ອົງການພັດທະນາສາກົນຂອງສະຫະລັດອາເມລິກາ (USAID) ສະໜັບໜູນການຈັດກອງປະຊຸມທຸລະກິດ ແຂວງຈຳປາສັກ ປະຈຳປີຄັ້ງທໍາອິດ
ວັນທີ 15 ມີນາ 2022, ນະຄອນປາກເຊ ແຂວງຈໍາປາສັກ. ສະພາການຄ້າ ແລະ ອຸດສາຫະກຳແຂວງຈຳປາສັກ (ສຄອ ຈສ) ຮ່ວມກັບ ພະແນກອຸດສາຫະກຳ ແລະ ການຄ້າ (ຄອ) ແຂວງຈໍາປາສັກ ແລະ ຄະນະກໍາມະການອໍານວຍຄວາມສະດວກດ້ານການຄ້າແຂວງ ໄດ້ຈັດກອງປະຊຸມທຸລະກິດແຂວງຈຳປາສັກ ປະຈຳປີຂຶ້ນ, ໂດຍການເປັນປະທານຂອງ ທ່ານ ສົມບູນ ເຮືອງວົງສາ, ຮອງເຈົ້າແຂວງ ແຂວງຈຳປາສັກ, ເຊິ່ງກອງປະຊຸມດັ່ງກ່າວໄດ້ຮັບການສະໜັບສະໜູນໂດຍອົງການພັດທະນາສາກົນຂອງສະຫະລັດອາເມລິກາ ໂດຍຜ່ານໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (USAID-LBE). ຈຸດປະສົງຂອງກອງປະຊຸມດັ່ງກ່າວແມ່ນເປັນເວທີໃຫ້ພາກລັດ ແລະ ພາກເອກະຊົນໄດ້ປຶກສາຫາລືກັນກ່ຽວກັບຄວາມຄືບໜ້າ ແລະ ສິ່ງທ້າທາຍໃນວຽກງານການປັບປຸງສະພາບແວດລ້ອມທີ່ເອື້ອອຳນວຍໃຫ້ແກ່ບັນດາທຸລະກິດຂະໜາດນ້ອຍ ແລະ ກາງ (SMEs) ຂອງແຂວງຈຳປາສັກ.
ກອງປະຊຸມຄັ້ງນີ້ ມີຜູ້ເຂົ້າຮ່ວມທັງໝົດ 60 ທ່ານ ເຊິ່ງເປັນຜູ້ຕາງໜ້າຈາກພະແນກຕ່າງໆຂອງແຂວງຈຳປາສັກ, ບັນດາສະພາການຄ້າ ແລະ ອຸດສາຫະກຳຈາກ 4 ແຂວງພາກໃຕ້, ບັນດາຫົວໜ່ວຍທຸລະກິດ, ນັກລົງທຶນຕ່າງປະເທດພາຍໃນແຂວງຈຳປາສັກ ແລະ ບັນດາອົງການຈັດຕັ້ງສາກົນຕ່າງໆ.
ໃນບົດກ່າວເປີດກອງປະຊຸມ, ທ່ານ ສົມບູນ ເຮືອງວົງສາ, ຮອງເຈົ້າແຂວງ ແຂວງຈຳປາສັກ, ໄດ້ກ່າວວ່າ: “ກອງປະຊຸມທຸລະກິດ ແຂວງຈຳປາສັກປະຈຳປີເປັນເວທີທີ່ສໍາຄັນໃນການເສີມສ້າງການປະສານງານ ແລະ ການປຶກສາຫາລືລະຫວ່າງພາກລັດ ແລະ ພາກເອກະຊົນເພື່ອແກ້ໄຂສິ່ງທ້າທາຍທີ່ພາກທຸລະກິດທ້ອງຖິ່ນຂອງພວກເຮົາປະເຊີນ.
ສິ່ງສໍາຄັນແມ່ນມີຄວາມຈຳເປັນໃນການຮັບປະກັນໃຫ້ກອງປະຊຸມດັ່ງກ່າວສືບຕໍ່ເປັນກົນໄກສໍາຄັນໃນການສະໜັບສະໜູນ ແລະ ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ພາກເອກະຊົນໃນການດໍາເນີນທຸລະກິດພາຍໃນແຂວງຈຳປາສັກ, ໂດຍຜ່ານການເພີ່ມທະວີການປະສານງານລະຫວ່າງ ບັນດາຂະແໜງການຂອງແຂວງທີ່ກ່ຽວຂ້ອງ, ລວມທັງ ພະແນກອຸດສາຫະກຳ ແລະ ການຄ້າ ແລະ ສະພາການຄ້າ ແລະ ອຸດສາຫະກຳແຂວງຈຳປາສັກ”
ໃນກອງປະຊຸມ ໄດ້ມີການປຶກສາຫາລືບັນຫາສຳຄັນຄື: 1) ທັດສະນະຂອງບັນດາທຸລະກິດທ້ອງຖິ່ນໃນການດຳເນີນທຸລະກິດຢູ່ແຂວງຈຳປາສັກ; 2) ທັດສະນະຂອງນັກລົງທຶນຕ່າງປະເທດກ່ຽວກັບສິ່ງທ້າທາຍ ແລະ ກາລະໂອກາດໃນການດຳເນີນທຸລະກິດຢູ່ແຂວງຈຳປາສັກ; 3) ຄວາມຄືບໜ້າ ແລະ ຜົນສຳເລັດພາຍໃຕ້ກົນໄກການປຶກສາຫາລືລະຫວ່າງ ພາກລັດ ແລະ ພາກທຸລະກິດຂັ້ນແຂວງ (LPPD) ໃນຂະແໜງການທ່ອງທ່ຽວ ແລະ ຂະແໜງກະສິກຳ; ແລະ 4) ຄວາມຄືບໜ້າຂອງກິດຈະກຳທີ່ຕິດພັນກັບການອຳນວຍຄວາມສະດວກດ້ານການຄ້າ.
