ກອງປະຊຸມປຶກສາຫາລື ລະຫວ່າງພາກລັດ ແລະ ພາກທຸລະກິດຂັ້ນແຂວງ ລະດັບວິຊາການ ໃນຂະແໜງການທ່ອງທ່ຽວ ແລະ ກະສິກໍາ
ວັນທີ 30 ກໍລະກົດ 2021, ນະຄອນ ປາກເຊ, ແຂວງຈໍາປາສັກ. ສະພາການຄ້າ ແລະ ອຸດສາຫະກໍາແຂວງ ຈໍາປາສັກ ຮ່ວມກັບ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກ, ພາຍໃຕ້ການສະໜັບສະໜູນ ຂອງໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID), ໄດ້ຈັດກອງປະຊຸມປຶກສາຫາລື ລະຫວ່າງພາກລັດ ແລະ ພາກທຸລະກິດຂັ້ນແຂວງລະດັບວິຊາການໃນຂະແໜງການທ່ອງທ່ຽວ ແລະ ກະສິກໍາ ທີ່ໂຮງແຮມ ຈໍາປາສັກ ແກຣນ.
ຈຸດປະສົງຫຼັກຂອງກອງປະຊຸມແມ່ນເພື່ອເຕົ້າໂຮມ ແລະ ເປີດໂອກາດໃຫ້ຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງ ພາກລັດ ແລະ ພາກທຸລະກິດ ຂອງແຂວງຈໍາປາສັກໄດ້ຮ່ວມປຶກສາຫາລືກ່ຽວກັບການຮ່ວມມືເພື່ອປັບປຸງສະພາບແວດ ລ້ອມໃນການດໍາເນີນທຸລະກິດຂັ້ນແຂວງໃຫ້ດີຂຶ້ນ, ແລະ ກໍານົດນະໂຍບາຍທີ່ຈະສາມາດຊ່ວຍໃຫ້ ພາກທຸລະກິດຟື້ນຕົວ ຈາກຜົນກະທົບທາງດ້ານເສດຖະກິດ ຈາກການລະບາດຂອງ ໂຄວິດ-19. ບັນຫາທີ່ຍົກຂຶ້ນໃນກອງປະຊຸມມື້ນີ້ ແມ່ນອີງໃສ່ຜົນຂອງກອງປະຊຸມພາກທຸລະກິດ ທີ່ໄດ້ຈັດຂຶ້ນໃນເດືອນກໍລະກົດ 2021 ທີ່ຜ່ານມາ.
ກອງປະຊຸມດັ່ງກ່າວ ແມ່ນໄດ້ຮັບກຽດເປັນປະທານຮ່ວມໂດຍ ທ່ານ ບຸນຍະເດດ ທອງສະຫວັນ, ຫົວໜ້າພະແນກອຸດ ສາຫະກຳ ແລະ ການຄ້າ ແຂວງຈໍາປາສັກ ແລະ ທ່ານ ນາງ ບຸນເຮືອງ ແຄຣໍ ລິດດັງ, ປະທານສະພາການຄ້າ ແລະ ອຸດສາ ຫະກໍາ ແຂວງຈໍາປາສັກ. ນອກນັ້ນ, ຍັງມີບັນດາຜູ້ເຂົ້າຮ່ວມກໍຄື ຕາງໜ້າຈາກ ຂະແໜງການທີ່ກ່ຽວຂ້ອງຂອງພາກລັດ ແລະ ສະມາຊິກໜ່ວຍງານປຶກສາຫາລືພາກທຸລະກິດ ໃນຂະແໜງການທ່ອງທ່ຽວ ແລະ ກະສິກໍາ ທັງໝົດຫຼາຍກວ່າ 40 ທ່ານ.
