USAID ແລະ ສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຈັດ ກອງປະຊຸມແລກປ່ຽນ ສົນທະນາດ້ານນະໂຍບາຍ ຄັ້ງທີ 2
ວັນທີ 02 ກັນຍາ 2021, ທີ່ ນະຄອນຫຼວງວຽງຈັນ. ສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ), ໂດຍການສະໜັບສະໜູນ ຂອງໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment) ໄດ້ຈັດກອງປະຊຸມແລກປ່ຽນສົນທະນາດ້ານນະໂຍບາຍ ຄັ້ງທີ 2 ໃນຮູບແບບກອງປະຊຸມທາງໄກ, ໂດຍການເປັນປະທານຮ່ວມຂອງ ທ່ານ ນາງ ວາລີ ເວດສະພົງ, ຮອງປະທານ ສຄອຊ, ແລະ ທ່ານ ຄູເລິນ ຮິວຊ໌, ຫົວໜ້າຫ້ອງການພັດທະນາ ດ້ານເສດຖະກິດ, ການສຶກສາ ແລະ ພະລັງງານ, ອົງການພັດທະນາສາກົນປະເທດສະຫະລັດອາເມລິກາ (USAID). ພ້ອມນັ້ນ, ກໍມີບັນດາຜູ້ເຂົ້າຮ່ວມ ຫຼາຍກວ່າ 85 ທ່ານ, ເຊິ່ງປະກອບມີຜູ້ຕາງໜ້າຂະແໜງການທີ່ກ່ຽວຂ້ອງທາງພາກລັດ, ເຊັ່ນ: ກະຊວງໂຍທາທິການ ແລະ ຂົນສົ່ງ, ກະຊວງກະສິກໍາ ແລະ ປ່າໄມ້, ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ບັນດາສະມາຄົມທຸລະກິດ, ສະຖາບັນການສຶກສາ-ຄົ້ນຄວ້າດ້ານເສດຖະກິດການຄ້າ ແລະ ຫົວໜ່ວຍທຸລະກິດທີ່ກ່ຽວຂ້ອງ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເປັນເວທີໃຫ້ຜູ້ປະກອບການທຸລະກິດ ແລະ ໜ່ວຍງານພາກລັດ ແລກປ່ຽນຄວາມຄິດເຫັນກ່ຽວກັບ “ການຫັນປ່ຽນຈາກເປັນປະເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນ ປະເທດເຊື່ອມຈອດພາກພື້ນ ແລະ ສາກົນ, ໂດຍສະເພາະ ສິ່ງທ້າທາຍ ແລະ ໂອກາດທາງດ້ານເສດຖະກິດສໍາລັບ ພາກທຸລະກິດ ໃນຂະແໜງການທ່ອງ ທ່ຽວ, ກະສິກໍາ ແລະ ຂົນສົ່ງ.
ທ່ານ ນາງ ວາລີ ເວດສະພົງ, ຮອງປະທານ ສຄອຊ ໄດ້ກ່າວເປີດກອງປະຊຸມວ່າ: “ສະພາການຄ້າ ແລະ ອຸດສະຫາກໍາ ແຫ່ງຊາດລາວ ໄດ້ຈັດກອງປະຊຸມດັ່ງກ່າວຂຶ້ນເພື່ອເປັນເວທີສົນທະນາ ກະຕຸ້ນໃຫ້ພາກທຸລະກິດໄດ້ມີການປຶກສາຫາລື ແລກປ່ຽນບົດຮຽນເຊິ່ງກັນ ແລະ ກັນ ໃນການກະກຽມຄວາມພ້ອມເພື່ອຮັບເອົາໂອກາດອັນໃໜ່ ຈາກການເປີດ ແລະ ນໍາໃຊ້ ເສັ້ນທາງລົດໄຟລາວ-ຈີນ, ໂດຍສະເພາະໃນຍຸກສະໄໜທີ່ມີການແຂ່ງຂັນ ແລະ ໃນສະພາບທີ່ພາກທຸລະກິດປະເຊີນໜ້າກັບວິກິດການລະບາດຂອງ ໂຄວິດ-19”.
ທ່ານ ຄູເລິນ ຮິວຊ໌, ຫົວໜ້າຫ້ອງການພັດທະນາ ດ້ານເສດຖະກິດ, ການສຶກສາ ແລະ ພະລັງງານ, ອົງການ USAID ໄດ້ປະກອບຄໍາເຫັນໃນກອງປະຊຸມວ່າ: “ກອງປະຊຸມແລກປ່ຽນສົນທະນານີ້ ຍັງເປັນເວທີໃຫ້ແກ່ຜູ້ກໍານົດນະໂຍບາຍ ແລະ ພາກທຸລະກິດ ຮ່ວມກັນປຶກສາຫາລືຢ່າງສ້າງສັນ ແລະ ກົງໄປກົງມາ, ເພື່ອຮັບປະກັນວ່າການເຊື່ອມໂຍງທາງລົດໄຟນີ້ ຈະສາມາດເປັນຕົວປ່ຽນສໍາຄັນທີ່ຈະເຂົ້າມາຊ່ວຍຊຸກຍູ້ພາກທຸລະກິດລາວ”.
ກອງປະຊຸມໄດ້ແບ່ງອອກເປັນສອງວາລະຄື: ວາລະທີ່ໜຶ່ງ ແມ່ນໄດ້ນໍາສະເໜີໂດຍ ຜູ້ຕາງໜ້າຈາກກະຊວງໂຍທາທິການ ແລະ ຂົນສົ່ງ ກ່ຽວກັບພາບລວມຂອງແຜນຍຸດທະສາດ ການເຊື່ອມໂຍງທາງລົດໄຟໂດຍສຸມໃສ່ຍຸດທະສາດການຄ່ຽນຖ່າຍສິນຄ້າ ສໍາລັບການນໍາເຂົ້າ-ສົ່ງອອກ ແລະ ການເປັນສູນກາງການບໍລິການໂລຈິດສະຕິກ.
ສໍາລັບວາລະທີສອງ ຈະເປັນເວທີປຶກສາຫາລືເພື່ອຮ່ວມກັນຄົ້ນຄວ້າຊຸກຍູ້ ພາກທຸລະກິດໃນຂະແໜງການທ່ອງທ່ຽວ, ກະສິກໍາ ແລະ ການຂົນສົ່ງ, ໃຫ້ມີໂອກາດໄດ້ຮັບຜົນປະໂຫຍດຈາກການພັດທະນາການເຊື່ອມໂຍງຜ່ານທາງລົດໄຟ. ນັກວິທະຍາກອນໃນວາລະນີ້ ປະກອບມີຕາງໜ້າຈາກກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ກະຊວງ ກະສິກໍາ ແລະ ປ່າໄມ້, ຫົວໜ່ວຍທຸລະກິດທີ່ຕິດພັນກັບການທ່ອງທ່ຽວ, ໂລຈິດສະຕິກ ແລະ ກະສິກໍາ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
