ກອງປະຊຸມປຶກສາຫາລືທາງໄກ ກ່ຽວກັບ ກົນໄກການປະສານງານ ແລະ ກະ ກຽມແຜນວຽກປີທີ 3 ສົກປີ 2022 ຂອງໂຄງການສ້າງສະພາບແວດລ້ອມທີ່ເອື້ອອໍານວຍຕໍ່ທຸລະກິດລາວ
ວັນທີ 7-8 ຕຸລາ 2021, ທີ່ ນະຄອນຫຼວງວຽງຈັນ. ກົມແຜນການ ແລະ ການຮ່ວມມື, ກະຊວງອຸດສາຫະກຳ ແລະ ການຄ້າ ຮ່ວມກັບ ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID Laos Business Environment) ຫຼື ເອີ້ນໂດຍຫຍໍ້ວ່າ ໂຄງການ USAID LBE ໄດ້ຈັດກອງປະຊຸມປຶກສາຫາລືທາງໄກ ກ່ຽວກັບ ກົນໄກການປະສານງານ ແລະ ກະກຽມແຜນວຽກປີທີ 3 ສົກປີ 2022 ຂອງໂຄງການດັ່ງກ່າວຂຶ້ນ ພາຍໃຕ້ການເປັນ ປະທ່ານຮ່ວມຂອງ ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ ແລະ ທ່ານ ເມວວິນ ສະເປັນ, ຫົວໜ້າໂຄງການ USAID LBE. ນອກນັ້ນ, ຍັງມີຜູ້ເຂົ້າຮ່ວມກໍຄື ຕາງໜ້າຈາກພາກສ່ວນຈັດຕັ້ງປະຕິບັດໂຄງການ ຈາກກະຊວງອຸດສາຫະກໍາ ແລະ ການຄ້າ, ກະຊວງ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ກະຊວງເຕັກໂນໂລຊີ ແລະ ການສື່ສານ, ກະຊວງຍຸຕິທໍາ, ສະພາການຄ້າ ແລະ ອຸດສາຫະກໍາແຫ່ງຊາດລາວ, ແລະ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ.
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອສ້າງຄວາມເຂົ້າໃຈໃຫ້ແກ່ ພາກສ່ວນຈັດຕັ້ງປະຕິບັດໂຄງການ USAID LBE ກ່ຽວກັບ ກົນໄກການປະສານງານ ແລະ ຄຸ້ມຄອງໂຄງການ. ພ້ອມທັງ, ປຶກສາຫາລືກະກຽມ (ຮ່າງ) ແຜນວຽກປີທີ 3 ສົກປີ 2022 ຂອງໂຄງການດັ່ງກ່າວ ເພື່ອນໍາສະເໜີຜ່ານກອງປະຊຸມຄະນະຄຸ້ມຄອງ ແລະ ຈັດຕັ້ງປະຕິບັດໂຄງການ (Project Review Committee Meeting) ຊຶ່ງມີແຜນຈະຈັດໃນເດືອນພະຈິກ 2021.
ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ໃນລະຫວ່າງການກ່າວບົດກ່າວເປີດ ໄດ້ຊົມເຊີຍໂຄງການ ແລະ ຂອບໃຈມາຍັງພາກສ່ວນຈັດຕັ້ງປະຕິບັດ ໂຄງການ ສໍາລັບການຮ່ວມມື ແລະ ສະໜັບສະໜູນ ເຮັດໃຫ້ໂຄງການ USAID LBE ສາມາດຈັດຕັ້ງປະຕິບັດ ແລະ ໄດ້ຮັບຜົນສໍາເລັດຕາມທີ່ໄດ້ກໍານົດໃນແຜນວຽກ. ທ່ານຮອງຫົວໜ້າກົມ, ຍັງໄດ້ເນັ້ນໃຫ້ເຫັນເຖິງຄວາມໝາຍຄວາມ ສໍາຄັນຂອງກອງປະຊຸມດັ່ງກ່າວ ຊຶ່ງຈະເປັນເວທີໃຫ້ແກ່ໂຄງການ, ພາກສ່ວນຄຸ້ມຄອງ ແລະ ຈັດຕັ້ງປະຕິບັດໂຄງການ ບໍສະເພາະແຕ່ເພື່ອສ້າງຄວາມເຂົ້າໃຈກ່ຽວກັບກົນໄກການປະສານງານ ແລະ ຄຸ້ມຄອງໂຄງການເທົ່ານັ້ນ, ແຕ່ກອງ ປະຊຸມ ຍັງຈະໄດ້ປະເມີນສະພາບການຈັດຕັ້ງປະຕິບັດໂຄງການໃນໄລຍະຜ່ານມາ ເປັນຕົ້ນແມ່ນ ສິ່ງທ້າທາຍທັງໃນ ດ້ານຂອງການປະສານງານ ແລະ ບັນຫາຕ່າງໆ ທີ່ພົບພໍ້ໃນການຈັດຕັ້ງປະຕິບັດໂຄງການໃນໄລຍະທີ່ຜ່ານມາ ເພື່ອ ຫາວິມີແກ້ໄຂຮ່ວມກັນ. ສໍາຄັນໄປກວ່ານັ້ນ ກອງປະຊຸມຈະປຶກສາຫາລື ກິດຈະກໍາ ແລະ ແຜນວຽກບູລິມະສິດຂອງ ໂຄງການ ສໍາລັບສົກປີ 2022.