ທ່ານ ບຸນຍະເດດ ທອງສະຫວັນ, ຫົວໜ້າພະແນກອຸດສາຫະກຳ ແລະ ການຄ້າ ແຂວງຈໍາປາສັກ, ໄດ້ກ່າວໃນບົດກ່າວເປີດກອງປະຊຸມວ່າ “ເພື່ອເຮັດໃຫ້ ກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ ມີຄວາມເຂັ້ມແຂງ, ໝັ້ນຄົງ, ເຊື່ອມໂຍງ ແລະ ເປັນເອກະພາບກັບ ກົນໄກຂັ້ນສູນກາງ, ສືບຕໍ່ຜະລິດໝາກຜົນອັນສຳຄັນຂອງການປຶກສາຫາລືໃຫ້ມີປະສິດທິພາບ ແລະ ປະສິດທິຜົນນີ້, ຈຶ່ງສະເໜີໃຫ້ບັນດາພະແນກການທີ່ກ່ຽວຂ້ອງຂອງແຂວງ ເປັນເຈົ້າການຫຼັກຮ່ວມກັນ, ໃນການຈັດຕັ້ງປະຕິບັດຂະບວນການປຶກສາຫາລືນີ້ ຢ່າງເປັນລະບົບ, ມີກົນໄກການຕິດຕາມປະສານງານກັນຢ່າງໃກ້ຊິດ ແລະ ຕໍ່ເນື່ອງ, ເພື່ອສ້າງໃຫ້ເປັນໜຶ່ງໃນຂະບວນການສຳຄັນຂອງແຂວງ ທີ່ສາມາດແກ້ໄຂບັນຫາຕ່າງໆໃນການດຳເນີນທຸລະກິດ ແລະ ເປັນຕົວຊ່ວຍໃນການຕິດຕາມການຈັດຕັ້ງລະບຽບກົດໝາຍທີ່ລັດວາງອອກ ໃນຂົງເຂດທ້ອງຖິ່ນ”.
ທ່ານ ນາງ ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ ຮຽກຮ້ອງໃຫ້ພາກ ລັດໃຫ້ການສະໜັບສະໜູນໃນການແກ້ໄຂບັນຫາຂໍ້ຫຍຸ້ງຍາກຕ່າງໆ ທີ່ເປັນອຸປະສັກແກ່ການດໍາເນີນທຸລະກິດຂອງພາກ ທຸລະກິດ ເພື່ອເລັງໃສ່ການຟື້ນຟູເສດຖະກິດ ຂອງແຂວງຈາກວິກິດການຂອງການລະບາດຂອງ ໂຄວິດ – 19.
ກອງປະຊຸມໄດ້ປຶກສາຫາລື 9 ບັນຫາບູລິມະສິດຂອງຂະແໜງການທ່ອງທ່ຽວ ແລະ 10 ບັນຫາບູລິມະສິດຂອງຂະແໜງ ກະສິະກໍາ, ເຊິ່ງລວມມີ: ການດໍາເນີນທຸລະກິດທິ່ບໍ່ເປັນທາງການ, ການເຂົ້າເຖິງແຫຼ່ງທຶນກູ້ຢືມ, ລະບຽບ ແລະ ກົດໝາຍ ທີ່ຍັງບໍ່ສອດຄ່ອງຢູ່ຂັ້ນແຂວງ, ການເກັບຄ່າທໍານຽມທີ່ສູງ, ບັນຫາທີ່ຕິດພັນກັບການຂົນສົ່ງຂ້າມແດນ, ຂັ້ນຕອນການ ແຈ້ງພາສີ, ດ່ານຂົນສົ່ງ, ອາກອນ ແລະ ໂຄຕ້າການສົ່ງອອກ.
ກອງປະຊຸມສາມາດຕົກລົງເປັນເອກະພາບໃນບາງຂໍ້ສະເໜີຂອງພາກທຸລະກິດ ແລະ ເຫັນດີຈະສືບຕໍ່ຫາວິທີແກ້ໄຂ ຮ່ວມກັນ ສໍາລັບບັນຫາທີ່ຖືກຍົກຂຶ້ນ ແລະ ຍັງບໍ່ທັນສາມາດແກ້ໄຂໄດ້ໃນກອງປະຊຸມຄັ້ງນີ້.
ໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ ຈະສືບຕໍ່ເຮັດວຽກຢ່າງໃກ້ຊິດກັບສະພາການຄ້າ ແລະ ອຸດສາຫະກຳແຫ່ງຊາດລາວ, ສະໜັບສະໜຸນສະພາການຄ້າ ແລະ ອຸດສາຫະກຳ ແລະ ພະແນກອຸດສາຫະກໍາ ແລະ ການຄ້າ ແຂວງຈໍາປາສັກໃນການຕິດຕາມປະສານງານກັບຂະແໜງການທີ່ກ່ຽວຂ້ອງພາກລັດຢ່າງໃກ້ຊິດ ແລະ ຕໍ່ເນື່ອງ ເພື່ອຮັບປະກັນບັນຫາຂອງພາກທຸລະກິດໄດ້ຮັບການແກ້ໄຂໂດຍໄວ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
