໂດຍຜ່ານປະສົບການ ແລະ ຄໍາຄິດເຫັນຂອງຜູ້ໄດ້ຮັບທຶນສົມທົບ BAF II ແລະ ຜູ້ສະໜອງການບໍລິການທາງດ້ານວິຊາການໃຫ້ແກ່ຜູ້ໄດ້ຮັບທຶນ BAF II ທີ່ມີຕໍ່ການຈັດຕັ້ງປະຕິບັດທຶນສົມທົບໂດຍລວມ.
ກອງປະຊຸມດັ່ງກ່າວໄດ້ຮັບກຽດການເປັນປະທານໂດຍ ທ່ານນາງ ລັດຕະນະພອນ ວົງສຸທິ, ຫົວໜ້າພະແນກຄຸ້ມຄອງການຈັດຕັ້ງປະຕິບັດໂຄງການຊ່ວຍເຫຼືອຂອງຕ່າງປະເທດ (NIU), ຕາງໜ້າໃຫ້ກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ.
ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມໂດຍບັນດາຜູ້ຕາງໜ້າຈາກກົມກອງອ້ອມຂ້າງ, ພະແນກພາຍໃຕ້ກົມແຜນການ ແລະ ການຮ່ວມມື, ພະແນກອຸດສາຫະກໍາ ແລະ ການຄ້ານະຄອນຫຼວງ, ທີມງານ ທຶນສົມທົບ BAF II ແລະ ຕາງໜ້າຈາກບໍລິສັດທີ່ຮັບທຶນສົມທົບ BAF II ແລະ ບໍລິສັດສະໜອງການບໍລິການ (ໂຮງງານຜະລິດກະແລ້ມ ບ້ານ ບ້ານ, ຮ້ານ ມີມີລືມ ຄາເຟ້, ບໍລິສັດ 57 ໄບ້ສ ຈໍາກັດ, ບໍລິສັດ JMS Business Solutions ແລະ ບໍລິສັດ MR International Standard Consulting) ລວມທັງໝົດ 50 ທ່ານ.
ທ່ານ ນາງ ລັດຕະນະພອນ ວົງສຸທິ, ຫົວໜ້າພະແນກ NIU, ຕາງໜ້າໃຫ້ກົມແຜນການ ແລະ ການຮ່ວມມື ທ່ານໄດ້ກ່າວເປີດກອງປະຊຸມວ່າ: ກອງປະຊຸມໃນມື້ນີ້ ແມ່ນມີຄວາມໝາຍຄວາມສຳຄັນຫຼາຍ ໃນການປຶກສາຫາລືຜົນໄດ້ຮັບໃນການຈັດຕັ້ງປະຕິບັດໄລຍະຜ່ານມາ, ບັນດາສິ່ງທ້າທາຍ ແລະ ທິດທາງການດຳເນີນແຜນງານໃນຕໍ່ໜ້າ ເພື່ອໃຫ້ວຽກງານທຶນສົມທົບດັ່ງກ່າວ ຂອງພວກເຮົາສາມາດບັນລຸຕາມເປົ້າໝາຍ. ດັ່ງນັ້ນ, ຂ້າພະເຈົ້າ ຈຶ່ງຮຽກຮ້ອງມາຍັງທ່ານ ເອົາໃຈໃສ່ຮັບຟັງການນໍາສະເໜີ ແລະ ສົນທະນາຢ່າງກົງໄປກົງມາ ເພື່ອສະໜັບສະໜູນໃນການປັບປຸງການຈັດຕັ້ງປະຕິບັດ ທຶນສົມທົບ ໃຫ້ດີຂຶ້ນ ເນື່ອງຈາກວ່າ ທຶນສົມທົບ ເປັນວຽກງານໜຶ່ງໃນເສົາຄໍ້າພາຍໃຕ້ໂຄງການ ສົ່ງເສີມຄວາມສາມາດໃນການແຂ່ງຂັນ ແລະ ການຄ້າ (LCT), ເຊິ່ງໄດ້ຮັບການເພີ່ມທຶນ ແລະ ຂະຫຍາຍເວລາການຈັດຕັ້ງປະຕິບັດກິດຈະກໍາ, ລວມທັງທຶນສົມທົບ BAF II, ຈາກຈໍານວນທຶນສົມທົບ 300 ທຶນ ສິ້ນສຸດໃນທ້າຍປີ 2022 ມາເປັນ 500 ທຶນ ສິ້ນສຸດໃນທ້າຍປີ 2024.
ໃນລະຫວ່າງກອງປະຊຸມ, ຜູ້ເຂົ້າຮ່ວມກອງປະຊຸມໄດ້ຮັບຟັງການນໍາສະເໜີ ແລະ ແລກປ່ຽນຄໍາຄິດເຫັນກ່ຽວກັບຜົນສໍາເລັດ (ອະນຸມັດທຶນສົມທົບ ຈໍານວນ 192 ທືນ ແລະ ເບີດຈ່າຍ ຈໍານວນ 106 ທຶນ), ສິ່ງທ້າທາຍ ແລະ ແຜນບູລິມະສິດໃນການຈັດຕັ້ງປະຕິບັດທຶນສົມທົບ BAF II. ນອກຈາກນີ້, ຍັງໄດ້ໃຫ້ໂອກາດແກ່ບໍລິສັດທີ່ໄດ້ຮັບທຶນສົມທົບ BAF II ແລະ ບໍລິສັດທີ່ສະໜອງການບໍລິການໃຫ້ແກ່ບໍລິສັດທີ່ໄດ້ຮັບການສະໜັບສະໜູນຈາກທຶນສົມທົບ BAF II ໄດ້ແລກປ່ຽນກ່ຽວກັບປະສົບການຕໍ່ກັບການຈັດຕັ້ງປະຕິບັດວຽກງານທຶນສົມທົບ BAF II.
ສຸດທ້າຍນີ້, ທ່ານນາງ ລັດຕະນະພອນ ວົງສຸທິ, ຫົວໜ້າພະແນກ NIU, ໄດ້ໃຫ້ກຽດກ່າວປິດກອງປະຊຸມໂດຍການສະແດງຄວາມຂອບໃຈມາຍັງບັນດາຜູ້ເຂົ້າຮ່ວມ ແລະ ບໍລິສັດທີ່ເປັນຜູ້ຕັ້ງໜ້າປະກອບສ່ວນເຂົ້າໃນກອງປະຊຸມດັ່ງກ່າວ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມ ເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມ ດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
