ສປປ ລາວ ປຶກສາຫາລືແຜນງານບຸລິມະສິດຂອງຂະແໜງການຄ້າ ແລະ ຂົງເຂດອື່ນໆທີ່ກ່ຽວຂ້ອງ ພາຍໃຕ້ແຜນວຽກການຂ້າມຜ່ານສະຖານະພາບ ປະເທດດ້ອຍພັດທະນາຢ່າງໂລ່ງລ່ຽນຂອງ ສປປ ລາວ.

ນະຄອນຫຼວງວຽງຈັນ, ວັນທີ 30 ກັນຍາ 2024 – ກົມເຈລະຈາການຄ້າ ແລະ ຮ່ວມມືເສດຖະກິດສາກົນ, ກະຊວງອຸດສາຫະກຳ ແລະ ການຄ້າ (ກອຄ), ໂດຍໄດ້ຮັບການສະໜັບສະໜູນຈາກປະເທດສະຫະລັດອາເມລິກາ ໂດຍຜ່ານ ອົງການພັດທະນາສາກົນຂອງສະຫະລັດອາເມລິກາ (USAID), ໄດ້ເຜີຍແຜນງານສະເໜີການປະຕີບັດ ວຽກບຸລິມະສິດຂອງຂະແໜງການຄ້າ ແລະ ຂົງເຂດອື່ນໆທີ່ກ່ຽວຂ້ອງ (2024-2030) ໃນມື້ນີ້, ເຊິ່ງເປັນສ່ວນໜຶ່ງ ຂອງເອກະສານ ການແນະນຳສໍາລັບການຂ້າມຜ່ານສະຖານະພາບປະເທດດ້ອຍພັດທະນາຢ່າງໂລ່ງລ່ຽນຂອງ ສປປ ລາວ ໂດຍການເປັນປະທານຂອງ ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ແລະ ທ່ານ ນາງ ແຮັດເຕີ ວາເຣຍອາວາ, ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ແລະ ມີຜູ້ຕາງໜ້າຈາກພາກລັດ ແລະ ເອກະຊົນເຂົ້າຮ່ວມກວ່າ 50 ທ່ານ.

ທ່ານ ປອ. ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ໄດ້ເນັ້ນໜັກເຖິງຄວາມສໍາຄັນ ຂອງການກະກຽມຢ່າງຫ້າວຫັນ “ການຂ້າມຜ່ານສະຖານະພາບປະເທດດ້ອຍພັດທະນາ ແມ່ນຫຼັກຖານສະແດງ ເຖິງຄວາມຄືບຫນ້າຂອງປະເທດ, ແຕ່ກໍປາສະຈາກສິ່ງທ້າທາຍທີ່ມາພ້ອມກັບການຫຼຸດພົ້ນຈາກສະຖານະພາບ ດັ່ງກ່າວບໍ່ໄດ້. ແຜນງານນີ້ ຈະຊ່ວຍຮັບປະກັນວ່າ ພວກເຮົາມີຄວາມພ້ອມເພື່ອປະເຊີນກັບການປ່ຽນແປງຂ້າງຫນ້າ ໂດຍສະເພາະໃນຂະແໜງການຄ້າ ແລະ ການລົງທຶນ.”

“ເອກະສານແນະນຳສໍາລັບການຂ້າມຜ່ານສະຖານະພາບປະເທດດ້ອຍພັດທະນາຢ່າງໂລ່ງລ່ຽນຂອງ ສປປ ລາວ: ແຜນງານວຽກບຸລິມະສິດຂອງຂະແໜງການຄ້າ ແລະ ຂົງເຂດອື່ນໆທີ່ກ່ຽວຂ້ອງ” ກຳນົດບັນດາກິດຈະກຳບຸລິມະສິດ ເພື່ອພັດທະນາເສດຖະກິດ, ຫັນການສົ່ງອອກໃຫ້ມີຄວາມຫຼາກຫຼາຍ ແລະ ດຶງດູດການລົງທຶນ ແນ່ໃສ່ການສ້າງ ຄວາມຢືດຢຸ່ນ ແລະ ຮັບປະກັນບາດກ້າວຄວາມຍືນຍົງ ພາຍຫຼັງທີ່ ສປປ ລາວ ຫຼຸດພົ້ນຈາກສະຖານະພາບປະເທດ ດ້ອຍພັດທະນາໃນປີ 2026. ເອກະສານນີ້ ໄດ້ສະເໜີແຜນງານວຽກບຸລິມະສິດຂອງຂະແໜງການຄ້າ ແລະ ຂົງເຂດອື່ນໆທີ່ກ່ຽວຂ້ອງ ເພື່ອກະກຽມໃຫ້ແກ່ການຂ້າມຜ່ານສະຖານະພາບປະເທດດ້ອຍພັດທະນາ ສປປ ລາວ ໂດຍຄັດຈ້ອນ ແລະ ສຸມໃສ່ກິດຈະກຳທີ່ສອດຄ່ອງກັບເປົ້າໝາຍການພັດທະນາຂອງ ສປປ ລາວ, ເພື່ອແນ່ໃສ່ການເພີ່ມ ທະວີການສົ່ງອອກ, ດຶງດູດການລົງທຶນຈາກຕ່າງປະເທດ ແລະ ປັບປຸງສາຍພົວພັນດ້ານການຄ້າ. ເປົ້າໝາຍແມ່ນ ເພື່ອສ້າງໃຫ້ມີຄວາມຍືດຍຸ່ນ ແລະ ການຈະເລີນເຕີບໂຕ ໂດຍການຫັນປ່ຽນເສດຖະກິດ ແລະ ສົ່ງເສີມການພັດທະນາແບບຍືນຍົງ.

