ສົ່ງເສີ່ມວຽກງານອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ຂອງກອງເລຂາ ແລະ ໜ່ວຍງານ ຂັ້ນແຂວງ ທົ່ວປະເທດ
ໃນລະຫວ່າງວັນທີ 19 – 20 ກັນຍາ 2023, ທີ່ເມືອງ ວັງວຽງ, ແຂວງ ວຽງຈັນ, ກົມການນໍາເຂົ້າ ແລະ ສົ່ງອອກ (ກົມ ຂອ), ກະຊວງອຸດສາຫະກໍາ ແລະ ການຄ້າ (ກະຊວງ ອຄ) ໃນນາມເປັນກອງເລຂາຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ຂັ້ນສູນກາງ (ກຄອຄຂ.ສ) ໄດ້ຈັດ “ກອງປະຊຸມຝຶກອົບຮົມ ກ່ຽວກັບວຽກງານອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ໃຫ້ແກ່ກອງເລຂາ ແລະ ໜ່ວຍງານອຳນວຍຄວາມສະດວກທາງດ້ານການຄ້າ ແລະ ການຂົນສົ່ງ ຂັ້ນແຂວງ (ອນຄ.ສ) ທົ່ວປະເທດ ຄັ້ງທີ 1” ໃຫ້ກຽດເປັນປະທານ ໂດຍ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ຫົວໜ້າ ກຄອຄຂ.ສ, ທັງຊີ້ນໍາ ໜ່ວຍງານ ອນຄ.ສ. ພ້ອມດ້ວຍຂະແໜງອຸດສາຫະກໍາ ແລະ ການຄ້າ ແລະ ຂະແໜງໂຍທາທິການ ແລະ ຂົນສົ່ງຈາກ 18 ແຂວງໃນຂອບເຂດທົ່ວປະເທດ.
ທ່ານ ປອ ມະໂນທອງ ວົງໄຊ ໄດ້ກ່າວໃນວາລະເປີດກອງປະຊຸມວ່າ: ເພື່ອການປະຕິບັດຕາມສັດຕະຍາບັນທີ່ ສປປ ລາວ ມີຕໍ່ສາກົນ ໂດຍສະເພາະວຽກງານການຄ້າ ແມ່ນປະຕິບັດຕາມສັນຍາ ວ່າດ້ວຍການອໍານວຍຄວາມສະດວກທາງດ້ານການຄ້າ ໃນຂອບອົງການການຄ້າໂລກ (WTO-TFA) ແລະ ສັນຍາ ວ່າດ້ວຍການຄ້າດ້ານສິນຄ້າອາຊຽນ (ATIGA). ສ່ວນວຽກງານຂົນສົ່ງ ແມ່ນປະຕິບັດຕາມສັນຍາ ວ່າດ້ວຍການອໍານວຍຄວາມສະດວກທາງດ້ານການຂົນສົ່ງຂ້າມແດນໃນບັນດາປະເທດລຸ່ມແມ່ນໍ້າຂອງ (GMS-CBTA) ແລະ ສັນຍາຂົນສົ່ງສອງຝ່າຍ. ວຽກງານອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ແມ່ນມີບົດບາດສໍາຄັນ ຕໍ່ການພັດທະນາເສດຖະກິດ-ສັງຄົມ, ແມ່ນໜຶ່ງໃນຈຸດສຸມ ຂອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ. ລັດຖະບານ ໃຫ້ຄວາມສໍາຄັນ ແກ່ວຽກງານອໍານວຍຄວາມສະດວກ ທາງດ້ານການຄ້າ ແລະ ການຂົນສົ່ງ ເພື່ອຫຼຸດຜ່ອນຂັ້ນຕອນ, ເວລາ ແລະ ຕົ້ນທຶນທາງດ້ານການຄ້າ ແລະ ການຂົນສົ່ງ, ລັດຖະບານ ຈຶ່ງໄດ້ຕັດສິນໃຈໂຮມຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ເຊິ່ງເມື່ອກ່ອນເປັນສອງຄະນະເຂົ້າເປັນຄະນະດຽວ ຕາມດໍາລັດ ເລກທີ 145/ນຍ, ລົງວັນທີ 14 ມີນາ 2023 ແນໃສ່ເຮັດໃຫ້ກົນໄກການປະສານງານ ແລະ ແກ້ໄຂບັນຫາຕ່າງໆ ມີຄວາມສະດວກຄ່ອງຕົວຂຶ້ນກວ່າເກົ່າ.
