ກອງປະຊຸມທຸລະກິດແຂວງຜົ້ງສາລີ
ແຂວງອຸດົມໄຊ, ວັນທີ 02 ມິຖຸນາ 2022, ພະແນກອຸດສາຫະກໍາ ແລະ ການຄ້າ ໂດຍການສົມທົບກັບສະພາການຄ້າ ແລະ ອຸດສາຫະກຳ ແຂວງອຸດົມໄຊ ໄດ້ຈັດກອງປະຊຸມທຸລະກິດແຂວງອຸດົມໄຊ ຢູ່ທີ່ ຫ້ອງປະຊຸມ ພະແນກແຜນການ ແລະ ການລົງທຶນ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL).
ກອງປະຊຸມດັ່ງກ່າວໄດ້ຮັບກຽດການເປັນປະທານຮ່ວມໂດຍ ທ່ານ ອ່ອນແກ້ວ ອຸ່ນອາລົມ, ຮອງເຈົ້າແຂວງ ແຂວງອຸດົມໄຊ, ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ແລະ ທ່ານ ບຸນເລີດ ຫຼວງປະເສີດ, ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ. ກອງປະຊຸມ ໄດ້ຮັບກຽດເຂົ້າຮ່ວມໂດຍຜູ້ຕາງໜ້າຈາກພາກລັດທີ່ກ່ຽວຂອງ ແລະ ພາກທຸລະກິດເຂົ້າຮ່ວມຫຼາຍກວ່າ 50 ທ່ານ (ຍິງ 18 ທ່ານ).
ຈຸດປະສົງຂອງກອງປະຊຸມ ແມ່ນເພື່ອລາຍງານຄວາມຄືບໜ້າຂອງການຈັດຕັ້ງປະຕິບັດ ຂະບວນການປຶກສາຫາລື ລະຫວ່າງພາກລັດ ແລະ ພາກທຸລະກິດ ພ້ອມທັງຂໍທິດຊີ້ນຳການແກ້ໄຂບັນດາບັນຫາບູລິມິສິດຂອງແຂວງອຸດົມໄຊ ຕໍ່ ຄະນະນຳ ແຂວງອຸດົມໄຊ ແລະ ຄະນະນຳ ກະຊວງອຸດສາຫະກຳ ແລະ ການຄ້າ.
ໃນກອງປະຊຸມທຸລະກິດແຂວງອຸດົມໄຊ ທ່ານ ອ່ອນແກ້ວ ອຸ່ນອາລົມ, ຮອງເຈົ້າແຂວງ ແຂວງອຸດົມໄຊ ໄດ້ກ່າວເປີດກອງປະຊຸມ ໂດຍໄດ້ຮຽກຮ້ອງໃຫ້ພາກທຸລະກິດຮ່ວມມືກັບສູນກາງ ແລະ ແຂວງ ໃນການຈັດຕັ້ງປະຕິບັດມາດຕະການໄລຍະສັ້ນ ເພື່ອຫຼຸດຜ່ອນຜົນກະທົບຈາກການເພີ່ມຂຶ້ນຂອງລາຄານໍ້າມັນ ແລະ ເງິນເຟີ້. ໂດຍສະເພາະ ການເພີ່ມປະສິດທິພາບ ໃນການແຂ່ງຂັນການສົ່ງອອກຂອງພາກທຸລະກິດ ເພື່ອຊ່ວຍປັບປຸງການດຸ່ນດ່ຽງທາງການຄ້າໃນໄລຍະຍາວ.
ນອກຈາກນີ້, ທ່ານ ປອ. ມະໂນທອງ ວົງໄຊ ໄດ້ມີຄຳເຫັນກ່ຽວກັບກອງປະຊຸມວ່າ ຂະບວກການປຶກສາຫາລືລະຫວ່າງພາກລັດ ແລະ ພາກທຸລະກິດແມ່ນເຄື່ອງມື ຫຼື ວິທີການທີ່ຫຼາຍໆປະເທດນຳໃຊ້ ເພື່ອແກ້ໄຂບັນຫາທີ່ຕິດພັນກັບ ນະໂຍບາຍ, ລະບຽບການ ຫຼື ການຈັດຕັ້ງບັນດານິຕິກຳ ທີ່ຕິດພັນກັບການກໍ່ຕັ້ງ, ດຳເນີນ ແລະ ຂະຫຍາຍທຸລະກິດ. ເຊິ່ງ ເປັນເວທີ ໜຶ່ງທີ່ສໍາຄັນ ທີ່ສາມາດປະກອບສ່ວນຊ່ວຍ ຄະນະນຳຂອງແຂວງ ກໍານົດບັນຫາ, ອຸປະສັກຕົ້ນຕໍທີ່ຈະຕ້ອງໄດ້ຮັບການປັບປຸງແກ້ໄຂ ເພື່ອເຮັດໃຫ້ສະພາບແວດລ້ອມ ການດໍາເນີນທຸລະກິດພາຍໃນແຂວງ ດີຂຶ້ນເທື່ອລະກ້າວ.