ທ່ານ ນາງ ແຮັດເຕີ ວາເຣຍອາວາ, ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ໄດ້ກ່າວຊົມເຊີຍ ລັດຖະບານແຫ່ງ ສປປ ລາວ ແລະ ກະຊວງອຸດສາຫະກຳ ແລະ ການຄ້າ ຕໍ່ກັບບາດກ້າວອັນສຳຄັນດັ່ງກ່າວ ແລະ ໄດ້ເນັ້ນໜັກເຖິງຄວາມສໍາຄັນຂອງການຂ້າມຜ່ານສະຖານະພາບປະເທດດ້ອຍພັດທະນາ ໂດຍກ່າວວ່າ: “ການຂ້າມຜ່ານສະຖານະພາບປະເທດດ້ອຍພັດທະນາ ຂອງ ສປປ ລາວ ແມ່ນຂີດໝາຍອັນສຳຄັນ ທີ່ສະແດງ ໃຫ້ເຫັນເຖິງການພັດທະນາເສດຖະກິດຂອງປະເທດ, ຄວາມກ້າວໜ້າຂອງສັງຄົມ ແລະ ການສ້າງຄວາມເຂັ້ມແຂງ ດ້ານສະຖາບັນ. ເພື່ອຮັບປະກັນການຂ້າມຜ່ານສະຖານະພາບ ປະເທດດ້ອຍພັດທະນາຢ່າງໂລ່ງລ່ຽນ, ສປປ ລາວ ຕ້ອງສືບຕໍ່ດຳເນີນການປະຕິຮູບ, ຫັນປ່ຽນເສດຖະກິດໃຫ້ມີຄວາມຫຼາກຫຼາຍຂຶ້ນ ແລະ ສ້າງຄວາມຢືດຢຸ່ນເພື່ອຕ້ານ ກັບການກະທົບຈາກພາຍນອກ.”

ອົງການ USAID ໂດຍຜ່ານໂຄງການສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ (LBE) ໄດ້ໃຫ້ການ ສະໜັບສະໜູນດ້ານວິຊາການໃຫ້ແກ່ກະຊວງອຸດສາຫະກຳ ແລະ ການຄ້າ ໃນການຮ່າງເອກະສານແນະນໍານີ້.

ອົງການ USAID ໄດ້ຮ່ວມມືຢ່າງໃກ້ຊິດກັບ ກະຊວງອຸດສາຫະກຳ ແລະ ການຄ້າ ເພື່ອອໍານວຍຄວາມສະດວກ ທາງດ້ານການຄ້າ ແລະ ປັບປຸງສະພາບແວດລ້ອມທີ່ເອື້ອອໍານວຍໃຫ້ແກ່ການລົງທຶນ, ການຄ້າ ແລະ ເພີ່ມຄວາມສາ ມາດໃນການແຂ່ງຂັນຂອງວິສາຫະກິດຂະໜາດນ້ອຍ ແລະ ກາງ. ການຮ່ວມມືນີ້ ໄດ້ນຳໄປສູ່ການສ້າງ ແລະ ປັບປຸງລະບຽບການ ແລະ ຂັ້ນຕອນຕ່າງໆ ລວມທັງການຍົກລະດັບລະບົບ ແລະ ຖານລະບົບຕ່າງໆ, ເຊິ່ງສະແດງໃຫ້ເຫັນເຖິງຄວາມມຸ່ງໝັ້ນຂອງລັດຖະບານສະຫະລັດອາເມລິກາ ໃນການສະໜັບສະໜູນ ການເຕີບໂຕທາງດ້ານເສດຖະກິດ ແລະ ຂ້າມຜ່ານສະຖານະພາບປະເທດດ້ອຍພັດທະນາຢ່າງສຳເລັດ ຂອງ ສປປ ລາວ.