ກອງປະຊຸມປຶກສາຫາລືພາກທຸລະກິດ ແຂວງຫຼວງນຳ້ທາ ພາຍໃຕ້ໂຄງການສົ່ງເສີມ ຄວາມສາມາດໃນການແຂ່ງຂັນ ເພື່ອສົ່ງອອກຢູ່ສາມແຂວງພາກເໜືອ (ECL)
ໃນວັນທີ 15 ທັນວາ 2022, ສະພາການຄ້າ ແລະ ອຸດສາຫະກໍາແຂວງຫຼວງນໍາ້ທາ, ສະພາການຄ້າ ແລະ ອຸດສາຫະກຳແຫ່ງຊາດ ຮ່ວມກັບໂຄງການ ECL ໄດ້ຈັດກອງປະຊຸມປຶກສາຫາລະພາກທຸລະກິດພາຍໃນແຂວງ ໂດຍການເປັນປະທານຂອງ ທ່ານ ບຸນສົງ ແກ້ວມະນີວົງ ປະທານສະພາການຄ້າ ແລະ ອຸດສາຫະກຳແຂວງ ແລະ ທ່ານ ສັງຄົມ ຈັນສຸກ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ ໂດຍມີຜູ້ເຂົ້າຮ່ວມທັງໝົດ 55 ທ່ານ, ຍິງ 15 ທ່ານ ຈາກທັງໝົດ 5 ເມືອງ ໂດຍມາຈາກຂະແໜງການທຸລະກິດທີ່ສຳຄັນຂອງແຂວງຄື: ຫັດຖະກຳ, ກະສິກຳ, ການຄ້າ, ອຸດສາຫະກຳປຸງແຕ່ງ, ອຸດສາຫະກຳ, ຂົນສົ່ງ, ກໍ່ສ້າງ, ຂຸດຄົ້ນ, ທ່ອງທ່ຽວ, ແລະ ຂະແໜງຂາຍຍົກຂາຍຍ່ອຍ ແລະ ການບໍລິການ.
ຈຸດປະສົງຂອງກອງປະຊຸມແມ່ນເພື່ອຮັບຟັງການສະເໜີບັນຫາຈາກບັນດາຜູ້ປະກອບການ ຕໍ່ກັບການດຳເນີນທຸລະກິດພາຍ ໃນແຂວງຫຼວງນ້ຳທາ ແລະ ເກັບກຳບັນຫາທີ່ພາກທຸລະກິດພົບພໍ່້ ເພື່ອສະເໜີໃຫ້ກັບພາກລັດທີ່ກ່ຽວຂ້ອງຄົ້ນຄ້ວາ ແລະ ຊ່ວຍແກ້ໄຂບັນຫາ.
ປະທານກອງປະຊຸມໄດ້ກ່າວເຖິງຄວາມສຳຄັນ ຂອງກອງປະຊຸມໃນມື້ນີ້ ຈະເປັນໜຶ່ງໃນວິທີທາງສຳຄັນ ທີ່ຈະສາມາດຊ່ວຍພາກທຸລະກິດ ໂດຍສະເພາະແມ່ນການສ້າງສະພາບແວດລ້ອມ ໃຫ້ສາມາດອຳນວຍຄວາມສະດວກແກ່ການດຳເນີນທຸລະກິດຂອງແຂວງຫຼວງນ້ຳທາ. ພ້ອມທັງ ເປັນການລາຍງານສະພາບການດຳເນີນທຸລະກິດ ຂອງແຂວງຫຼວງນ້ຳ ໃຫ້ພາກສ່ວນກ່ຽວຂ້ອງ ໃນການປັບປຸງແກ້ໄຂ.
ຈາກກອງປະຊຸມເຫັນວ່າພາກທຸລະກິດໃຫ້ ໄດ້ປະກອບຄຳເຫັນຢ່າງຫ້າວຫັນ ເຊິ່ງສາມາດເກັບກຳບັນຫາໄດ້ຫຼາຍພໍສົມຄວນ ໂດຍສະເພາະແມ່ນບັນຫາທີ່ຕິດພັນກັບການຂົນສົ່ງ, ຂັ້ນຕອນການຂໍອະນຸຍາດການລົງທຶນໃນໂຄງການຕ່າງໆ, ການເກັບຄ່າທຳນຽມ ແລະ ອາກອນ, ແລະ ການເຂົ້າຫາແຫຼ່ງທຶນ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນເພື່ອສົ່ງອອກຢູ່ສາມແຂວງພາກເໜືອ (ECL), ເຊິ່ງເປັນໂຄງການທີ່ໄດ້ຮັບການສະໜັບສະໜູນໂດຍ ກອບເຄືອຂ່າຍການເຊື່ອມໂຍງເຂົ້າສາກົນດ້ານການຄ້າ (Enhanced Integrated Framework – EIF). ໂຄງການດັ່ງກ່າວແມ່ນແນໃສ່ເພື່ອຊ່ວຍສົ່ງເສີມການເຕີບໂຕຂອງເສດຖະກິດ ໂດຍຖືເອົາວຽກງານການຄ້າ, ທຸລະກິດ ແລະ ພາກເອກະຊົນເປັນຫຼັກໃນການພັດທະນາບັນດາແຂວງພາກເໜືອດ້ານຕາເວັນອອກຂອງປະເທດ, ເຊິ່ງປະຕິບັດຕາມແຜນພັດທະນາເສດຖະກິດ – ສັງຄົມແຫ່ງຊາດ.ໂຄງການນີ້ປະກອບມີທັງໝົດ 3 ອົງປະກອບຄື: ການເສີມສ້າງສະພາບແວດລ້ອມ ທີ່ເອື້ອອໍານວຍສໍາລັບການດໍາເນີນທຸລະກິດ, ປັບປຸງປະສິດທິພາບໃນການຜະລິດ ແລະ ການສົ່ງອອກຂອງຂະແໜງການເປົ້າໝາຍ ແລະ ການຄຸ້ມຄອງບໍລິຫານໂຄງການ.
