ການຝຶກອົບຮົມ ການແກ້ໄຂຄະດີ ການຟື້້ນຟູ ແລະ ການລົ້ມລະລາຍຂອງວິສາຫະກິດ ໃຫ້ແກ່ຜູ້ພິພາກສາ
ໃນວັນທີ 26-28 ກັນຍາ 2022, ທີ່ໂຮງແຮມ ເມືອງແທັງ, ນະຄອນຫຼວງວຽງຈັນ ຄະນະສານການຄ້າ ຂອງສານປະຊາຊົນສູງສຸດ, ພາຍໃຕ້ການສະໜັບສະໜູນຂອງໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ໄດ້ຈັດຝຶກອົບຮົມກ່ຽວກັບການແກ້ໄຂຄະດີ ການຟື້ນຟູ ແລະ ການລົ້ມລະລາຍຂອງວິສາຫະກິດ ເພື່ອຈັດຕັ້ງປະຕິບັດກົດໝາຍວ່າດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດ, ໂດຍການເປັນປະທານຂອງທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ. ການຝຶກອົບຮົມຄັ້ງນີ້ມີຜູ້ເຂົ້າຮ່ວມທັງໝົດຈຳນວນ 41 ທ່ານ, ໃນນັ້ນປະກອບມີຜູ້ພິພາກສາ ຈາກສານປະຊາຊົນສູງສຸດ, ຄະນະສານການຂອງສານປະຊາຊົນພາກກກາງ ແລະຄະນະສານການຄ້າຂອງສານປະຊາຊົນນະຄອນຫຼວງວຽຈັນ ແລະ ແຂກຮັບເຊີນ ຈາກກົມສົ່ງເສີມການລົງທຶນ ກະຊວງແຜນການ, ກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ, ກົມກົດໝາຍ ກະຊວງຍຸຕິທໍາ ແລະ ຜູ້ຄວບຄຸມຊັບສິນຈໍານວນໜຶ່ງ ທີ່ມາຈາກສາຂາອາຊີບນັກບໍລິຫານທຸລະກິດ, ນັກບັນຊີ ແລະ ນັກກົດໝາຍ ຕາມເງື່ອນໄຂທີ່ໄດ້ກຳນົດໄວ້ໃນກົດໝາຍດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດ.
ຈຸດປະສົງຂອງກອງການຝຶກອົບຮົມໃນຄັ້ງນີ້ ແມ່ນເພື່ອແນໃສ່ (1) ສ້າງຜູ້ພິພາກສາໃນການດຳເນີນຄະດີການລົ້ມລະລາຍຂອງວິສາຫະກິດ; (2) ສ້າງຄວາມຮັບຮູ້ ແລະ ເຂົ້າໃຈ ກ່ຽວກັບກົດໝາຍວ່າດ້ວຍການຟື້ນຟູ ແລະ ການລົ້ມລະລາຍຂອງວິສາຫະກິດ ສະບັບປັບປຸງ ແລະ ກົດໝາຍອື່ນທີ່ກ່ຽວຂ້ອງ; (3) ເພື່ອຖອດຖອນບົດຮຽນ ແລະ ປະສົບການປະສົບການຂອງສາກົນ ໃນການແກ້ໄຂບັນຫາລົ້ມລະລາຍຂອງວິສາຫະກິດຈາກຊຽວຊານຕ່າງປະເທດ. ທັງໝົດນີ້ ກໍແມ່ນເພື່ອສ້າງເງື່ອນໄຂ ແລະ ອໍານວຍຄວາມສະດວກໃຫ້ແກ່ການດຳເນີນທຸລະກິດ ຢູ່ ສປປ ລາວ ພາຍໃຕ້ຄຳສັ່ງຂອງນາຍົກລັດຖະມົນຕີ ວ່າດ້ວຍການປັບປຸງບັນດາລະບຽບການ ແລະ ກົນໄກປະສານງານໃນການດຳເນີນທຸລະກິດ ຢູ່ ສປປ ລາວ, ສະບັບເລກທີ 02/ນຍ, ລົງວັນທີ 01 ກຸມພາ 2018.