ທ່ານ ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ ກໍໄດ້ກ່າວຊົມເຊີຍ ແຂວງອຸດົມໄຊທີ່ໄດ້ຈັດກອງປະຊຸມທຸລະກິດນີ້ຂຶ້ນ ເພື່ອແກ້ໄຂບັນຫາບູລິມະສິດໃຫ້ແກ່ພາກທຸລະກິດຂອງແຂວງ ໃນສະພາບການທີບໍ່ແນ່ນອນ ແລະ ການເໜັງຕີງຂອງສະພາບເສດຖະກິດມະຫາພາກ. ທ່ານເຊື່ອໝັ້ນວ່າ ກອງປະຊຸມໃນຄັ້ງນີ້ຈະຫັນເປັນກົນໄກ ທີ່ມີປະສິດທິຜົນໃນການແກ້ໄຂບັນຫາທີ່ກະທົບເຖິງນັກລົງທຶນທັງພາຍໃນ ແລະ ຕ່າງປະເທດພາຍໃນແຂວງ.
ກອງປະຊຸມໄດ້ທົບທວນຄືນຄວາມຄືບໜ້າຂອງຂະບວນການປຶກສາຫາລື ທີ່ໄດ້ຈັດຕັ້ງປະຕິບັດໃນໄລຍະ 2 ປີຜ່ານມາ ແລະ ສະແດງໃຫ້ເຫັນການສະໜັບສະໜູນຢ່າງກວ້າງຂວາງຕໍກັບ ການປຶກສາຫາລື ພາຍໃຕ້ກອງທຸລະກິດຂັ້ນແຂວງ ໃນການກຳນົດ ແລະ ແກ້ໄຂບັນຫາສຳຄັນທີ່ສົ່ງຜົນກະທົບຕໍ່ພາກທຸລະກິດຢູ່ທ້ອງຖິ່ນ. ນອກຈາກນີ້, ພາກທຸລະກິດຍັງໄດ້ຍ້ອງຍໍຊົມເຊີຍຕໍ່ອຳນາດການປົກຄອງແຂວງ ແລະ ກະຊວງອຸດສາຫະກຳ ແລະ ການຄ້າ ທີ່ໄດ້ເອົາໃຈໃສ່ ໃນການປັບປຸງສະພາບແວດລ້ອມການດຳເນີນທຸລະກິດ ເພື່ອສົ່ງເສີມການລົງທຶນຂອງເອກະຊົນ.
ນັບແຕ່ ການລິເລີ່ມຂະບວນການປຶກສາຫາລື ພາຍໃຕ້ ກອງປະຊຸມທຸລະກິດແຂວງອຸດົມໄຊ, ພາກທຸລະກິດ ແລະ ບັນດາອົງການພາກລັດທີ່ກ່ຽວຂ້ອງ ໄດ້ລະບຸ 18 ບັນຫາບູລິມະສິດເພື່ອປຶກສາຫາລື ໃນຂົງເຂດການດຳເນີນທຸລະກິດ, ການອຳນວຍຄວາມສະດວກທາງດ້ານການຄ້າ, ການເຂົ້າເຖິງການບໍລິການດ້ານການເງິນ, ການບັງຄັບໃຊ້ກົດໝາຍ ແລະ ລະບຽບການ, ທຸລະກິດກະສິກຳ, ເຮັດໃຫ້ມີການແກ້ໄຂ 08 ບັນຫາ ແລະ ບັນຫາທີ່ຍັງຄົງຕ້າງກໍມີຄວາມກ້າວໜ້າໃນການແກ້ໄຂ.
ນອກຈາກນີ້, ກອງປະຊຸມຍັງໄດ້ເຫັນດີເປັນເອກະພາບກ່ຽວກັບ ແຜນການດຳເນີນງານເພື່ອສືບຕໍ່ປຶກສາຫາລື ແລະ ຊອກຫາວິທີແກ້ໄຂທີ່ເໝາະສົມຕໍ່ 10 ບັນຫາທີ່ຍັງເຫຼືອໃນ 12 ເດືອນຕໍ່ໜ້າ.
ໃນຕອນທ້າຍຂອງກອງປະຊຸມ ທ່ານຮອງເຈົ້າແຂວງ ໄດ້ກ່າວປິດກອງປະຊຸມວ່າ ໃນນາມຕາງໜ້າໃຫ້ຄະນະນຳແຂງ ຕົນເອງຈະປະກອບສ່ວນຢ່າງຕັງໜ້າໃນການ ຟື້ນຟູສະຖຽນລະພາບຂອງເສດຖະກິດ, ຊ່ວຍຂະແໜງການທີ່ກ່ຽວຂ້ອງ ໃນການແກ້ໄຂບັນຫາທີ່ຍັງຄົງຄ້າງ ແລະ ສົ່ງເສີມການລົງທຶນຂອງພາກເອກກະຊົນພາຍໃນແຂວງ.
ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
