ກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດ ກ່ຽວກັບການສ້າງຄວາມເຂັ້ມແຂງໃຫ້ແກ່ສະມາຄົມເສດຖະກິດ ພາຍໃຕ້ກົນໄກ ກອງປະຊຸມທຸລະກິດລາວ
ໃນຕອນເຊົ້າຂອງວັນທີ 22 ກັນຍາ 2023, ທີ່ຫ້ອງປະຊຸມໂຮງແຮມຄຣາວພລາຊາ, ສະພາການຄ້າ ແລະ ອຸດສາຫະກໍາແຫ່ງຊາດລາວ ໃນນາມກອງເລຂາກອງປະຊຸມທຸລະກິດລາວ ໄດ້ຈັດກອງປະຊຸມປຶກສາຫາລືລະຫວ່າງພາກລັດ ແລະ ພາກທຸລະກິດ ກ່ຽວກັບການສ້າງຄວາມເຂັ້ມແຂງ ທາງດ້ານສະມາຄົມເສດຖະກິດ, ໂດຍການເປັນປະທານຮ່ວມຂອງ ທ່ານ ນາງ ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ນິສິດ ແກ້ວປັນຍາ ຮອງລັດຖະມົນຕີ ກະຊວງພາຍໃນ, ແລະ ທ່ານ ປະລິນຍາເອກ ນາງ ວາລີ ເວດສະພົງ, ຮອງປະທານ ສະພາການຄ້າ ແລະ ອຸດສາຫະກຳແຫ່ງຊາດລາວ (ສຄອຊ). ກອງປະຊຸມຄັ້ງນີ້ ໄດ້ມີຜູ້ຕາງໜ້າຈາກໜ່ວຍງານປຶກສາຫາລື ພາກທຸລະກິດພາຍໃຕ້ກົນໄກກອງປະຊຸມທຸລະກິດລາວ, ບັນດາຜູ້ຕາງໜ້າຈາກສະມາຄົມເສດຖະກິດ ຂະແໜງຕ່າງໆ ແລະ ສະພາການຄ້າຕ່າງປະເທດ ປະຈໍາ ສປປ ລາວ ເຂົ້າຮ່ວມ ເຊັ່ນ: ສະພາການຄ້າອົດສະຕາລີ ປະຈໍາ ສປປ ລາວ, ສະມາຄົມນັກທຸລະກິດໄທ ໃນ ສປປ ລາວ, ກຸ່ມນັກທຸລະກິດອັງກິດ ແຫ່ງ ສປປ ລາວ (BBGL), ສະມາຄົມປະກັນໄພລາວ, ສະມາຄົມ ຄຳ ເຄື່ອງປະດັບ ແລະ ອັນຍະມະນີລາວ, ສະມາຄົມ ເຟີນີເຈີລາວ, ສະມາຄົມຫັດຖະກຳລາວ, ສະມາຄົມຜູ້ຂົນສົ່ງ ແລະ ເເລະ ຈັດສົງສິນຄ້າລະຫວ່າງປະເທດ (LITFA), ສະມາຄົມນ້ຳມັນເຊື້ອໄຟ ແລະ ອາຍແກັສລາວ (LFGA), ສະມາຄົມຢາງພາລາລາວ (LRA), ສະມາຄົມ ມັນຕົ້ນລາວ, ແລະ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ (VCCI).
ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອ ໃຫ້ພາກລັດ ແລະ ພາກທຸລະກິດ ໄດ້ຮ່ວມກັນ ປຶກສາຫາລື ຂໍ້ສະເໜີຂອງພາກທຸລະກິດ ໃນການແກ້ໄຂສິ່ງທ້າທາຍຕໍ່ການກໍ່ຕັ້ງ, ເຄື່ອນໄຫວ ແລະ ຄຸ້ມຄອງ ສະມາຄົມເສດຖະກິດ ໂດຍສະເພາະແມ່ນຕິດພັນກັບ ການຈັດຕັ້ງປະຕິບັດດຳລັດວ່າດ້ວຍສະມາຄົມ ສະບັບເລກທີ 238/ສພຊ, ລົງວັນທີ 11/08/2017 ແລະ ດຳລັດວ່າດ້ວຍການສ້າງຕັ້ງ ແລະ ການເຄື່ອນໄຫວຂອງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ສະບັບເລກທີ 237/ນຍ ລົງວັນທີ 18 ພຶດສະພາ 2020, ເພື່ອແນ່ໃສ່ສ້າງຄວາມສະດວກໃຫ້ກຸ່ມຜູ້ປະກອບການທຸລະກິດ ທີ່ຕ້ອງການເພີ່ມທະວີການຮ່ວມມື ແລະ ສ້າງຄວາມເຂັ້ມແຂງ ໃນຂະແໜງການຂອງຕົນ, ພ້ອມທັງສ້າງຂໍ້ສະດວກໃຫ້ອົງການຈັດຕັ້ງຂອງພາກທຸລະກິດ ໂດຍສະເພາະ ແມ່ນ ສະພາການຄ້າ ແລະ ອຸດສາຫະກໍາແຫ່ງຊາດລາວ ໃນການຕິດຕາມຄຸ້ມຄອງ ແລະ ເກັບກໍາຂໍ້ມູນຂອງສະມາຄົມເສດຖະກິດຕ່າງໆ. ກອງປະຊຸມຄັ້ງນີ້ ແມ່ນໜຶ່ງໃນຂະບວນການປຶກສາຫາລືຂອງກອງປະຊຸມທຸລະກິດລາວ, ທີ່ແນໃສ່ແກ້ໄຂຂອດອຸດຕັນທີ່ຕິດພັນກັບການກໍ່ຕັ້ງ ແລະ ດຳເນີນທຸລະກິດ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການ ທີ່ໄດ້ຮັບການປະກອບທຶນຮ່ວມ ເຂົ້າກອງທຶນສົບທົບຫຼາຍຝ່າຍ ໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ ຂະຫຍາຍຕົວຂອງທຸລະກິດ ໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
