ອົງການ USAID ໃຫ້ການສະໜັບສະໜຸນ ການຝຶກອົບຮົມ ເພື່ອເພີ່ມທັກສະ ໃຫ້ແກ່ກອງເລຂາ ຂອງສະພາການຄ້າ ແລະ ອຸດສາຫະກໍາ ແຂວງຈໍາປາສັກ ແລະ ຜູ້ປະສານງານ ກົນໄກປຶກສາຫາລືພາກລັດ-ທຸລະກິດ (LPPD)
ວັນທີ 22 ກໍລະກົດ 2021, ນະຄອນປາກເຊ, ແຂວງຈໍາປາສັກ. ໂຄງການສ້າງສະພາບແວດລ້ອມ ທີ່ເອື້ອອຳນວຍຕໍ່ທຸລະກິດລາວ ໂດຍການຮ່ວມມຶກັບ ສະພາການຄ້າ ແລະ ອຸດສາຫະກໍາແຫ່ງຊາດ (ສຄອຊ) ແລະ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ (ສຄອ.ຈສ) ຈັດຊຸດຝຶກອົບຮົມ ເພື່ອເພີ່ມທັກສະ ໃນການຈັດຕັ້ງປະຕິບັດກົນໄກປຶກສາຫາລື ພາກລັດ ແລະ ພາກທຸລະກິດ ໃຫ້ແກ່ກອງເລຂາ ແລະ ຜູ້ປະສານງານກົນໄກດັ່ງກ່າວ ປະຈໍາ ສຄອ.ຈສ. ກອງປະຊຸມຝຶກອົບຮົມ ແມ່ນໄດ້ຈັດຂື້ນເປັນເວລາ 02 ວັນ ແຕ່ວັນທີ 22 -23 ພະຈິກ ຢູ່ທີ່ໂຮງແຮມຈໍາປາສັກແກຼນ, ນະຄອນປາກເຊ.
ຈຸດປະສົງຂອງກອງປະຊຸມຝຶກອົບຮົມຄັ້ງນີ້ ແມ່ນເພື່ອແນໃສ່ປັບປຸງ ແລະ ເສີມສ້າງຄວາມອາດສາມາດ ຂອງກອງເລຂາ ແລະ ຜູ້ປະສານງານ ຂອງກົນໄກ LPPD ໃນທັກສະດ້ານການອໍານວຍຄວາມສະດວກ ໃນກອງປະຊຸມ ເພື່ອໃຫ້ສາມາດຈັດຕັ້ງປະຕິບັດໜ້າທີ່ຂອງກອງເລຂາໄດ້ຢ່າງມີປະສິດທິພາບ, ໂດຍສະເພາະແມ່ນການບົດສະເໜີບັນຫາຕໍ່ພາກລັດທີ່ກ່ຽວຂ້ອງ. ນອກນັ້ນການຝຶກອົບຮົມຄັ້ງນີ້, ຍັງເປັນການທົບທວນຄວາມເຂົ້າໃຈກ່ຽວກັບກົນໄກ LPPD.
ກອງປະຊຸມຝຶກອົບຮົມດັ່ງກ່າວນີ້ມີຜູ້ເຂົ້າຮ່ວມທັງໝົດ 25 ຄົນ ຈາກກອງເລຂາ ສຄອ.ຈສ, ແລະ ຜູ້ປະສານງານ ກົນໄກ LPPD ທັງພາກລັດ ແລະ ພາກທຸລະກິດ.
ໃນພິທີເປີດກອງປະຊຸມຝຶກອົບຮົມ, ທ່ານ ນາງ ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກໍາ ແຂວງຈໍາປາສັກ, ໄດ້ກ່າວບາງຕອນວ່າ: ເພື່ອໃຫ້ບັນລຸຈຸດປະສົງຂອງການຝຶກອົບຮົມຄັ້ງນີ້, ຂໍໃຫ້ທຸກທ່ານປະກອບສ່ວນຢ່າງຕັ້ງໜ້າ, ພ້ອມທັງມີການຄົ້ນຄວ້າ-ສົນທະນາ ແລກປ່ຽນບົດຮຽນກັນ ຢ່າງກົງໄປກົງມາ ແລະ ມີຄວາມສ້າງສັນ. ຂ້າພະເຈົ້າມີຄວາມເຊື່ອໝັ້ນຢ່າງສູງຕໍ່ວິທະຍາກອນ ທີ່ຈະຊ່ວຍເສີມສ້າງຄວາມຮູ້ຄວາມສາມາດເພຶ່ອຜົນສໍາເລັດໃນການຈັດຕັ້ງປະຕິບັດວຽກງານຕາມພາລະບົດບາດຂອງ ສຄອ.ຈສ ໃຫ້ມີປະສິດທິພາບ ແລະ ມີຄວາມໝັ້ນຄົງ.
ເພື່ອເພີ້ມພູນປະສົບການ ການຮຽນຮູ້ຂອງຜູ້ເຂົ້າຮ່ວມ, ກອງປະຊຸມຝຶກອົບຮົມ ໄດ້ນໍາເອົາທັງທິດສະດີ ແລະ ພາກປະຕິບັດ ລວມທັງນໍາໃຊ້ຮູບແບບການຮຽນຮູ້ອື່ນໆ ເພື່ອຊ່ວຍໃຫ້ຜູ້ເຂົ້າຮ່ວມໄດ້ມີໂອກາດ ແບ່ງປັນປະສົບການ, ແລະ ນໍາໃຊ້ສິ່ງທີ່ໄດ້ຮຽນຮູ້ເຂົ້າໃນພາກປະຕິບັດຕົວຈິງໄດ້.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
