ກະຊວງອຸດສາຫະກໍາ ແລະ ການຄ້າ ຈັດກອງປະຊຸມຄະນະຊີ້ນໍາຂັ້ນວິຊາການ ແລະ ກອງປະຊຸມເຜີຍແຜ່ການຈັດຕັ້ງປະຕິບັດ ທຶນສົມທົບ BAF II
ນະຄອນຫຼວງວຽງຈັນ, ວັນທີ 15 ກຸມພາ 2024, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມຄະນະຊີ້ນໍາຂັ້ນວິຊາການທຶນສົມທົບ ເພື່ອສົ່ງເສີມທຸລະກິດ ໄລຍະ 2 (BAF II) ຄັ້ງທີ 13 ຂຶ້ນ. ໃນກອງປະຊຸມວາລະທີ 1 ໄດ້ທົບທວນການຈັດຕັ້ງປະຕິບັດທຶນສົມທົບ BAF II ທີ່ຜ່ານມາ ແລະ ຕິດຕາມຄວາມຄຶບໜ້າການແກ້ໄຂບັນຫາທີ່ຖືກຍົກຂື້ນຈາກພາກທຸລະກິດໃນກອງປະຊຸມຄັ້ງກ່ອນ ທີ່ໄດ້ຈັດຂື້ນໃນເດືອນ ສິງຫາ 2023 ພ້ອມນີ້ຍັງໄດ້ປຶກສາຫາລື ເພື່ອວາງແຜນບູລິມະສິດໃນອະນາຄົດ.
ກອງປະຊຸມດັ່ງກ່າວ ໂດຍການເປັນປະທານຂອງ ທ່ານ ປອ ບົວວັນ ວິລາວົງ, ຫົວໜ້າຫ້ອງການ, ກະຊວງອຸດສາຫະກໍາ ແລະ ການຄ້າ. ກອງປະຊຸມດັ່ງກ່າວໄດ້ໃຫ້ກຽດເຂົ້າຮ່ວມຈໍານວນ 20 ກ່ວາທ່ານ ໂດຍລວມມີຄະນະຊີ້ນໍາຂັ້ນວິຊາການ BAF II Taskforce ພາຍໃຕ້ກະຊວງອຸດສາຫະກໍາ ແລະ ການຄ້າ, ພະແນກ NIU, ທີມງານ ທຶນສົມທົບ BAF II.
ໃນລະຫວ່າງກອງປະຊຸມ, ຜູ້ເຂົ້າຮ່ວມກອງປະຊຸມໄດ້ຮັບຟັງການນໍາສະເໜີ ແລະ ແລກປ່ຽນຄໍາຄິດເຫັນກ່ຽວກັບຜົນສໍາເລັດ ຕັ້ງແຕ່ເລີ່ມຕົ້ນໂຄງການ ຈົນຮອດ ເດືອນ ທັນວາ 2023 ເຊິ່ງລັດຖະບານໄດ້ສໍາເລັດອະນຸມັດທຶນສົມທົບ ຈໍານວນ 526 ທືນ ແລະ ເບີກຈ່າຍໃຫ້ແກ່ທຸລະກິດແລ້ວ ຈໍານວນ 429 ທຶນ, ສິ່ງທ້າທາຍ ແລະ ແຜນບູລິມະສິດໃນການຈັດຕັ້ງປະຕິບັດທຶນສົມທົບ BAF II. ໃນວາລະທີ 2 ຄະນະປະຊຸມໄດ້ເດີນທາງລົງຢ້ຽມຢາມ ບໍລິສັດ Mahasena Enterprise Company Limited ຫຼື ໂຮງງານຜະລິດ ນໍ້າໝາກນອດ ຕັ້ງຢູ່ໃນນະຄອນຫຼວງວຽງຈັນ ເຊິ່ງບໍລິສັດດັ່ງກ່າວ ແມ່ນໜຶ່ງໃນບໍລິສັດທີ່ໄດ້ຮັບທຶນສົມທົບເພື່ອສົ່ງເສີມທຸລະກິດຈາກໂຄງການ BAF II.
ໃນຕອນທ້າຍ, ທ່ານ ປອ ບົວວັນ ວິລາວົງ, ຫົວໜ້າຫ້ອງການ, ໄດ້ໃຫ້ກຽດສະແດງຄວາມຂອບໃຈມາຍັງບັນດາຜູ້ເຂົ້າຮ່ວມ ແລະ ບໍລິສັດທີ່ຕ້ອນຮັບໃນການຢ້ຽມຢາມຄັ້ງນີ້ ພ້ອມດຽວກັນນີ້ກໍເຫັນດີເປັນເອກະພາບຕໍ່ກັບຄວາມຄຶບໜ້າການຈັດຕັ້ງປະຕິບັດທຶນສົມທົບເພື່ອສົ່ງເສີມທຸລະກິດ BAF II ທີ່ໄດ້ໄດ້ລາຍງານຕໍ່ທີ່ປະຊຸມ.
ກອງປະຊຸມດັ່ງກ່າວໄດ້ຮັບການສະໜັບສະໜູນໂດຍ ໂຄງການສົ່ງເສີມຄວາມສາມາດໃນການແຂ່ງຂັນ ແລະ ການຄ້າ ຂອງ ສປປ ລາວ (LCT), ເຊິ່ງເປັນໂຄງການທີ່ໄດ້ຮັບການປະກອບທຶນຮ່ວມເຂົ້າກອງທຶນສົບທົບຫຼາຍຝ່າຍໂດຍທະນາຄານໂລກ, ລັດຖະບານອົດສະຕຣາລີ, ລັດຖະບານ ໄອແລນ ແລະ ລັດຖະບານ ອາເມຣິກາ, ເຊິ່ງເປົ້າໝາຍຫຼັກແມ່ນການຫຼຸດຜ່ອນ ແລະ ລົບລ້າງອຸປະສັກທີ່ມີຕໍ່ການເຕີບໃຫຍ່ຂະຫຍາຍຕົວຂອງທຸລະກິດໂດຍການປັບປຸງສະພາບແວດລ້ອມດ້ານລະບຽບກົດໝາຍ, ຫຼຸດຜ່ອນຕົ້ນທຶນການຄ້າ ແລະ ຍົກລະດັບຄວາມສາມາດການແຂ່ງຂັນຂອງພາກທຸລະກິດ.