ທ່ານ ນ. ບຸນເຮືອງ ແຄຣໍ ລິດດັງ, ປະທານ ສະພາການຄ້າ ແລະ ອຸດສາຫະກຳແຂວງຈຳປາສັກໄດ້ກ່າວວ່າ: ”ການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຢ່າງຫຼວງຫຼາຍຕໍ່ບັນດາທຸລະກິດໃນແຂວງຈຳປາສັກ, ເຮັດໃຫ້ອັດຕາການເຕີບໂຕທາງດ້ານເສດຖະກິດຫຼຸດລົງ. ກອງປະຊຸມທຸລະກິດແຂວງຈຳປາສັກປະຈຳປີນີ້ຈະເປັນກົນໄກທີ່ສຳຄັນລະຫວ່າງພາກລັດຖະບານ ແລະ ພາກເອກະຊົນເພື່ອສະຫນັບສະຫນູນການປັບປຸງ ສະພາບແວດລ້ອມການດຳເນີນທຸລະກິດໃນໄລຍະການຟື້ນຟູໃນຍຸກ “ປົກກະຕິຮູບແບບໃຫມ່” ພ້ອມທັງສະແດງຄວາມຂອບໃຈຕໍ່ໂຄງການ USAID-LBE ທີ່ໄດ້ສະໜັບໜູນການຈັດກອງປະຊຸມທຸລະກິດແຂວງຈຳປາສັກປະຈຳປີ ແລະ ກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດ (LPPD) ຂັ້ນແຂວງຈຳປາສັກ”.
ທ່ານ ປ.ອ. ບຸນຍະເດດ ທອງສະຫວັນ, ຫົວໜ້າພະແນກ ອຸດສາຫະກຳ ແລະ ການຄ້າແຂວງ ໄດ້ລາຍງານຕໍ່ກອງປະຊຸມວ່າ: “ບັນຫາທີ່ພາກເອກະຊົນປະເຊີນໄດ້ຖືກລາຍງານ ແລະ ສັງລວມ, ໂດຍຜ່ານການຈັດກອງປະຊຸມພາຍໃຕ້ກົນໄກ LPPD. ພະແນກອຸດສາຫະກຳ ແລະ ການຄ້າແຂວງຈະຮ່ວມມືຢ່າງໃກ້ຊິດກັບລັດຖະບານທີ່ກ່ຽວຂ້ອງຂອງແຂວງຈຳປາສັກ ເພື່ອຮັບປະກັນການຈັດຕັ້ງກອງປະຊຸມຄັ້ງນີ້”.
ທ່ານ. Cullen Hughes ຮອງຜູ້ຕາງໜ້າອົງການ USAID ປະຈໍາລາວ ກ່າວວ່າ “ກອງປະຊຸມທຸລະກິດແຂວງຈຳປາສັກປະຈຳປີຈະມີບົດບາດສໍາຄັນ ໃນການປັບປຸງຄວາມສະດວກໃນການດໍາເນີນທຸລະກິດພາຍໃນແຂວງຈຳປາສັກ ແລະ ສ້າງສະພາບແວດລ້ອມທີ່ເອື້ອອໍານວຍໃຫ້ SMEs ທ້ອງຖິ່ນຫຼາຍຂຶ້ນ, ໂດຍການແກ້ໄຂບັນຫາບູລິມະສິດຂອງພາກເອກະຊົນ, ຕິດຕາມການຈັດຕັ້ງປະຕິບັດກົດໝາຍ ແລະ ລະບຽບການສຳຄັນ ແລະ ອຳນວຍຄວາມສະດວກໃຫ້ແກ່ການເຈລະຈາລະຫວ່າງພາກລັດ ແລະ ພາກເອກະຊົນເປັນປະຈຳ.”
ໃນທ້າຍກອງປະຊຸມ, ທ່ານຮອງເຈົ້າແຂວງໄດ້ໃຫ້ທິດຊີ້ນຳກ່ຽວກັບທິດທາງ ແລະ ບາດກ້າວໃນຕໍ່ໜ້າທີ່ຈຳເປັນເພື່ອຮັບປະກັນການແກ້ໄຂບັນຫາທາງດ້ານທຸລະກິດທີ່ປະເຊີນໂດຍ SME ຂອງແຂວງຈຳປາສັກ ແບບຍືນຍົງ.
ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວໂດຍຜ່ານການສະໜັບສະໜູນຈາກ ອົງການພັດທະນາສາກົນຂອງສະຫະລັດອາເມລິກາ (USAID-LBE) ມີເປົ້າໝາຍເພື່ອຊ່ວຍລັດຖະບານ ສປປ ລາວ ໃນການປັບປຸງຄວາມສາມາດດ້ານການແຂ່ງຂັນຂອງ ວິສາຫະກິດຂະໜາດນ້ອຍ ແລະ ກາງ ໃນ ສປປ ລາວ ແລະ ສືບຕໍ່ປັບປຸງສະພາບແວດລ້ອມໃນການດຳເນີນທຸລະກິດຢູ່ ສປປ ລາວ ໃຫ້ດີຂຶ້ນ.