ໃນລະຫວ່າງການຝຶກອົບຮົມ, ນັກຝຶກອົບຮົມ ແມ່ນໄດ້ຮັບຟັງການນຳສະເໜີກ່ຽວກັບເນື້ອໃນສຳຄັນຂອງການຟື້ນຟູ ແລະ ການລົ້ມລະລາຍຂອງວິສາຫະກິດ, ພາລະບົດບາດຂອງຜູ້ພິພາກສາ ແລະ ຂັ້ນຕອນໃນການດຳເນີນຄະດີການຟື້ນຟູ ແລະ ການລົ້ມລາຍຂອງວິສາຫະກິດ ພາຍໃຕ້ກົດໝາຍສະບັບປັບປຸງດັ່ງກ່າວ. ພ້ອມດຽວກັນນັ້ນ ນັກຝຶກອົບຮົມ ຍັງໄດ້ຮັບຟັງ ບົດຮຽນ ແລະ ປະສົບການຂອງສາກົນ ໃນດຳເນີນຄະດີການລົ້ມລະລາຍຂອງວິສາຫະກິດຈາກຊ່ຽວຊານຕ່າງປະເທດ. ໃນກອງປະຊຸມ, ນັກຝຶກອົບຮົມ ກໍໄດ້ມີການຖາມ-ຕອບ ແລະ ແລກປ່ຽນບົດຮຽນກ່ຽວກັບດຳເນີນຄະດີການຟື້ນຟູ ແລະ ການລົ້ມລະລາຍຂອງວິສາຫະກິດ ໂດຍສະເພາະແມ່ນການສຶກສາຄົ້ນຄວ້າບັນດາກໍລະນີສຶກສາຮ່ວມກັນອີກດ້ວຍ ຊຶ່ງເຕັມໄປດ້ວຍບັນຍາກາດອັນດີ ແລະ ກົງໄປກົງມາ.
ໃນຕອນທ້າຍຂອງການຝຶກອົບຮົມ, ທ່ານປະທານ ໄດ້ເໜັ້ນໜັກໃຫ້ ນັກຝຶກອົບຮົມ ນຳເອົາເນື້ອໃນສຳຄັນຂອງກົດໝາຍວ່າດ້ວຍການຟື້ນຟູ ແລະ ລົ້ມລະລາຍຂອງວິສາຫະກິດ ສະບັບປັບປຸງ ແລະ ບົດຮຽນທີ່ໄດ້ຈາກປະສົບການທີ່ໄດ້ຈາກການຝຶກອົບຮົມຄັ້ງນີ້ ໄປສືບຕໍ່ສຶກສາຄົ້ນຄວ້າ ແລະ ພັດທະນາ ຄວາມຮູ້ຄວາມສາມາດຂອງຕົນເອງ ເພື່ອໃຫ້ສາມາດກາຍເປັນ ຜູ້ພິພາກສາດຳເນີນຄະດີການລົ້ມລະລາຍ ຂອງວິສາຫະກິດທີ່ມີຄຸນນະພາບ. ພ້ອມນັ້ນທ່ານປະທານຍັງໄດ້ຮຽກຮ້ອງໃຫ້ນັກຝຶກອົບຮົມ ຈົ່ງເອົາໃຈໃສ່ໃນການດໍາເນີນຄະດີ ໃຫ້ສອດຄ່ອງຕາມລະບຽບກົດໝາຍ ແລະ ຈັນຍາບັນ – ຈັນຍາທໍາ ຂອງຜູ້ພິພາກສາ.
ການຝຶກອົບຮົມຄັ້ງນີ້ໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າຂອງ ສປປ ລາວ (LCT), ເຊິ່ງເປັນໂຄງການທີ່ຈັດຕັ້ງປະຕິບັດພາຍໃຕ້ ກົມແຜນການ ແລະ ການຮ່ວມມື, ກະຊວງ ອຸດສາຫະກໍາ ແລະ ການຄ້າ, ໂດຍໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍ ລັດຖະບານອົດສະຕຣາລີ, ລັດຖະບານ ໄອແລນ, ລັດຖະບານ ອາເມຣິກາ ແລະ ທະນາຄານໂລກ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວ ຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
