ກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ ລະດັບວິຊາການ ທີ່ແຂວງຫຼວງນໍ້າທາ
ແຂວງຫຼວງນໍ້າທາ, ວັນທີ 15 ມີນາ 2022, ພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ໂດຍການສົມທົບກັບສະພາການຄ້າ ແລະ ອຸດສາຫະກຳແຂວງຫຼວງນ້ຳທາ ໄດ້ຈັດກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງລະດັບວິຊາການຂຶ້ນ ຢູ່ທີ່ ສະໂມສອນແຂວງຫຼວງນໍ້າທາ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL).
ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ, ທ່ານ ປອ ຄຳແກ້ວ ຈັນທະວົງ, ຮອງຫົວໜ້າພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ແລະ ທ່ານ ບຸນສົງ ແກ້ວມະນີວົງ, ປະທານສະພາການຄ້າ ແລະ ອຸດສາຫະກຳ ແຂວງຫຼວງນໍ້າທາ. ກອງປະຊຸມ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກພາກລັດ ແລະ ພາກທຸລະກິດເຂົ້າຮ່ວມຫຼາຍກວ່າ 50 ທ່ານ (ຍິງ 16 ທ່ານ).
ຈຸດປະສົງຂອງກອງປະຊຸມ ແມ່ນເພື່ອສືບຕໍ່ຈັດຕັ້ງປະຕິບັດຂະບວນການປຶກສາຫາລືລະຫວ່າງພາກລັດ ແລະ ພາກທຸລະກິດ ພາຍໃນແຂວງຫຼວງນ້ຳທາ. ການປຶກສາຫາລືແມ່ນໄດ້ນຳເອົາບັນດາບັນຫາບູລິມະສິດທີ່ໄດ້ຮັບການສະເໜີຈາກພາກທຸລະກິດ ເພື່ອໃຫ້ຂະແໜງການທີ່ກ່ຽວຂ້ອງພາກລັດໄດ້ຮັບຊາບ ແລະ ຫາວິທີທາງແກ້ໄຂບັນຫາຮ່ວມກັນ ເພື່ອໃຫ້ແທດເໝາະກັບສະພາບທ້ອງຖິ່ນ.
ທ່ານ ຫົວໜ້າພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ໄດ້ກ່າວໃນບົດກ່າວເປີດກອງປະຊຸມວ່າ: ໃນໄລຍະຜ່ານມາ ພວກເຮົາຍັງພົບກັບສິ່ງທ້າທາຍຫຼາຍຢ່າງໃນການຈັດຕັ້ງປະຕິບັດບັນດາລະບຽບກົດໝາຍໃໝ່ ທີ່ປະກາດໃຊ້ໃນຂອບເຂດທົ່ວປະເທດ, ໂດຍສະເພາະກໍ່ແມ່ນຄວາມບໍ່ເປັນເອກະພາບລະຫວ່າງຂັ້ນສູນກາງ ແລະ ທ້ອງຖິ່ນ ແລະ ລະຫວ່າງທ້ອງຖິ່ນດ້ວຍກັນ, ໃນການປະຕິບັດລະບຽບການຕ່າງໆ ເຊິ່ງລ້ວນແຕ່ເປັນສິ່ງທ້າທາຍໃຫ້ແກ່ການກໍ່ຕັ້ງ ແລະ ຂະຫຍາຍທຸລະກິດ ກໍ່ຄືການສ້າງວຽກເຮັດງານທຳ ແລະ ການລົບລ້າງຄວາມທຸກຍາກ.
ທ່ານ ແສງພະນົມຈອນ ອິນທະສານ, ຮອງຫົວໜ້າກົມແຜນການ ແລະ ການຮ່ວມມື, ກະຊວງອຸດສາຫະກໍາ ແລະ ການຄ້າ ກໍໄດ້ເນັ້ນໜັກເຖິງຄວາມສໍາຄັນໃນການຈັດຕັ້ງປະຕິບັດກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງເພື່ອປັບປຸງ ສະພາບແວດລ້ອມໃນການດຳເນີນທຸລະກິດຂອງແຂວງ. ຂະບວນການດັ່ງກ່າວນີ້ໄດ້ຮັບການຜັນຂະຫຍາຍ ຈາກກົນໄກການປຶກສາຫາລືພາຍໃຕ້ກອງປະຊຸມ ທຸລະກິດລາວທີ່ໄດ້ຈັດຕັ້ງປະຕິບັດຢູ່ສູນກາງ. ນອກຈາກນີ້, ຍັງໄດ້ເນັ້ນໜັກອີກວ່າ: “ເມື່ອເວລາທີ່ໂຄງການສິ້ນສຸດລົງ ໃນທ້າຍປີ 2022, ເພື່ອເຮັດໃຫ້ກົນໄກການປຶກສາຫາລືລະຫວ່າງພາກລັດ ແລະ ພາກທຸລະກິດຂັ້ນແຂວງ ໃຫ້ມີຄວາມເຂັ້ມແຂງ, ຍືນຍົງ, ໝັ້ນຄົງ, ສືບຕໍ່ຜະລິດໝາກຜົນອັນສຳຄັນຂອງການປຶກສາຫາລື ໃຫ້ມີປະສິດທິພາບ ແລະ ປະສິດທິຜົນນີ້. ຂ້າພະເຈົ້າສະເໜີໃຫ້ພະແນກອຸດສາຫະກຳ ແລະ ການຄ້າ ແລະ ສະພາການຄ້າ ແລະ ອຸດສາຫະກຳ ເປັນເຈົ້າການຫຼັກຮ່ວມກັນໃນການຈັດຕັ້ງປະຕິບັດວຽກງານປຶກສາຫາລືນີ້, ເພື່ອສ້າງໃຫ້ເປັນໜຶ່ງໃນຂະບວນການສຳຄັນຂອງແຂວງທີ່ແກ້ໄຂບັນຫາຕ່າງໆ ໃນການດຳເນີນທຸລະກິດ ແລະ ເປັນຕົວຊ່ວຍໃນການຕິດຕາມການຈັດຕັ້ງລະບຽບກົດໝາຍທີ່ລັດວາງອອກ ໃນຂົງເຂດທ້ອງຖິ່ນ.
