ພາກລັດ ແລະ ພາກທຸລະກິດຂອງ ສາມ ແຂວງພາກເໜືອ (ຫຼວງນ້ຳທາ, ອຸດົມໄຊ ແລະ ຜົ້ງສາລີ) ເຂົ້າຮ່ວມ ກອງປະຊຸມເຜີຍແຜ່ເງື່ອນໄຂ ແລະ ຂັ້ນຕອນຕ່າງໆ ທີ່ຕິດພັນກັບການສົ່ງອອກ ພືດກະສິກໍາ ແລະ ສັດ ໄປ ສປ ຈີນ
ແຂວງຫຼວງນໍ້າທາ, ວັນທີ 16 ມີນາ 2022, ພະແນກອຸດສາຫະກໍາ ແລະ ການຄ້າ ແຂວງຫຼວງນໍ້າທາ ໄດ້ຈັດກອງປະຊຸມເຜີຍແຜ່ເງື່ອນໄຂ ແລະ ຂັ້ນຕອນຕ່າງໆທີ່ຕິດພັນກັບການສົ່ງອອກພືດກະສິກໍາ ແລະ ສັດ ໄປ ສປ ຈີນ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງໄດ້ຮັບທຶນຈາກໂຄງການເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (EIF).
ຈຸດປະສົງຂອງກອງປະຊຸມ ແມ່ນເພື່ອເຮັດໃຫ້ທຸກພາກສ່ວນເຂົ້າໃຈກ່ຽວກັບເງື່ອນໄຂ ແລະ ຂັ້ນຕອນຕ່າງໆທີ່ຕິດພັນກັບການສົ່ງອອກພືດກະສິກໍາ ແລະ ສັດ ໄປ ສປ ຈີນ ໃຫ້ຫຼາຍຂຶ້ນ, ເຊິ່ງບັນຫານີ້ໄດ້ສະເໜີໂດຍພາກທຸລະກິດຜ່ານກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດ ທີ່ເຫັນວ່າພາກທຸລະກິດຍັງມີຂໍ້ຫຍຸ້ງຍາກໃນການເຂົ້າເຖິງຂໍ້ມູນ ແລະ ກົດລະບຽບຕ່າງໆທີ່ຕິດພັນກັບການສົ່ງອອກພືດກະສິກໍາ ແລະ ສັດ ໄປ ສປ ຈີນ. ກອງປະຊຸມດັ່ງກ່າວມີຜູ້ເຂົ້າຮ່ວມຈາກພາກລັດ ແລະ ພາກທຸລະກິດຈາກ ແຂວງຫຼວງນ້ຳທາ, ແຂວງອຸດົມໄຊ ແລະ ແຂວງຜົ້ງສາລີ ຫຼາຍກ່ວາ 60 ທ່ານ, ຍິງ 22 ທ່ານ.
ໃນກອງປະຊຸມ ໄດ້ຮັບການເຜີຍແຜ່ຂໍ້ມູນຕ່າງໆທີ່ກ່ຽວພັນກັບການສົ່ງອອກພືດກະສິກໍາ ແລະ ສັດ ໄປ ສປ ຈີນ ເຊັນ: ເງື່ອນໄຂ ແລະ ຂັ້ນຕອນ ການເຈລະຈາຂໍໂກຕ້າ, ການຂໍອະນຸມັດສົ່ງອອກພືດ ແລະ ສັດ, ບັນດາຂໍ້ມູນກ່ຽວກັບສຸຂາອະນາໄມພືດ ແລະ ສັດ, ແລະ ອື່ນໆ ຈາກກະຊວງອຸດສາຫະກໍາ ແລະ ການຄ້າ, ກົມສົ່ງເສີມການຄ້າ, ກະຊວງກະສິກຳ ແລະ ປ່າໄມ້, ກົມປູກຝັງ ແລະ ກົມລ້ຽງສັດ ແລະ ການປະມົງ. ໃນລະຫວ່າງກອງປະຊຸມກໍໄດ້ມີການປຶກສາຫາລື, ແລກປ່ຽນຂໍ້ຄິດເຫັນ ແລະ ເຈາະຈີ້ມກ່ຽວກັບຂໍ້ມູນ ລະຫວ່າງພາກທຸລະກິດ ແລະ ຕ່າງໜ້າຈາກພາກລັດທີ່ໃຫ້ການເຜີຍແຜ່ຂໍ້ມູນ.
ສຸດທ້າຍນີ້, ທ່ານ ຫົວໜ້າພະແນກອຸດສາຫະກໍາ ແລະ ການຄ້າ ໄດ້ໃຫ້ກຽດກ່າວປິດກອງປະຊຸມໂດຍການສະແດງຄວາມຂອບໃຈມາຍັງບັນດາພະແນກທີ່ກ່ຽວຂ້ອງຂອງແຂວງ ແລະ ບັນດາຜູ້ເຂົ້າຮ່ວມຈາກພາກທຸລະກິດທີ່ປະກອບສ່ວນເຂົ້າໃນກອງປະຊຸມໃຫ້ມີຄວາມປະສົບຜົນສຳເລັດ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ໂຄງການ ເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