ທ່ານ ເມວວິນ ສະເປັນ, ຫົວໜ້າໂຄງການ USAID LBE ໄດ້ມີຄໍາເຫັນເພີ້ມຕື່ມຕໍ່ກອງປະຊຸມວ່າ ກອງປະຊຸມຄັ້ງນີ້ແມ່ນເປັນໂອກາດອັນທີ່ທີ່ພວກເຮົາຈະໄດ້ແລກປ່ຽນ ໂອ້ລົມສົນທະນາຢ່າງກົງໄປກົງມາ ກ່ຽວກັບ ປະສົບການ, ບັນຫາ ແລະ ບົດຮຽນ ທີ່ພວກເຮົາໄດ້ພົບພໍ້ນໍາກັນ. ໂຄງການຍິນດີທີ່ຈະຮັບຟັງ ທຸກຄໍາຄິດເຫັນ ເພື່ອປັບປຸງເຮັດແນວໃດໃຫ້ການປະສານງານລະຫວ່າງໂຄງການ ແລະ ບັນດາພາກສ່ວນຈັດຕັ້ງປະຕິບັດໂຄງການ ເປັນລະບົບ ແລະ ມີປະສິດຕິຜົນ. ທ່ານ ເມວວິນ ຍັງໄດ້ກ່າວອີກວ່າ ກອງປະຊຸມຄັ້ງນີ້ ຈະຊ່ວຍໃນການຈັດຕັ້ງປະຕິບັດແຕ່ລະຈິດຈະກໍາຂອງໂຄງການໃຫ້ມີຄວາມເຊື່ອມໂຍງກັນຂອງແຕ່ລະອົງປະກອບຂອງໂຄງການ. ນອກຈາກນັ້ນ ທ່ານຍັງໄດ້ກ່າວຂອບໃຈມາຍັງ ກະຊວງ ອຸດສາຫະກໍາ ແລະ ການຄ້າ ແລະ ບັນດາຄູ່ຮ່ວມຈັດຕັ້ງປະຕິບັດໂຄງການທີ່ຍາມໃດກໍ່ໄດ້ໃຫ້ການສະໜັບສະໜຸນ ແລະ ໃຫ້ການຮ່ວມມືເປັນຢ່າງດີຕະຫລອດໄລຍະເວລາທີ່ຈັດຕັ້ງປະຕິບັດກິດຈະກໍາຂອງໂຄງການ.
ກອງປະຊຸມດັ່ງກ່າວ ໄດ້ດໍາເນີນເປັນເວລາ ໜຶ່ງວັນ ເຄິ່ງ. ໃນວັນທີ 7 ຕຸລາ 2021 ຜູ້ເຂົ້າຮ່ວມ ໄດ້ຮັບຟັງການ ການນໍາສະເໜີກ່ຽວກັບ ພາບລວມຂອງໂຄງການ, ກົນໄກການປະສານງານ ແລະ ຄຸ້ມຄອງການຈັດຕັ້ງປະຕິບັດໂຄງ ການ, ລວມທັງ ໜ້າວຽກ ແລະ ຄວາມຮັບຜິດ ຊອບຂອງພາກສ່ວນຈັດຕັ້ງປະຕິບັດໂຄງການ. ພ້ອມນັ້ນ, ກອງປະ ຊຸມ ກໍໄດ້ແລກປ່ຽນສົນທະນາ ແລະ ປະກອບຄໍາເຫັນຕໍ່ ບົດນໍາສະເໜີດັ່ງກ່າວ, ໂດຍສະເພາະ ສິ່ງທ້າທາຍດ້ານການ ປະສານງານ ແລະ ທິດທາງໃນຕໍ່ໜ້າ. ໃນວັນທີ 8 ຕຸລາ 2021 ກອງປະຊຸມໄດ້ສຸມໃສ່ການປຶກສາຫາລືກະກຽມ ແຜນວຽກປີທີ 3 ຂອງໂຄງການ, ພາຍຫຼັງທີ່ໄດ້ມີການນໍາສະເໜີ ຜົນສໍາເລັດ ແລະ ຄວາມຄືບໜ້າການຈັດຕັ້ງປະຕິ ບັດໂຄງການປີ 2021, ກອງປະຊຸມ ກໍໄດ້ເປີດໂອກາດໃຫ້ຜູ້ເຂົ້າຮ່ວມ ກໍຄືພາກສ່ວນຈັດຕັ້ງປະຕິບັດໂຄງການ ໄດ້ນໍາສະເໜີແຜນວຽກບູລິມະສິດ ແລະ ກິດຈະກໍາ ໃນຂົງເຂດວຽກງານຂອງຕົນ ທີ່ເຫັນວ່າສອດຄ່ອງ ກັບເປົ້າ ໝາຍຂອງໂຄງການ ແລະ ຕ້ອງການການຊ່ວຍເຫຼືອຈາກໂຄງການ. ທີມໂຄງການ, ຈຸດປະສານງານຫຼັກ, ຈຸດປະສານ ງານດ້ານວິຊາການ ຂອງແຕ່ລະອົງປະກອບຂອງໂຄງການ ໄດ້ມີການປຶກສາຫາລື, ປະກອບຄໍາເຫັນ ແລະ ສາມາດສະ ຫຼຸບສັງລວມກິດຈະກໍາບູລິມະສິດສໍາລັບແຜນວຽກປີ 2022 ຂອງໂຄງການ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