ທ່ານ ປະທານສະພາການຄ້າ ແລະ ອຸດສາຫະກຳ ແຂວງຫຼວງນໍ້າທາ, ໄດ້ສັງລວມກ່ຽວກັບສະພາບການດໍາເນີນທຸລະກິດພາຍໃນແຂວງຫຼວງນໍ້າທາ ໃນປະຈຸບັນໃນບົດກ່າວເປີດກອງປະຊຸມຂອງເພິ່ນວ່າ: “ໃນໄລຍະຜ່ານມາ, ພາກລັດຖະບານກໍໄດ້ມີຄວາມພະຍາຍາມເອົາໃຈໃສ່ໃນການປັບປຸງນິຕິກຳ, ກົນໄກການປະສານງານ, ລະບຽນການ ແລະ ແບບແຜນວິທີເຮັດວຽກ ເພື່ອເອື້ອອຳນວຍຄວາມສະດວກໃຫ້ແກ່ການດຳເນີນທຸລະກິດ, ແຕ່ຂ້າພະເຈົ້າເຫັນວ່າ ຍັງບໍ່ທັນແທດເໝາະກັບສະພາບການພຽງພໍ. ດັ່ງນັ້ນ, ເພື່ອຜັນຂະຫຍາຍໝາກຜົນດັ່ງກ່າວນັ້ນ ໃຫ້ມີປະສິດທິພາບຂຶ້ນຕື່ມ, ພາກທຸລະກິດຂອງ ພວກເຮົາ ຈຶ່ງໄດ້ພ້ອມກັນຮວບຮວມບັນຫາເພື່ອລາຍງານຂອດຄົງຄ້າງ ໃຫ້ພາກລັດໃນຂັ້ນແຂວງ ແລະ ຂັ້ນເມືອງຂອງພວກເຮົາຮັບຊາບ ແລະ ຊ່ວຍພິຈາລະນາແກ້ໄຂໃຫ້ແທດເໝາະກັບສະພາບທ້ອງຖິ່ນຂອງພວກເຮົາຢ່າງເໝາະສົມ.
ໃນລະຫວ່າງກອງປະຊຸມ, ຜູ້ເຂົ້າຮ່ວມກອງປະຊຸມໄດ້ຮັບຟັງການລາຍງານສະຫຼຸບສັງລວມບັນຫາຕ່າງໆທີ່ບັນດາພາກທຸລະກິດໄດ້ສະເໜີ ເຊິ່ງປະກອບມີທັງໝົດ 12 ບັນຫາ. ໃນນັ້ນ, 1 ບັນຫາໄດ້ຮັບການຊີ້ແຈງ ແລະ 11 ບັນຫາແມ່ນພວມຄົ້ນຄວ້າເພື່ອແກ້ໄຂຕໍ່ໄປ. ພ້ອມກັນນີ້, ບັນດາຜູ້ເຂົ້າຮ່ວມກອງປະຊຸມຍັງໄດ້ແລກປ່ຽນຄວາມຄິດເຫັນ ກ່ຽວກັບບັນຫາ, ສິ່ງທ້າທາຍ, ວິທິແກ້ໄຂ ແລະ ຄວາມຄືບໜ້າຕ່າງໆ.
ສຸດທ້າຍນີ້, ທ່ານ ຫົວໜ້າພະແນກອຸດສາຫະກໍາ ແລະ ການຄ້າ ໄດ້ໃຫ້ກຽດກ່າວປິດກອງປະຊຸມໂດຍການສະແດງຄວາມຂອບໃຈມາຍັງບັນດາພະແນກທີ່ກ່ຽວຂ້ອງຂັ້້ນເມືອງ, ຂັ້ນແຂວງ ແລະ ບັນດາຜູ້ເຂົ້າຮ່ວມຈາກພາກທຸລະກິດທີ່ປະກອບສ່ວນເຂົ້າໃນກອງປະຊຸມໃຫ້ມີຄວາມປະສົບຜົນສຳເລັດ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