ໂດຍລວມແລ້ວ ໜ້າທີຮັບຜິດຊອບຫຼັກຂອງຄະນະກໍາມະການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ແມ່ນ ຄົ້ນຄວ້າ, ປັບປຸງ ລະບຽບການ, ຂັ້ນຕອນ ແລະ ມາດຕະການທາງດ້ານການຄ້າທີ່ບໍ່ແມ່ນພາສີ (NTMs), ລວມທັງຕາໜ່າງເສັ້ນທາງຂົນສົ່ງ, ໂຄງສ້າງລາຄາຂົນສົ່ງ ແລະ ມາດຕະຖານເຕັກນິກລົດຂົນສົ່ງ. ພ້ອມດຽວກັນ, ແມ່ນການຄົ້ນຄວ້າແກ້ໄຂບັນຫາ ແລະ ສິ່ງກີດຂວາງ ທີ່ຕິດພັນກັບການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ແນໃສ່ຫຼຸດຜ່ອນຕົ້ນທຶນ ແລະ ເວລາ ໃນການນໍາເຂົ້າ-ສົ່ງອອກ, ການນໍາເຂົ້າຊົ່ວຄາວ, ສົ່ງອອກຊົ່ວຄາວ,ນໍາເຂົ້າເພື່ອສົ່ງອອກຕໍ່, ຜ່ານແດນ, ເຄື່ອນຍ້າຍ ແລະ ຂົນສົ່ງ ສິນຄ້າ ໂດຍຄຽງຄູ່ໄປກັບການຫັນມານໍາໃຊ້ລະບົບເຕັກໂນໂລຊີ ແລະ ດິຈິຕອນທີ່ທັນສະໄໝ ເຂົ້າໃນວຽກງານການອໍານວຍຄວາມສະດວກທາງດ້ານການຄ້າ ແລະ ການຂົນສົ່ງ ລວມທັງການຊໍາລະສະສາງ ແມ່ນມີບົດບາດສໍາຄັນຫຼາຍໃນຍຸກຂອງການເຊື່ອມໂຍງເສດຖະກິດກັບສາກົນ.
ໃນຕອນທ້າຍຂອງວາລະປິດກອງປະຊຸມ ໄດ້ສະຫຼຸບຜົນຂອງການເຄື່ອນໄຫວຜ່ານມາ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ແລະ ຈຸດສຸມຂອງວຽກງານໃນຕໍ່ໜ້າ ໂດຍການປະກອບສ່ວນແລກປ່ຽນຄໍາຄິດເຫັນ ຢ່າງກົງໄປກົງມາ, ຍົກໃຫ້ເຫັນບັນຫາ ແລະ ສະເໜີທິດທາງ, ວິທີການແກ້ໄຂ, ແບບແຜນວຽກຕໍ່ໜ້າເພື່ອເຮັດໃຫ້ການຄ້າ ແລະ ການຂົນສົ່ງ ມີຄວາມສະດວກ, ຫຼຸດຜ່ອນຂັ້ນຕອນ, ເວລາ, ຕົ້ນທຶນຂອງພາກທຸລະກິດ, ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການລົງທຶນພາຍໃນ ແລະ ຕ່າງປະເທດ ແລະ ການດໍາເນີນທຸລະກິດໃຫ້ມີປະສິດທິພາບ ແລະ ມີຄວາມວ່ອງໄວຂື້ນ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການ ທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
